16/06/2025
Олон хүмүүс жүжигчин бүсгүйн ярьсан сэдэвт сэтгэгдэл бичжээ. Би бээр энэ удаа тэсгэл алдаад… Бодлоо бичнэ ээ яадын..
“20-д жилийн өмнөх Экстэйгээ сардаа 1 холбогддог, дундаасаа хүүхэдгүй, Монголд ирээд кофе уудаг, амьдарч буй улсад нь энэ бол соёл, сүүлд Монголд ирээд кофе уухад, залуу эхнэртээ хэлээгүй, эхнэр нь мэдээд хардсан уурласан, жүжигчин бүсгүй эхнэрт нь гомдсон, соёл сэтгэлгээний ялгаа байгааг ойлгосон, эргээд уучилсан” гэж…
Миний бодлоор,
Үнэхээр холбоотой байх хэрэгцээтэй бол гэр бүл эхнэр хүүхдийг нь хүндлээд, маш тодорхой байх хэрэгтэй санагдав. Магадгүй сайхан найзууд болоод үлдсэн бол хамтдаа уулзаж танилцацгаагаад, эхнэрт нь итгэл бас ойлголт өгөх нь чухал санагдлаа.
Соёлын ялгаа гэж хэлсэн европ хосууд нь бол бүгд л хоорондоо нээлттэй, ил тод харилцаатай байдаг нь үнэн. Гэхдээ зөвхөн нөхөртэй нь уулзах, тэрийгээ нөхөр нь эхнэрээсээ нуусан байвал аль ч улсад зүв зүгээр зүйл бол биш байх аа.
Эксийн эхнэр, нөхрөө алдах вий гэсэн айдастай санагдсан гэжээ. Тийм ээ, үр хүүхдийг нь төрүүлээд өдөржин шөнөжин хэдэн жил, сайдаж муудаж хамт байхаар заримдаа харилцаа унтарна, нурна, буцаад ойлголцоно, улам батажна буцаад муудна гээд дээш доош диаграмтай л байх шиг. Тэгэхээр яг аль үед нь нөхөртэй нь уулзахаас хамаарч эхнэр өөр өөрөөр хүлээж авна бх.
Эмэгтэй хүнд, бардам байх үе, өөртөө итгэл алдрах үе, эргээд босох үе гээд амьдрал ээлжлээд л явж байгаа. Даавар ч нөлөөлж байгаа.
Бүхэл бүтэн хүн төрүүлж өсгөх, эр эм эвцэлдэн нийлж 1 гэр бүл бүтээх, өөрийгөө хайрлах, эцэг эх, ар гэр, найз нөхөд, ажил төрөл, ахуй гээд зэрэг зэрэг зохицуулахад заримдаа шулам ч болно, заримдаа бурхан ч болно гэж үнэн санагддаг. Хүүхэд ер нь хүнийг ээж болгодог аав болгодог шүү дээ. Бас тэвчээр суулгадаг юм шиг.
Тэгэхээр одоогоор Ариана жүжигчин энэ талаас хараагүй санагдлаа.
Харин соёлын ялгааг бол гаднынхан шиг эксээ хуримдаа, төрсөн өдөртөө урьдаг сэтгэлгээ Монголд арай зайтай байгаа нь үнэн.
Тэгэхээр, Арианагийн хувьд яриа нь үнэн, бид бодож үзэх өнцөг гэлээ ч бас нөгөө талыг буюу эхнэрийн өнцгийг дутуу хараад байх шиг санагдлаа. Хэлэхэд амархан амьдраад туулахаар хүн ойлгодог юм байна лээ.
Эцэст нь, дундаасаа үр хүүхэдтэй салсан бол ойр ойр холбогдох шаардлага гардаг. Энэ харилцааны зорилго бол маш тодорхой. Тийм ч учраас үүнийг ойлгодог эхнэрүүд, эмэгтэйчүүд Монголд олон байдаг шүү.
Эр хүн нь дотроо юу бодохыг ёстой хэлж мэдэхгүй байна.😅
