06/11/2025
Шүгэл үлээгч гэх иргэн Мөнхбат болон Дугархүү эмч нарын шүүхийн асуудал, хүүхдийн данс битүүмжилсэн гэх асуудал, 300 сая төгрөгийн өрөнд оруулсан гэх зэрэг зүйлийн талаар харлаа, сонслоо.
Ингээд аль нэг талд орохгүйгээр, хөндлөнгийн байр суурьнаас хуульчийн тайлбар хийе.
1. Нэхэмжлэгч гэх Дугархүүгийн хамааралтай компани бололтой “Скайлайн Велнес”ХХК нь хариуцагч С.Мөнхбатад холбогдуулж, ажил хэргийн нэр хүндэд халдсан тул залруулга хийлгэх, хохирол төлбөрт 296,316,800 төгрөг гаргуулах нэхэмжлэл гаргажээ.
2. Маргааны эхлэл нь мэдээж С.Мөнхбат нь нөгөө NMN гэх эмийг хятад улсад үйлдэрлэдэг, өөрийн гэсэн үйлдвэр бараг байхгүй, 3-4 ажилтантай, гадаад улсад зарахыг хориглосон, зөвхөн монголд зарж бна гэх гэх мэт мэдээлэл тараасантай холбоотой.
Харин нөгөө тал нь үгүй тийм юм байхгүй, Нидерланд улсын бүтээгдэхүүн энэ тэр гээд өөрсдийгөө өмгөөлж байгаа.
3. За ингээд нэхэмжлэл гаргамагц шүүх хүлээн аваад 7 хоногийн дотор иргэний хэрэг үүсгэх ба тус хэрэгт 2025.08.21-нд иргэний хэрэг үүсгэсэн захирамж гаржээ. Хэрэг үүсгэсэн захирамж нь хэргийг шийдвэрлэсэн гэсэн үг биш, зөвхөн тухайн хэргийг шүүх хүлээж авлаа, энэ маргааныг шүүх хуралдаанаар шийдвэрлье гэсэн агуулгатай.
4. Хэрэг үүсгэсэн захирамж гарснаас хойш хариуцагч нь 7 хоногийн дотор гардан авах, улмаар 14 хоногийн дотор хариу тайлбар өгөх хуультай.
5. Гол асуудал нь иргэн С.Мөнхбат нь гадаадад байгаа шалтгаанаар хуульд заасан хугацаанд нэхэмжлэлийг аваагүй байна. Уг нь өөрөө гадаадад түр хугацаагаар байгаа бол монгол улсад итгэмжлэгдсэн төлөөлөгчөө явуулаад шүүх дээр очуулах, нэхэмжлэлээ төлөөлөгчөөр дамжуулан авах боломжтой.
Ингээд иргэн Мөнхбат нь нэхэмжлэл гардаж авах хуульд заасан хугацаа хэтрүүлжээ.
6. Шүүгчийн захирамж гардуулаагүй гэх тухайд Иргэний хэрэг хянан шийдвэрлэх тухай хуульд зааснаар иргэний хэрэг үүсгэсэн шүүгчийн захирамжийг хариуцагчид гардуулдаггүй. Зөвхөн нэхэмжлэлийг буюу “Скайлайн Велнес”ХХК -иас хариуцагч С.Мөнхбатад холбогдуулж зарга үүсгэсэн нэхэмжлэлийг гардуулдаг.
7. Практикт хариуцагч нь нэхэмжлэлээ гардаж авахгүй хугацаа хэтрүүлж, шүүхээс зайлсхийж буй тохиолдолд шүүх нэхэмжлэгчийн хүсэлтээр дансны зарлагын хөдөлгөөнийг нэхэмжлэлийн үнийн дүнгээр зогсоох тохиолдол бий.
Үүний тулд нэхэмжлэгч “Скайлайн Велнес”ХХК нь хариуцагч С.Мөнхбатын дансны зарлагын хөдөлгөөний зогсоох хүсэлт гаргасан байх учиртай. Энэ хүсэлтээ “Скайлайн Велнес”ХХК нь шүүхэд гаргажээ.
Ингээд шүүх хүсэлтийн дагуу дансны зарлагын хөдөлгөөнийг нэхэмжлэлийн үнийн дүн 296,316,800 төгрөгийн хэмжээнд зогсоох захирамж гаргасан байна.
8. Хүүхдийн данс битүүмжилсэн гэх тухайд : Шүүх зөвхөн хариуцагчийн буюу Мөнхбатын дансны зарлагын хөдөлгөөнийг зогсоох шийдвэр гаргасан байна. Хүүхдийн данс тэр тусмаа хариуцагч биш этгээдийн данс битүүмжлэх хууль зүйн ямар ч боломж байхгүй.
9. Харин шүүгчийн захирамжийг банкууд хэрэгжүүлэхдээ алдаатай хэрэгжүүлж, Мөнхбатын хүүхдийн дансны зарлагыг зогсоосон байх магадлалтай юм. Учир нь насанд хүрээгүй хүүхдийн хамтран данс эзэмшигчээр Мөнхбат байсан байна.
Ингээд хамтран данс эзэмшдэг дансыг нь банкууд зогсоожээ.
Уг нь шүүгчийн захирамж дээр нь зөвхөн Мөнхбатын дансны зарлагын хөдөлгөөнийг зогсоох талаар заасан байхад хүүхдийн дансыг битүүмжилж алдаа гаргасан бна.
Иймд Мөнхбат нь хүүхдийн данс нээлгэх тухай гомдол, хүсэлтээ банкууд болон Нийслэлийн шүүхийн шийдвэр гүйцэтгэх газарт гаргах ёстой.
10. Данс битүүмжилсэн захирамжийг гарсан өдрөөс нь 10 хоногт багтаан гомдол гаргах эрхтэй. Хэрэв гадаадад байх хугацаандаа энэхүү гомдол гаргах хугацаагаа алдсан бол бүх зүйл дууссан гэж ойлгож болохгүй.
Энэхүү захирамжийг өөрчлүүлэх хүсэлт гаргах эрх Мөнхбатад байгаа. Энэ эрхээ хэзээ ч эдэлж болно. Энийг Мөнхбат мэдэж л байх ёстой.
11. Одоогийн процесст дүгнээд хэлэхэд шүүх хэн нэгний талд ороод шийдвэр гаргасан зүйл алга байна.
12. Харин С.Мөнхбат өмгөөлөгч аваад хуулийн дагуу эрхээ хэрэгжүүлээд явах хэрэгтэй.
13. Тэр NMN гэх эмний тухайд талд талд өөр өөр юм яриад л яваад бгаа учраас хэн үнэн, хэн худлаа яриад байгааг мэдэх юм алга.
Шүүх хурал болоогүй учраас хэн ч ялж, ялагдаагүй. Хэн үнэн, хэн худлаа ярьж байгаа нь нотлогдоогүй.
14. Харин талууд шүүх хурал яаралтай хийлгэх хүсэлтээ гаргаж байгаад үнэн мөн өө шүүх дээрээ үзчих хэрэгтэй дээ.
Шүүх хурлаа нээлттэй онлайнаар гаргавал хэн үнэн, хэн худлаа байсныг иргэд мэдэх байх.
Өмгөөлөгч П.Ундрах-Эрдэнэ
