05/08/2025
ХОЛЛИВУДЫН НЭРТ ЖҮЖИГЧИН РИЧАРД ГИРИЙН СОНИРХОЛТОЙ ЯРИЛЦЛАГА
Далай ламыг онцгой болгодог зүйл бол цэвэр ариун сэтгэл, энэрэнгүй байдал ба зөв арга замаар тус хүргэх хосгүй чадвар нь. Энэ нь зөвхөн хувь хүн төдийгүй улс орон, бүс нутаг, дэлхийн улс төрд хүртэл гэрлийг түгээдэг. Тэр бол энх тайвны элч.
https://www.youtube.com/watch?v=OZv8xC2p6fo
Хөтлөгч: Та бүхэнд Interview нэвтрүүлэг хүрэхэд бэлэн боллоо. Намайг Молли Кампир гэдэг өнөөдрийн зочин бол танилцуулах ч шаардлагагүй эрхэм нэгнийг бид урин оролцуулж байна. Энэ бол Ричард Гир, өнөөдрийн манай Wion – World is one нэвтрүүлэгт оролцож байна. Тавтай морилно уу.
Р.Г: Сайн уу Молли.
Хөтлөгч: Нэвтрүүлгээ бид таны хэрхэн Буддын шашинд хөтлөгдсөн талаар, мөн Түвдийн соёл, хүний эрхийг хамгаалахад дуу хоолойгоо хүчтэй хүргэх болсон, энэ аялал хэрхэн эхэлсэн талаар эхлэе гэж бодож байна. Сайн байна уу, тавтай морилно уу. Та бүхэн “Ярилцлага” нэвтрүүлгийг үзэж байна.
Ричард Гир: Миний бодлоор аливаа гүн ухаан болон сэтгэлийн аялал хоёр зүйлээс эхэлдэг. Нэгдүгээрт, ертөнцийг болон өөрийн оюун санааг мэдэх гэсэн сониуч зан. Хоёрдугаарт, оюун санаа, сэтгэл дотортоо анхаарах, өнгийн тольдон харах шаардлага үүсгэсэн тэр зовлон, амар амгалан бус байдлын мэдрэмж.
Буддын шашин бол асуултад шууд хариулахуйц. Залуу байхдаа би амьдралын нэг төрлийн “зөрчилдөөн”-ийг маш хүчтэй мэдэрдэг байсан. Бидэнд заяагдсан үзэл санаа, ертөнцийг үзэх үзэл, “Би хэн бэ? Би юу вэ? Энэ бүхний утга учир юу вэ?” гэх асуултуудын дотоод хариултууд маань гаднах ертөнцийн бодит байдалтай нийцдэггүй байлаа. Ингээд миний аялал эхэлсэн. Би оюун ухаан, орчлон ертөнц, энэрэнгүй нигүүлсэнгүй байдал, зовлонгийн мөн чанарыг өөр өөр өнцгөөс судалж эхэлсэн.
Буддын шашин миний сэтгэлд гүн хүрч, анх Японы Зэн буддизмд их татагдсан. Миний буддын шашинтай хамгийн анх танилцсан нь Японы Зэн буддизм байсан.
Зэн надад маш их таалагдаж, өдөр тутмын дадал болж чадсан бөгөөд өнөөдрийг хүртэл 50 гаруй жил тогтмол баримталж байна. Би Буддын шашны талаар таниж мэдэж амжаагүй 30 орчим насандаа Далай ламтай уулзах хүсэл маш ихээр төрдөг байлаа. Тухайн үед Азиас гадна түүний талаар бараг мэдээлэл байхгүй, ном ч цөөн хэвлэгддэг байсан. Яагаад уулзах хүсэл хүчтэй төрөөд байсныг сайн мэдэхгүй ч бидний дунд нийтлэг танил байж таараад анх удаа танилцах боломж олдсон юм. 1981, 82 онд Энэтхэгийн Монсүүний улирлын үеэр Дарамсалад очиход маш амаргүй байсан. Дели-гээс Патанот хүртэл шөнөжин галт тэргээр явж, тэндээс дахин машинаар ойролцоогоор зургаан цаг явж хүрдэг байв. Монсүүний улирал учраас байрлах газар олдохгүй байх үед Далай ламын дүү Нари Ренбүчи болон түүний эхнэр Рэнин Кандра нарын гэрт байрлах болсноор анхлан Түвдийн соёл, нийгэмтэй танилцсан юм. Дараа нь би Далай ламтай биечлэн уулзах зорилгоо биелүүлж чадсан юм. Энэ уулзалт миний хувьд гэрэл ассан агшин гэхээсээ илүү анхнаасаа л тэнд байсан юм шиг уулзах нь жам ёсных байсан юм шиг маш тухтай мэдрэмж төрсөн дөө.
Хөтлөгч: Түвдийн соёл, хүний эрхийг хамгаалах, бас түвдийн төлөөх олон улсын компанит ажлууд дээр таны оролцооны талаар та дэлгэрэнгүй ярьж өгнө үү?
Ричард Гир: 1987 онд, би профессор Роберт Турмантай хамтран Нью-Йоркт Түвдийн соёлыг ойлгуулах, таниулах, улс төрийн нөхцөл байдалд анхаарал хандуулах, олон нийтийг уриалах зорилгоор Тibet House байгууллагыг үүсгэн байгуулсан.
Далай ламтай анх уулзахдаа би Түвдийн улс төрийн нөхцөл байдлыг сайн мэддэггүй байсан. Хятадын эзлэн түрэмгийлэлээс болж 1.2 сая түвд хүн амь насаа алдсан, түвдийн олон улсад тархсан дүрвэгсдийн нөхцөл байдал, хүний эрхийн зөрчил энэ бүхний талаар огт мэддэг байлаа. Тиймээс бид эдгээр бүх асуудлыг олон нийтэд нээлттэй болгохыг зорисон. 1991 онд би Олон улсын Түвдийг дэмжих кампанит ажилд оролцож эхэлсэн, тэгээд удалгүй ТУЗ-ийн гишүүн, даргаар ажилласан. Олон нийтэд мэдээлэл өгөх, улс төрчдөд яриа хийж зөв ойлгуулах, эерэг нөлөөллийг бий болгох, дэмжлэг авах зэрэг нь гол ажил маань байсан. Вашингтонд олон жилийн турш бид маш амжилттай ажилласан. 2002 онд бид Tibetan Policy Act (Түвдийн бодлогын хууль)-ийг батлуулж чадсан. Энэ хууль нь АНУ-ын Төрийн департаментын хүрээнд Хятадтай аливаа хэлэлцээр хийхдээ Түвдийн асуудлыг заавал хөндөх ёстой гэсэн заалт оруулсан. Жил ирэх тусам бид үйл ажиллагаагаа энэ бодлогын хүрээнд өргөжүүлж ирсэн. Энэ хуулинд Хятадын Түвд болон Азийн түүхийн талаарх албан ёсны тайлбар нь худал бөгөөд хэдий олон удаа давтаж хэлсэн ч үнэн болдоггүй гэж заасан. Хятадын үйлдэл нь хууль бус эзлэн түрэмгийлэл бөгөөд Түвдийн ард түмнээс ямар ч зөвшөөрөл аваагүйн дээр хэлэлцээгүй байсан. Бид энэ байр сууриа бат хамгаалж Вашингтонд хийсэн энэхүү ажлуудаа Европт ч хүргэхийг зорьж байна.
Хөтлөгч: Анх Далай ламтай уулзсан уулзалтаа илүү дэлгэрэнгүй хуваалцвал? Танд хэрхэн урам зориг өгсөн бол?
Ричард Гир: Түвдийн соёлын амьд үлдэх хувь заяа нь Энэтхэгээс шууд хамаарна гэж би итгэдэг. Энэтхэгийн засгийн газар болон ард түмэн Түвдийн дүрвэгсдэд гайхалтай халуун сэтгэлээр хандсан. Хэрвээ энэ тусламж байгаагүй бол тэд амьд үлдэж, тэсч гарах боломжгүй байлаа. Анх Энэтхэгт ирж, Дарамсалад очихдоо би Далай ламыг миний толгой дээр гараа тавиад л намайг гэгээрүүлж, бүх зовлонг минь арилгаж, нирваан дүрд хүргэнэ гэж битүүхэн төсөөлж байлаа.
Мэдээж энэ бол жаахан гэнэн бодол байсан. Түүнтэй анх уулзахад намайг хамгийн их гайхшруулсан зүйл бол түүний энгийн, эгэл байдал. Мэдээж ухаалаг, нинжин сэтгэлтэй, өглөгч хүн боловч маш энгийн, бид зүгээр л жирийн яриа өрнүүлсэн. Дээрхийн гэгээнтэн миний хэн болохыг мэдэхгүй байх шиг байсан. Харин түүний өрөөнд байсан дүү нь түүнд намайг жүжигчин, магадгүй нэлээн олонд танигдсан хүн гэдгийг хэлсэн бололтой шиг. Тэгээд тэр надаас жүжиглэлтийн тухай асууж эхэлсэн. Би үнэндээ түүнтэй хоосон чанар, гэгээрэл зэрэг гүн ухааны сэдвээр ярихыг хүсэж байсан ч тэр миний мэргэжил, миний ертөнцөөр дамжуулан гүн сэдэв рүү орохыг зорьсон нь түүний ур чадвар байв.
Тэр надаас: – Чи жүжиглэхдээ уурлаж байгаа үедээ үнэхээр уурладаг уу? – Инээж, хөгжилдөж байгаа үедээ үнэхээр тэгэж мэдэрдэг үү? – Уйлж байгаа үедээ үнэхээр уйлж байдаг уу? – гэж асуусан.
Би: – Мэдээж, илүү бодитой, илүү жинхэнэ мэдрэмж төрөх тусам бүтээж буй дүр маань илүү хүчтэй, илүү амьд болдог гэж хариулсан. Тэгтэл тэр над руу нилээд ноцтой хэсэг хараад, хэсэг чимээгүй байснаа инээж эхэлсэн. Энэ нь миний хувьд үгээр хэлэх боломжгүй гайхалтай агшин байсан. Түүний надад хэлэх гэсэн санаа бол жүжигчин хүний хувьд би эдгээр сэтгэл хөдлөлийг “үйлдвэрлэж” байдаг. Мэдээж маш бодит мэт мэдрэгддэг ч үнэндээ бид бүгд амьдрал дээр ч мөн адил өөрсдөө эдгээр сэтгэл хөдлөлийг бүтээдэг — уйтгар гуниг, баяр хөөр, атаархал, шунал гээд бүгд жүжиглэлт шиг бий болдог гэсэн санаа байв.
Хөтлөгч:
Далай ламын өв соёл, түүний дараагийн дүрийг тодруулах үйл явцад Хятад улс нөлөөлөхийг оролдож байгаа талаар таны бодол?
Ричард Гир: Далай ламыг тодруулах эртний уламжлалт арга нь Түвд соёлд маш тодорхой тусгагдсан байдаг. Одоогийн Далай лам ч гэсэн түүнийг эртний уламжлалаар тодруулна гэж мэдэгдсэн. Үүнд мэргэ төлөг, төрөл бүрийн шинж тэмдгүүд багтана.
Тэрээр мөн саяхан тохиосон төрсөн өдрөөрөө мэдэгдэл гаргасан шүү дээ. Хэрвээ дараагийн төрөл тодрох үед Түвд эрх чөлөөтэй болоогүй байгаа цагт хатуу хяналт бүхий Хятадын нутагт дахин төрөхгүй, харин эрх чөлөөт газар төрнө гэж хэлсэн. Мөн дараа төрлийг эрэл хайгуул болох үед уламжлалт шинж тэмдгүүдийг олж илрүүлэх, эртнээс уламжлалтай аргаар тодруулах бөгөөд үүнийг Далай ламын Институц ойрын хүрээлэл болох Гадэн Подран сан хариуцах бөгөөд баталгаажуулах цорын ганц эрх бүхий байгууллага нь хэмээн мэдэгдсэн.
Түүнээс ч илүү чухал нь, Далай лам бол бодисатва учраас ямар ч тохиолдолд эргэн ирнэ. Бурхнаас өгөгдсөн туйлын зорилго нь хамаг амьтны тусын тулд байх. Сүүлийн 10–15 жилд Түвдийн дотоод, гадаад олон хүн түүний үйл хэрэг үргэлжлээсэй, дахин төрөөсэй гэж хүсэж байгаагаа илэрхийлсэн тул тэрээр институцийг үргэлжлүүлэхээр шийдсэн.
Харин энэ нь Түвдийн ард түмний бүрэн эрх бөгөөд Хятадад огтоос хамааралгүй асуудал юм. Гэсэн ч Хятадууд өөрсдийн “Далай лам”-ыг тодруулах төлөвлөгөөтэй. Тэд жинхэнэ Банчен ламыг бага насанд нь хулгайлж, өөрийн хуурамч Банчен ламыг хялбархан тодруулж томилсон шүү дээ.
---
Хөтлөгч:
Олон улсын хамтын нийгэмлэгүүд Далай ламын залгамж халааг хамгаалах, Түвдийн соёлыг хадгалж үлдэхийн тулд юу хийх хэрэгтэй вэ?
Ричард Гир: Энэтхэг Хятадтай нэлээн төвөгтэй харилцаатай боловч шударга, идэвхтэй зуучлагчийн байр суурьнаас Далай лам болон Түвдийн ард түмэнд туйлын их тусламж үзүүлсэн.
Миний харж байгаагаар, Хятадтай тэнцвэртэй хэлэлцэж чадах улс бол АНУ болон Европ ба бид хамтран нэгэн дуугаар, нэг үзэл бодлоор нэгдэж дуу хоолойгоо өргөх явдал. Хятад улс олон улсуудыг хагалган бутаргах, салгах, эдийн засгийн дарамт шахалтыг үзүүлж ирсэн. Харин АНУ болон Европ хүний эрх, хууль дээдлэх ёс гээд нийтлэг үнэт зүйлс дээр нэгдэж, хамтдаа хүчтэй, шударга байр суурь илэрхийлж чадвал Хятадууд сонсох болов уу.
Хөтлөгч: Далай ламын сургаалийг сонсож, урам зориг авснаараа та Түвдийн соёл, хүний эрхийг хамгаалахад ямар арга хэмжээ авч байсан бэ?
Ричард Гир: Би олон чухал буддын номыг хэвлүүлэхэд ивээн тэтгэж чадсандаа их олзуурхдаг юм. Далай лам болон Түвдийн ард түмэнд зориулж хийсэн бүх зүйлсээсээ хамгийн их бахархдаг зүйлсийн нэг нь энэ л дээ. Мөн Tibet House нь дэлхийн бусад улс оронд салбартай болж өргөжсөн нь маш чухал.
ICT (Олон улсын Түвдийг дэмжих кампанит ажил)-ын оффисууд Берлин, Амстердам, Брюссель, Вашингтонд байдаг. Миний дуу хоолой магадгүй өөр олон хүнийхээс илүү хүчтэй хүрсэн байх. Би тэдгээр эрх нь зөрчигдөж буй хүмүүсийн төлөө ил тод нээлттэй ярьж, хүний эрхийн зөрчлүүдийг олон нийтэд хүргэхийг зорьсон.
Түвд рүү сэтгүүлчид орох нь хойд Солонгос руу орохоос ч хэцүү болсон. Түвд цэрэгжсэн бүс болж, ард иргэд нь ч байнгын дарамтад амьдарч байна. ICT бол үнэн мэдээллийг судалж, баталгаажуулж, дэлхийд түгээх цөөхөн эх сурвалжийн нэг.
Хөтлөгч: Түвдийн асуудлыг ийнхүү дэмжих явцад таны кино карьерт ямар нэг сөрөг үр дагавартай тулгарч байв уу?
Ричард Гир: Санаанд орохгүй байна, байсан ч би тоохгүй ээ. Миний хувьд энэ нь огт хамаагүй.
Хөтлөгч: Далай ламтай харилцаа тань дэлхийн улс төр, эдийн засаг, нийгмийн шударга ёсны талаарх таны үзэл бодолд хэрхэн нөлөөлсөн бэ?
Ричард Гир: Буддын шашны үүднээс авч үзвэл хамгийн чухал зүйл бол сэтгэл, хандлага, өөрөөр хэлбэл: Бид яагаад юу хийдэг вэ? гэдэгт оршино.
Үйл хөдлөлөөс илүүтэйгээр түүний цаадах сэдэл, санаа нь гол утга учиртай. Үнэндээ бидний үйлдлээс үүдэх үйлийн үрийн үлдэц буюу кармын үр дагаврыг ариусгах, зөөлрүүлэх цорын ганц зүйл бол цэвэр, ариун сэдэл юм.
Хэрэв сэтгэл маань ариун, бусдын тусын тулд чиглэсэн бол, төгс бус үйл ч хүртэл буянтай үр дагавар авчирч чадна.
Өглөө нүдээ нээсэн мөчөөс эхлэн түүний анхны бодол нь:
Би өнөөдөр хэрхэн бусдад тусалж чадах вэ? Би бүх амьтанд хэрхэн ашиг тустай байж болох вэ? Хүмүүн, хамаг амьтны жаргалыг хэрхэн арвижуулж болох вэ?
Тийм аугаа сэтгэл, ийм өндөр зориг тэвчээртэй, амьтны тусын тулд амьдралынхаа нэг бүрийг зориулсан хүнтэй хамт байх нь өөрөө их буян.
Тэр хүн Бурханы сургаалд гүн орж, бүх үзэгдэл мөн чанараасаа хоосон буюу угийн орших чанаргүй гэдгийг өөрийн биеэр гүнзгий танин мэдэхийн төлөө уйгагүй ажилладаг.
Өөрийн “би”-г, оршихуйг угийн оршин тогтнодог бус, шүтэн барилдлагын үр дүнд түр зуур үүссэн хэмээн ухаарч, хоосон чанарыг бясалгаж, бодит үнэнийг танин мэдэх замаар бусдад үйлчилж, энэрэл нигүүлсэл, билгийг хослуулан амьдарч буй нэгэн.
Хөтлөгч:
Далай ламтай нөхөрлөл тань таны хувийн амьдрал, харилцаанд хэрхэн нөлөөлсөн бэ?
Ричард Гир: Миний хувьд Далай ламтай олон талын харилцаа холбоо бий. Заримыг нь би одоо ч бүрэн дүүрэн ойлгож таньж л явна.
Хамгийн түрүүнд, би бол шавь. Үүрдийн шавь. Үүнийг би зүрх сэтгэлээсээ хүлээн зөвшөөрч, бардамнан хэлдэг.
Гэвч бидний харилцаа үүгээр хязгаарлагдахгүй. Бид хамтдаа олон зүйлийг төлөвлөж, дэлхий даяар олон үйл ажиллагааг ивээн тэтгэж, түүний илтгэл, айлдварыг олон оронд хүргэхэд хамтран оролцсон.
Мөн бид улс төрийн нөхцөл байдлын талаар ч ярилцаж, асуудлыг хэрхэн зөв замаар шийдвэрлэх тухай санал солилцож байсан. Гэвч энэ бүхэн дээр нэмээд бас нэгэн зүйл бий — бидний хувийн, чин сэтгэлийн харилцаа. Би заримдааДалай ламд хувийн бэрхшээл, сэтгэлийн асуудлуудаа хуваалцнаа.
Мэдээж хэрэг, бид хэн маань ч түүний эрхэм цагийг дэмий үрэхийг хүсдэггүй. Түүний оршихуй өөрөө их үнэтэй, их ач холбогдолтой.
Сүүлийн үед сэтгэл гүн хөдөлгөсөн нэгэн агшин нь түүний төрсөн өдрийг тэмдэглэсэн арга хэмжээний үеэр, яг долоо хоногийн өмнө байх шүү, Дарамсала хотноо болсон.
Түүний Далай ламын институц үргэлжлэх болно хэмээн зарлаж, өөрийн дараагийн дүр хэрхэн тодрох талаар тодорхой мэдээлэл мэдэгдлийг илэрхийлсний дараа, олон өндөр лам нарын оролцоотой чуулган болсон.
Тэнд оролцсон олон хүний зүгээс нэг чухал үнэн сонсогдов:
Далай лам бол зөвхөн Түвдийнх биш. Далай лам бол дэлхийнх.
Энэ үгсийг өндөр номтой лам нар маш энгийн даруухнаар хэлсэн л дээ. Тэр үнэхээр Түвдийн соёлоос төрөн гарсан гайхамшигт хүн. Гэвч түүний нөлөө өнөөдөр зөвхөн нэг үндэстэнд хамаарахгүй. Түүний нөлөө дэлхий дахины хэмжээнд хүрсэн.
Түүнийг онцгой болгодог зүйл бол цэвэр ариун сэтгэл, энэрэнгүй байдал ба зөв арга замаар тус хүргэх хосгүй чадвар нь. Энэ нь зөвхөн хувь хүн төдийгүй улс орон, бүс нутаг, дэлхийн улс төрд хүртэл гэрлийг түгээдэг.
Тэр бол энх тайвны элч. Энэ бол хэн хүнд заяадаггүй, ховор хувь тавилан. Маш их эр зориг шаарддаг. Харин Далай ламын хувьд энэхүү өндөр үүргийг бараг 90 жилийн туршид үүрч ирсэн бөгөөд өнөөдөр ч үргэлжлүүлэн биелүүлсээр байна.
Түүний нөлөө хил хязгааргүй. Энэ бол цаг хугацааг давсан, бодит хүн төрөлхтний буян юм.
Хөтлөгч: Далай ламын шавь байснаараа таныг хэрхэн өөрчилсөн гэж боддог вэ? Тухайлсан нандин дурсамжаасаа хуваалцвал?
Ричард Гир: Хамгийн түрүүнд сэтгэлд бууж ирж байгаа дурсамж бол олон жилийн өмнө Бодьгаяад болсон нэгэн айлдвар юм. (Уучлаарай, түрүүнд Дарамсала гэж андуурлаа.) Бодгаяа бол Бурхан Багш Шагжамуни гэгээрэлд хүрсэн ариун газар — тэр гайхамшигт суваргын дэргэд жил бүр Далай лам номын айлдвар айлддаг байв. Тэр үед хэдэн зуун мянган хүн цугларсан байсан.
Тэр өдөр Далай лам өргөн хүрээтэй ном айлдаж байлаа. Айлдварт нь бодь сэтгэл, өөрөөр хэлбэл бодь гэгээрэлд хүрэх сэтгэл хэмээх гүн гүнзгий ойлголтыг хөндөж байв.
Гэтэл тэр “бодь сэтгэл” гэж дуугармагц л гэнэт нулимс дуслуулж эхэлсэн. Хэдэн зуун мянган хүн яг тэр мөчид амьсгаа даран нам гүм болсон.
Тэр нулимсаа арчаад, хэлээ цухуйлган, гараараа хэлэндээ зөөлөн хүрч:
“Би ингэж бодь сэтгэлийн тухай ярьж чадах хэлтэй байгаа нь юутай их аз завшаан бэ!” хэмээн хэлсэн юм.
Тэр мөчид түүнээс цацарч байсан дулаан, хайр энэрэл, энгийн боловч агуу сайхан сэтгэл бид бүгдийг тэтгэж, хайр дүүрэн байлаа. Тэр дулаан сэтгэл хэдэн зуун мянган хүнд яг нэгэн зэрэг хүрсэн юм.
Түүний гэгээрсэн сэтгэлийн гүн гүнзгий байдал, хязгааргүй энэрэл нигүүлсэл, хайр, энх амгалангийн хосгүй оршихуй түүгээр дамжин мэдрэгдэж байсан.
Тэр энэ тухай зөвхөн үгээр хэлэхээс гадна өөрийн амьдарсан, мэдэрсэн, бясалгасан бүхнээрээ бидэнд дамжуулж байв.
Өөрийнх нь хэл — Бодь сэтгэлийн тухай ярих боломж олгодог тэр эгэл эрхтэн хүртэл түүний хувьд талархлын, гүн хүндэтгэлийн билэг тэмдэг байлаа.
---
Хөтлөгч: Түвдийн соёл, Далай ламын сургаалиас дэлхий нийт ямар чухал хичээл, үнэт зүйлсийг сурах ёстой вэ?
Ричард Гир: Альберт Эйнштейн “Ямар нэг гүн ухааны санаа энгийнээр илэрхийлэгдэж чадвал тэр бол Бурханы дуу хоолой” гэж хэлсэн байдаг. Далай лам яг энэ чадвартай — маш нарийн, хэцүү ойлголтыг энгийн, зүрхэнд шууд хүрэхээр илэрхийлдэг.
Түүнээс “Таны шашин юу вэ?” гэж асуухад “Миний шашин бол энэрэнгүй сэтгэл” гэж олонтаа хариулдаг.
Тэр бас “Зөвхөн залбирал дэлхийг өөрчлөх нь эргэлзээтэй. Хэрвээ чи дэлхийг өөрчлөхийг хүсвэл ухаан, нигүүлсэнгүй сэтгэл, ариун сэдэл зорилготойгоор хийх хэрэгтэй” гэж хэлдэг.
---
Хөтлөгч:
Ярилцлагын төгсгөлд нэмэх зүйл байна уу?
Ричард Гир: Энэтхэгийн засгийн газар төдүүгүй Энэтхэгийн ард түмэн Түвдийн дүрвэгсдэд 60 жилийн турш аюулгүй орогнол өгч, гэр нь байж соёлыг нь хадгалж үлдэхэд асар их хувь нэмэр оруулсан. Түвдийн соёл нь 1500 жилийн турш Хималайн цаана нуугдмал байдалд байсан ч Энэтхэгийн ачаар дэлхийд хүрч чадсан.
Түүнчлэн Түвдийн соёлын үндэс угсаа бол Энэтхэгийн соёл, уламжлал, түүхтэй салшгүй холбоотой. Дээрхийн гэгээнтэн бол Наландагийн хүүхэд — тухайн цагийн төдийгүй, магадгүй бүх цаг үеийн хамгийн аугаа их суутан. Түвдийн Буддизм болон тээж яваа соёл нь Наландагаас эхтэй, Энэтхэгээс эхтэй юм.
Тиймээс би чин сэтгэлээсээ — та бүхэнд талархаж байна.
Энэ үгээр энэхүү яриаг төгсгөх нь зүйтэй болов уу. Та бүхэнд дахин нэг удаа баярлалаа.
Хөтлөгч: Үзэгчид маань энэхүү ярианаас гүн сэтгэгдэл авсан байх.
Ричард Гир: Баярлалаа.
Actor-Producer Richard Gere in conversation with WION's Molly Gambhir on his path to Buddhism, the Dalai Lama's legacy and his potential succession, his pro...
