30/05/2026
Ухамсар Хаанаас Эхэлдэг Вэ?
Өнөөдөр буюу 2026.05.30 өдөр манай клубын хамт олон Dream Music сургалтын төвийн эгч нартайгаа хамтран, Улиастай хотынхоо төвд орших "Хутагтын хүрээлэн" орчмыг цэвэрлэх сайн дурын аяныг зохион байгууллаа.
"Хутагтын хүрээлэн" бол манай Улиастай хотын иргэд, хүүхэд залуучууд, ахмад настнуудын салхилж, цагийг зөв боловсон өнгөрүүлдэг газар билээ. Гэвч өнөөдөр биднийг хог цэвэрлэхээр очих үед үнэхээр харамсалтай байлаа. Хот тохижилт үйлчилгээний ах, эгч нар маань сэтгэл зүтгэл гарган тогтмол цэвэрлэгээ хийдэг ч, зарим иргэдийн ухамсаргүй үйлдлээс шалтгаалан тус газар хогондоо дарагдсаар байна.
Цэвэрлэгээ хийх явцад орон нутгийн хүүхэд, залуус болон такси үйлчилгээнд явж буй жолооч нарын хаясан ундааны сав, гялгар уут, тамхины иш маш их байлаа. Хамгийн харамсалтай нь, биднийг уут бариад хог түүж байх яг тэр мөчид ч таксины нэгэн ах татсан тамхиныхаа ишийг машин дотроосоо шууд гадагш шидчихэв. Ахаа, бид энд хог цэвэрлэж байна шүү дээ. Та хогоо буцаагаад аваад хаячихаж болох уу?гэж зүй ёсны шаардлага тавихад бидний шаардлагыг огт тоолгүй, үл хүндэтгэсэн хандлага гаргасаар л…
Тор дүүрэн хог түүхээс илүү, хүмүүсийн сэтгэлгээн дэх энэ "хог"-ийг харах үнэхээр сэтгэл өвтгөм байлаа.
Бусдын хийсэн хөдөлмөрийг үнэлдэггүй, өөрийн амьдарч буй орчиндоо сэтгэл гаргадаггүй энэ мэт ухамсаргүй байдал манай Улиастай хотын хөгжил, соёлыг хойш татсаар байна. Хот тохижилтын ажилчид бидний хаясан хогийг үг дуугүй түүх ёстой "зарц" биш, харин та бидний ая тухтай амьдрах орчныг бүрдүүлж буй баатрууд юм шүү.
Эрхэм жолооч ах эгч нар аа…Машиндаа жижиг хогийн уут эсвэл хайрцаг байрлуулж хэвшээрэй. Таны цонхоор шидсэн ганц тамхины иш, ундааны сав Улиастай хотын маань өнгө үзэмжийг гутааж байна.
Хүүхэд залуус үе тэнгийн найзуудаа Найзуудаараа сууж, цагийг зугаатай өнгөрүүлсэн бол ууж, идсэн зүйлийнхээ хогийг заавал зориулалтын цэгт нь хаяж соёлтой байцгаая🤗🤗.
Өнөөдрийн үйл ажиллагаанд сэтгэл зүрх, цаг заваа зориулан оролцсон Dream music сургалтын төвийн эгч нартаа болон Улиастай хотоо цэвэр цэмцгэр байлгахын тулд өдөр бүр хөдөлмөрлөдөг хот тохижилт үйлчилгээний ах эгч нартаа маш их баярлалаа👏🏻🫂
"Хогийг цэвэрлэдэг биш, хог хаядаггүй ухамсартай иргэн хамгийн соёлтой."
Цэвэр сайхан Улиастай хотынхоо төлөө хүн бүр ухамсартай байж, хогоо хаяхгүй байцгаая! Хандлагаа өөрчилж, Улиастай хотоо хайрлая💚🌱
#ХоггүйУлиастайнТөлөөХамтдаа
#УхамсартайИргэн
