Il-Karmelu Malta

Home
Malta
Santa Venera
Il-Karmelu Malta

Il-Karmelu: perjodiku ta’ kull tliet xhur maħruġ mir-Reliġjużi Karmelitani Maltin b’artikli ● Direttur: P.

Joseph Saliba, O.Carm., Pirjol Provinċjali ● Editur: P. Anthony Cilia, O.Carm. ● Qari tal-provi: Keith Att**d ● Grafika: Fabio Borg ● Direzzjoni u Amministrazzjoni: L-Editur "Il-Karmelu", Kunvent tal-Karmnu, Misraħ Santa Venera, Santa Venera SVR 1681, Malta. ● Email: [email protected] ● Tel: 2754 2106 ● Facebook: Il-Karmelu Malta ● Kull materjal biex jidher f'Il-Karmelu, u kull korrispond

enza oħra, għandhom jintbagħtu lill-Editur bil-posta normali jew bil-posta elettronika. Id-Direzzjoni żżomm id-dritt li tippubblika f'Il-Karmelu dak il-materjal li jaqbel max-xejra tal-perjodiku. ● Abbonament: € 10 fis-Sena jew aktar bħala Sostenitur.

10/06/2026

QARI SPIRITWALI
L-Ittra ta’ San Pawl lill-Filippin (2)
Mons. Ġorġ Frendo, O.P.
Arċisqof Emeritu ta' Tirana-Durres

Qalb waħda u umli bħal Ġesù Kristu (2,1-11)
It-tieni kap tal-Ittra jiftaħ b’eżortazzjoni sabiħa: “Jekk hemm fikom xi faraġ fi Kristu” ‒ παράκλησις, hawn tradotta ‘faraġ’, bnadi oħra ‘tħeġġiġ’, għandha tifsira aktar profonda: tindika azzjoni li tinkoraġġixxi u tħajjar. U ‘fi Kristu’, biex juri l-ispeċjalità ta’ din l-azzjoni. Mela dan il-faraġ jew tħeġġiġ li ġej minn Kristu, flimkien ma’ kliem ta’ ħlewwa fl-imħabba, xirka fl-Ispirtu, ħniena u mogħdrija jwasslu għal “fehma waħda” ‒ il-“qalb waħda u ruħ waħda” ta’ Atti 4,32. U dan hu l-ferħ tal-appostlu, bħala veru missier li jrid jara għaqda vera fost uliedu. Għalhekk iħeġġiġhom ma jagħtux lok għal piki, partiti u ftaħir fieragħ, iżda jkollhom dik l-umiltà li mingħajrha ma hemmx imħabba. Biżżejjed iħarsu lejn Kristu Ġesù (2,1-4). U hawn għandna l-famuż innu Kristoloġiku li jippreżentah bħala għajn ta’ spiritwalità kristjana: “Aħsbu bħalma kien jaħseb Kristu Ġesù” (v. 5).

● Silta mill-“Il-Karmelu”, April-Ġunju 91/2 (2026) p 6-7. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

07/06/2026

QADDISIN
San Bartolo Longo
Nicholas Borg

Il-Malti jgħid: “Għidli ma’ min tagħmilha u ngħidlek x’int.” Nhar il-Ħadd, 19 ta’ Ottubru 2025 il-Papa Ljun XIV iddikjara qaddis lill-Beatu Bartolo Longo. Fost il-veri ħbieb li kellu Bartolo wara li kkonverta, kienu: Caterina Volpicelli, li kienet iddikjarata qaddisa fl-2014, u Giuseppe Moscati, it-tabib famuż Naplitan li kien iddikjarat qaddis fl-1986!

Min kien Bartolo Longo?
Bartolo twieled f’Latiano, fil-Provinċja ta’ Brindisi u Djoċesi ta’ Oria, fl-10 ta’ Frar 1841, it-tieni iben minn ħamest itfal ta’ Bartolomeo Longo u Antonia Luparelli. Kien mgħammed tlett ijiem wara twelidu fil-knisja ta’ Santa Maria della Neve, f’Latiano, u semmewh għal missieru. Kellu karattru fuq tiegħu, ferrieħi u intelliġenti. Fl-età ta’ sitt snin, il-ġenituri bagħtuh fir-Real Collegio Ferdinandeo ta’ Francavilla Fontana, immexxi mill-Patrijiet Scolopi. Hemmhekk issaħħaħ fil-fidi Nisranija u rċieva l-pedament tal-edukazzjoni tiegħu, hekk li sar wieħed mill-aqwa studenti.

Meta fl-1857 temm l-istudji tiegħu, irritorna fi ħdan il-familja. Is-sena ta’ wara beda l-istudji fi Brindisi. Sadanittant talab li jibda jistudja l-Liġi biex isir Avukat. Għalhekk intbagħat f’Lecce. Iżda sabiex jikseb il-Lawrja fil-Liġi f’università rikonoxxuta legalment mir-Renju tal-Italja, li kien għadu kif ifforma, fl-1862 kellu jmur ikompli l-istudji f’Napli. Hawn, minħabba l-kumpanija xejn tajba li kien qabad, Bartolo daħal fi żmien ta’ kriżi reliġjuża. Tbiegħed mill-fidi Nisranija u għal ħames snin kien jieħu sehem fil-laqgħat tas-Satanisti. Minkejja li f’din il-kumpanija ma setax isib paċi f’qalbu, huwa rnexxielu jiggradwa fil-Liġi fit-12 ta’ Diċembru 1864.

● Silta mill-“Il-Karmelu”, April-Ġunju 91/2 (2026) p 24-25. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

04/06/2026

ANNIVERSARJI
San Ġwann tas-Salib
Xhud u gwida għal dawk li qed ifittxu ՚l Alla
P. Joseph Saliba, O.Carm.

Il-mitt sena mill-anniversarju tad-Dottorat ta’ S. Ġwann tas-Salib u t-tliet mitt sena minn meta ġie dikjarat qaddis, hija stedina biex naħsbu u napprezzaw ir-rigal li tana Alla permezz tiegħu u tal-wirt spiritwali, letterarju, filosofiku, psikoloġiku u teoloġiku li ħallielna. Ġwanni jkellem lil kulħadd fuq il-verità ta’ Alla u fuq is-sejħa ta’ kull bniedem. Kull min jaqra kitbietu, jixrob minn tagħlimu. Kull mistiku, bħall-qaddis tagħna, huwa xhieda tal-verità ta’ Alla u għalliem mill-aqwa, li bih il-Vanġelu ta’ Kristu u l-Knisja Kattolika, jiġu milqugħa b’mod tajjeb, ukoll minn nies li jħaddnu reliġjonijiet oħra.

Għalliem fost l-ikbar
Il-Papa, S. Ġwanni Pawlu II, studja fuq il-kitbiet ta’ S. Ġwann tas-Salib u għamel it-teżi tad-dottorat tiegħu fuq it-tagħlim tiegħu dwar il-fidi. F’Ittra Appostolika li kien kiteb fl-okkażjoni tal-erba’ mitt sena mill-mewt tal-qaddis, il-Papa kien qal li, il-fatt li l-Karmelu fittex li jwassal il-messaġġ ta’ S. Ġwann tas-Salib bħala Duttur tal-Knisja, huwa servizz mill-aqwa lill-Knisja.

● Silta mill-“Il-Karmelu”, April-Ġunju 91/2 (2026) p 4-5. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

01/06/2026

SANTWARJI MARJANI
L-Assunta ta’ Aylesford
P. Jürgen Cucciardi, O.Carm.

Illum se nagħtu ħarsa lejn santwarju xi ftit jew wisq differenti, għaliex is-Santwarju tal-Assunta f’Aylesford fl-Ingilterra mhuwiex santwarju kif nafuh b’mod tradizzjonali, imma huwa post ta’ talb u ta’ devozzjoni Marjana.

Il-kunvent ta’ Aylesford, li jinsab max-xatt tax-Xmara Medway f’Kent, huwa post xi ftit jew wisq uniku, kemm minħabba l-ambjent naturali, u wkoll minħabba r-rabta mal-istorja tal-Ordni Karmelitan. L-istorja tiegħu tgħaqqad flimkien diversi aspetti: il-bidu tal-Ordni Karmelitan fl-Ewropa, devozzjoni Marjana, tkeċċija u tiġdid.

Għall-ħabta tas-sena 1242, grupp ta’ reliġjużi Karmelitani, wara t-tkeċċija tagħhom mill-Għolja tal-Karmel fl-Art Imqaddsa fejn beda l-Ordni Karmelitan, waslu fl-Ingilterra. Fit-tfittxija ta’ post fejn jistabbilixxu l-ewwel fondazzjoni tagħhom fl-Ingilterra, huma ngħataw art f’Aylesford mill-Baruni Richard de Grey. Is-sit malajr sar id-dar prinċipali tal-Ordni fl-Ingilterra u kellu rwol importanti. Minn Aylesford, il-Karmelitani xterdu madwar l-Ingilterra.

● Silta mill-“Il-Karmelu”, April-Ġunju 91/2 (2026) p 18-19. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

28/05/2026

MILL-ARKIVJU
Il-Madonna tal-Karmnu fil-poeżija Maltija (2)
P. Hugh A. Mallia, O.Carm.

Is-suġġett tiegħi huwa l-Madonna tal-Karmnu fil-poeżija Maltija. Meta ngħid poeżija nifhem dik il-poeżija li tinkiteb ħierġa mhux biss minn qalb li tħoss u taf tħoss iżda wkoll li tkun maħduma minn moħħ li jaf jaħseb u jtenni bl-isbaħ nisġa ta’ kliem Malti dak li jleħħ ġo fih. Il-Professur Cuschieri għandu deskrizzjoni mill-isbaħ ta’ x’kienet tiswielu l-kitba tal-poeżija:

Kemm ħabbejtu! Kemm ljieli qed ngħaddi
nikteb, naħseb, ingħarbel li ħsibt!
Il-jum żernaq u jien għadni nikteb,
għadni nħassar il-kelma li ktibt;

Għadni ngiddem xofftejja u naħseb,
Għadni ntanbar bis-saba’ l-werrej
Ħa’ l-kliem joħroġ bil-qies u mhux merħi,
Safi u ħelu, magħqud u mexxej.

Għax kif jgħid il-proverbju Latin: ‘Poeta nascitur’, il-poeta jitwieled. Iżda kif ifiehem tant tajjeb K. Vassallo fid-daħla għall-ktieb tiegħu Kwiekeb ta’ Qalbi, il-poeta jitwieled ‘in potentia’ li jsir poeta u mhux poeta mirqum mill-ewwel, jiġifieri, ‘poeta in actu’. Dik li jitwieled biha hija l-lehma poetika li hu, bl-istudju u bit-tħabrik tiegħu u biż-żmien, irid jorqom u jsawwar bis-sengħa li jgħallmuh l-iskola u l-esperjenza. Għalhekk jista’ jiġri, kif mhux darba u tnejn ġara, li min twieled poeta, ma sabx lil min jgħallmu u jfissirlu d-don tal-għaġeb li bih għanieh Alla meta twieled u jispiċċa biex jgħix u jmut ‘poeta in potentia’ biss. Forsi jikteb, imma l-kitba tiegħu, għalkemm imħeġġa minn lehma tajba u minn qalb li tassew taf tħoss ma ssibx imbagħad il-moħħ li jkun tgħallem kif ilibbes il-kelma u jiġrilu bħalma kiteb Thomas Gray fl-‘Elegy’ tiegħu: jibqa’ biss “some mute inglorious Milton”. Kien għalhekk li fejn sibt xi wħud minn din ix-xorta ta’ kittieba tal-poeżija qist li x-xogħol tagħhom huwa poeżija wkoll.

● Silta mill-“Il-Karmelu”, April-Ġunju 91/2 (2026) p 12-13. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

25/05/2026

Kalendarju Karmelitan
25 ta’ Mejju - Santa Marija Maddalena de’ Pazzi
Verġni Karmelitana

Caterina twieldet f’Firenze fl-1566 fil-familja de’ Pazzi, familja influwenti ħafna għal b***a snin. Imrobbija tajjeb, ta’ 16-il sena daħlet fil-monasteru Karmelitan ta’ Santa Maria degli Angeli ġewwa Firenze stess. Bħala novizza ħadet l-isem ta’ Maria Maddalena. F’Mejju 1584 batiet minn marda misterjuża. Fil-ħin li kellha tipprofessa l-voti, kellhom iġorruha quddiem l-artal fis-sodda tagħha. Minn dan il-mument ՚il quddiem kellha tgħaddi mill-esperjenza ta’ mumenti estasi, li baqgħu jseħħu għal ħafna snin. Dawn jinsabu deskritti fil-ħames volumi ta’ manuskritti, xogħol is-sorijiet sħaba li kitbu l-ġesti u l-kliem tagħha f’dawn is-sigħat. Aktar t**d ilħna mis-sema talbuha tmexxi ՚l quddiem “it-tiġdid tal-Knisja” (mibdi mill-Konċilju ta’ Trento bid-digrieti tiegħu), billi tħeġġeġ u twissi lill-membri tal-ġerarkija. Marija Maddalena de’ Pazzi mietet fl-1607 wara marda twila. Kienet ikkanonizzata mill-Papa Klement IX fit-22 ta’ April 1669.

22/05/2026

Kalendarju Karmelitan
22 ta’ Mejju - Santa Ġwakkina de Vedruna
Reliġjuża Karmelitana

Ġwakkina twieldet f’Barċellona fi Spanja fl-1783. Ta’ sittax-il sena żżewġet lil Teodoru de Mas u kellha disat itfal. Meta kien għad għandha tlieta u tletin sena romlot. Għaliha, ir-responsabbiltà tat-tfal tagħha ma kienux biżżejjed! Ġwakkina sabet ukoll il-ħin biex tagħmel xogħol volontarju, l-aktar biex tgħin lil nies fil-bżonn. Kienet temmen li s-segwaċi ta’ Ġesù huma msejħin jimitaw l-eżempju tiegħu. Fl-1826, meta wliedha kibru, Ġwakkina mnebbħa mill-Ispirtu s-Santu, iddeċidiet li twaqqaf Kongregazzjoni tas-Sorijiet Karmelitani tal-Karità, li xerrdet ma’ Katalonja kollha billi fetħet ħafna djar għall-kura tal-morda u għall-edukazzjoni tat-tfal, l-aktar dawk fqar. Kienet tħobb tikkontempla l-misteru tat-Trinità li dawwal il-ħajja tagħha ta’ talb, ta’ ċaħda minn kollox, ta’ umiltà, u ta’ mħabba. Mietet fil-belt ta’ Vich fl-1854. Kienet ibbeatifikata mill-Papa Piju XII fid-19 ta’ Mejju 1940 u kkanonizzata mill-Papa Ġwanni XXIII fit-12 ta’ April 1959.

19/05/2026

RIFLESSJONI
Id-Duluri ta’ Marija
P. Martin D. Schembri, O.Carm.

San Pawl qalilna li t-tbatija tagħna tkompli ma’ “dak li jonqos mit-tbatijiet ta’ Kristu” (Kol 1,24), l-uniku Redentur tagħna. Żgur li l-aqwa dixxiplu tiegħu kienet Marija – Omm il-Kelma u Omm l-Ewkaristija - li kienet ħaġa waħda miegħu tul ħajjitha kollha u b’mod speċjali fix-xhur meta kien fil-ġuf Immakulat tagħha.

Aħna spiss nisimgħu dwar is-Seba’ Duluri ta’ Marija, dawk tradizzjonali: L-ewwel dulur huwa l-profezija ta’ Xmun, meta jgħidilha li sejf għad jinfdilha qalbha; it-tieni dulur ifakkar il-ħarba ta’ Marija u Ġużeppi lejn l-Eġittu biex isalvaw il-ħajja ta’ Ġesù; it-tielet dulur jikkonsisti f’dawk it-tlett ijiem ta’ qtigħ il-qalb meta t-tifel Ġesù baqa’ fit-tempju; ir-raba’ dulur huwa meta l-Madonna ltaqgħet ma’ Ġesù fit-triq lejn il-Kalvarju; il-ħames dulur ta’ Marija huwa meta rat lil binha Ġesù, imsallab u għeri, imut fuq is-salib; is-sitt dulur huwa t-tqegħid ta’ Ġesù mejjet fi ħdanha; is-seba’ dulur huwa d-difna ta’ Ġesù fil-qabar.

Imma f’dan iż-żmien nixtieq li nirriflettu fuq xi mumenti oħra li kienu ta’ dulur għal Marija u li ma tantx nisimgħu bihom.

● Silta mill-“Il-Karmelu”, April-Ġunju 91/2 (2026) p 17.19. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

16/05/2026

Kalendarju Karmelitan
16 ta’ Mejju - San Xmun Stock
Reliġjuż Karmelitan

Illum, aħna u nagħmlu t-tifkira ta’ San Xmun Stock, infaħħru ՚l Alla għall-grazzji kbar li għoġbu jagħti lill-Ordni Karmelitan permezz tiegħu. It-tagħrif dwar il-ħajja ta’ dan Xmun huwa kemxejn skars. X’aktarx li twieled l-Ingilterra u għex fis-seklu 13. Kien magħżul Pirjol Ġenerali tal-Ordni Karmelitan fil-Kapitlu tal-1254 li sar f’Londra fiż-żmien it-tisħib tal-Ordni mal-moviment tal-Mendikanti. Huwa dejjem talab lill-Madonna biex tagħti lill-Ordni sinjal tal-imħabba u l-ħarsien tagħha. San Xmun Stock baqa’ marbut mat-tradizzjoni qaddisa tal-għoti tal-Iskapular mill-Verġni Marija. Miet fis-16 ta’ Mejju 1265 f’Bordeaux fi Franza u baqa’ meqjum għal qdusitu. Ismu kien imniżżel fil-Kalendarju Liturġiku ta’ Orange. Matul is-sekli, pitturi minn madwar id-dinja qalbu l-istorja tal-viżjoni tal-iskapular fi stampi, xogħlijiet tal-arti li jinstabu fil-knejjes Karmelitani kollha tal-Ordni u fi knejjes oħra. Fis-seklu XVI, il-kult ta’ San Xmun Stock kien inkluż fil-kalendarju liturġiku tal-Ordni kollu.

13/05/2026

MARJOLOĠIJA
Il-Verġni Marija Patruna tal-Karmelitani
P. Ivan Scicluna, O.Carm.

Fl-aħħar artiklu f’din ir-rubrika Marjana-Karmelitana rajna li, matul it-tmien mitt sena ta’ storja tal-Ordni Karmelitan, id-devozzjoni tal-Karmelitani lejn Marija għaddiet minn erba’ fażijiet prinċipali. L-ewwel waħda fost dawn l-erba’ fażijiet tkopri s-sekli 13 u 14, u hi kkaratterizzata minn Marija bħala l-Patruna, is-Sidt, tal-Ordni Karmelitan. Il-ħsieb li Marija hija l-Patruna tal-Ordni qanqal fil-Karmelitani l-konvinzjoni li l-Ordni tagħhom twaqqaf sewwasew għall-ġieħ u l-qadi ta’ Marija. Bħala xhieda ta’ din l-atmosfera Marjana fl-ewwel żewġ sekli tal-istorja tal-Ordni tajna ħarsa lejn numru ta’ espressjonijiet misluta mil-liturġija Karmelitana u minn dokumenti oħra medjevali tal-Ordni. Barra dawn ix-xhieda interni għall-Ordni nnifsu però, l-istoriku P. Emanuele Boaga O.Carm. jiġbed l-attenzjoni tagħna wkoll fuq xhieda oħra minn barra l-Ordni li juru li din il-karatteristika Marjana tal-Ordni kienet rikonoxxuta anke minn figuri storiċi importanti li ma kinux Karmelitani. Fosthom insibu ...

● Silta mill-“Il-Karmelu”, April-Ġunju 91/2 (2026) p 2-3. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

Address

Misraħ Santa Venera
Santa Venera
SVR1681

Website

https://fliphtml5.com/bookcase/exfz

Alerts

Be the first to know and let us send you an email when Il-Karmelu Malta posts news and promotions. Your email address will not be used for any other purpose, and you can unsubscribe at any time.

Want your business to be the top-listed Media Company in Santa Venera?