Il-Karmelu Malta

Home
Malta
Santa Venera
Il-Karmelu Malta

Il-Karmelu: perjodiku ta’ kull tliet xhur maħruġ mir-Reliġjużi Karmelitani Maltin b’artikli ● Direttur: P.

Joseph Saliba, O.Carm., Pirjol Provinċjali ● Editur: P. Anthony Cilia, O.Carm. ● Qari tal-provi: Keith Att**d ● Grafika: Fabio Borg ● Direzzjoni u Amministrazzjoni: L-Editur "Il-Karmelu", Kunvent tal-Karmnu, Misraħ Santa Venera, Santa Venera SVR 1681, Malta. ● Email: [email protected] ● Tel: 2754 2106 ● Facebook: Il-Karmelu Malta ● Kull materjal biex jidher f'Il-Karmelu, u kull korrispond

enza oħra, għandhom jintbagħtu lill-Editur bil-posta normali jew bil-posta elettronika. Id-Direzzjoni żżomm id-dritt li tippubblika f'Il-Karmelu dak il-materjal li jaqbel max-xejra tal-perjodiku. ● Abbonament: € 10 fis-Sena jew aktar bħala Sostenitur.

12/08/2026

Kalendarju Karmelitan
12 ta’ Awwissu - Beatu Isidor Bakanja
Martri u Miktub fil-Labtu tal-Karmnu

Isidor Bakanja twieled għall-ħabta tas-sena 1885 f’Bokendela, fil-provinċja attwali ta’ Equateur fil-Kongo. Wara li telaq minn raħal twelidu, mar joqgħod f’Mbandaka fejn tgħammed fis-6 ta’ Mejju 1906 u rċieva l-Griżma tal-Isqof ftit xhur wara fil-25 ta’ Novembru 1906. Isidor kellu devozzjoni kbira lejn il-Verġni Mqaddsa Marija billi ta’ kuljum kien jgħid it-talba tar-Rużarju u jġorr fuqu l-Labtu tal-Karmnu. Minkejja t-tfixkil li ltaqa’ miegħu fuq ix-xogħol għax kien Nisrani, huwa baqa’ sod fil-fidi tiegħu sal-aħħar. Wara sitt xhur ibati f’qiegħ ta’ sodda minħabba s-swat li qala’ għax irrifjuta li jneħħi minn fuqu l-Labtu tal-Madonna tal-Karmnu, huwa miet jaħfer lill-qattiel tiegħu nhar il-15 ta’ Awwissu 1909, fis-Solennità ta’ Sidtna Marija Mtellgħa fis-Sema. Minkejja li kellu biss 24 sena, kien hekk sod fil-fidi tiegħu, li bħal San Pawl kien iħobb jgħid: “Għalija l-ħajja hi Kristu, u l-mewt hi rebħ.” (Fil 1,21). Il-Papa Ġwanni Pawlu II ibbeatifikah fl-24 ta’ April 1994.

09/08/2026

Kalendarju Karmelitan
9 ta’ Awwissu - Santa Tereża Benedetta tas-Salib
Verġni Karmelitana u Ko-Patruna tal-Ewropa

Edith Stein twieldet fit-12 ta’ Ottubru 1891 f’Breslau, fiż-żmien meta din il-belt kienet tifforma parti mill-provinċja ta’ Silesia fil-Ġermanja, illum f’Wroclaw fil-Polonja. Edith kienet il-ħdax-il wild ta’ familja Lhudija. Meta kibret uriet ħila tal-għaġeb fil-Filosofija. Ta’ wieħed u għoxrin sena ddikjarat ruħha atea. Imma fis-sajf tal-1920, waqt li kienet għand ħabiba tagħha, ġie f’idejha l-ktieb “Il-Ħajja ta’ Santa Tereża ta’ Ġesù, Karmelitana” u qratu f’lejl wieħed. Kif spiċċatu qalet: “Din hi l-Verità!” Fittxet li ssir Nisranija u tgħammdet fl-1922. Ħdax-il sena wara daħlet mas-sorijiet Karmelitani Tereżjani ta’ Köln u ħadet l-isem ta’ Tereża Benedetta tas-Salib. Fi żmien il-persekuzzjoni Nazista ntbagħtet fil-Karmelu ta’ Echt fl-Olanda. Imma fit-2 ta’ Awwissu 1942 kienet arrestata u mibgħuta fil-kamp ta’ konċentrament ta’ Auschwitz, fil-Polonja. Fid-9 ta’ Awwissu 1942 qatluha fil-kamra tal-gass. Kienet ibbeatifikata mill-Papa Ġwann Pawlu II fl-1 ta’ Mejju 1987, ikkanonizzata fl-1 ta’ Ottubru 1999 u pproklamata Ko-Patruna tal-Ewropa mill-istess Papa.

07/08/2026

Kalendarju Karmelitan
7 ta’ Awwissu - San Albert ta’ Trapani
Presbiteru Karmelitan

Albertu twieled fis-seklu tlettax fi Trapani, Sqallija. Ta’ età żgħira daħal fl-Ordni Karmelitan fejn wara li lesta l-istudji tiegħu kien ordnat saċerdot. Għall-ħajja tiegħu ta’ għaqda ma’ Alla bit-talb u bis-safa, kif ukoll għall-għerf u l-qdusija tiegħu, kien imfittex ħafna għall-predikazzjoni u għall-mirakli li kien jagħmel. Fl-1296 kien maħtur Provinċjal tal-Karmelitani ta’ Sqallija. Bil-predikazzjoni bla heda tiegħu, ikkonverta ħafna Lhud. Miet f’Messina fis-7 ta’ Awwissu 1307. Fl-1457 il-Papa Kallistu III, b’kunsens verbali ppermetta l-qima tiegħu, li ġiet ikkonfermata mill-Papa Sistu IV b’digriet tal-31 ta’ Mejju 1476. Kien l-ewwel qaddis li kellu kult fl-Ordni, u għalhekk kien meqjus patrun u protettur. Ir-ras ta’ San Albert tinsab meqjuma fil-knisja Karmelitana ta’ Trapani, fejn għadu meqjus bħala l-patrun ta’ dawk li jimirdu bid-deni rqiq. Fl-ikonografija, ħafna drabi, San Albert jidher bil-Bambin Ġesù f’id waħda u f’idu l-oħra l-ktieb jew il-ġilju.

04/08/2026

MILL-ARKIVJU
Il-Madonna tal-Karmnu fil-poeżija Maltija (3)
P. Hugh A. Mallia, O.Carm.

Wara l-Kurunella tal-Karmnu, l-aktar poeżija antika li ġiet f’idejja kienet dik li Giovanni Carabez ippubblika għall-festa tal-Karmnu tal-Belt tal-1897. Carabez kien ħabrieki ħafna fil-qasam tal-kitba, kemm tal-poeżija kif ukoll tal-proża. Kien jikteb f’Il-Ħabib Malti, ġurnal li dam joħroġ sentejn biss (1888-1889). Flimkien mal-poeti l-oħra żgħar, bħal G. Sapiano Lanzon, Dwardu Cachia u M.a. Borg, Carabez kellu xi mertu letterarju bis-sehem li ta bil-poeżiji patrijottiċi u satiriċi tiegħu u bil-ħrejjef li kien jikteb ta’ spiss. Il-kitbiet tagħhom ftit li xejn qatt laħqu l-livell tal-poeżija tal-arti, imma kellhom il-mertu u x-xewqa kbira li jerfgħu l-ilsien Malti għal-livell tal-arti. Meta l-Professur Oliver Friggieri jsemmi l-kitba ta’ Giovanni Carabez isejħilha ‘sforzi semi-letterarji’.

● Silta meħuda mill-“Il-Karmelu”, Lulju-Settembru 91/3 (2026) p 10-11. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

01/08/2026

LECTIO DIVINA
Ġesù ra n-nies u tħassarhom!
It-tkattir tal-ħobż
P. Anthony Cilia, O.Carm.

Talba tal-bidu

● Ibda l-Lectio Divina billi titlob l-għajnuna ta’ Alla ħalli jdawwallek moħħok u jiftaħlek qalbek għall-Kelma tiegħu.

1. Il-Qari (Lectio)

● Aqra b’attenzjoni u b’vuċi li tinstema’ s-silta li ġejja, filwaqt li toqgħod attent għad-dettalji kollha: personaġġi, imġiba, postijiet, ambjent, eċċ.

Mill-Evanġelju skont San Mattew (14,13-21)

F’dak iż-żmien, meta sama’ l-aħbar, Ġesù telaq minn hemm bid-dgħajsa u mar waħdu f’post imwarrab. Imma n-nies semgħu fejn mar, u telqu warajh bil-mixi mill-ibliet. Xħin niżel l-art mid-dgħajsa ra kotra kbira ta’ nies u tħassarhom, u fejqilhom il-morda tagħhom.
Xħin sar filgħaxija d-dixxipli tiegħu resqu lejh u qalulu: “Dan post imwarrab, u l-ħin għamel sewwa. Ibgħathom lin-nies, ħa jmorru fl-irħula jixtru x’jieklu.” Imma Ġesù qalilhom: “Ma għandhomx għalfejn imorru; agħtuhom intom x’jieklu.” U huma qalulu: “Hawn ma għandniex ħlief ħames ħobżiet u żewġ ħutiet.” “Ġibuhomli hawn,” qalilhom. Imbagħad ordna lin-nies biex joqogħdu bilqiegħda fuq il-ħaxix; ħa l-ħames ħobżiet u ż-żewġ ħutiet, rafa’ għajnejh lejn is-sema, bierek, qasam il-ħobżiet u tahom lid-dixxipli, u d-dixxipli newluhom lin-nies.
U kulħadd kiel u xaba’, u ġabru l-bċejjeċ li kien fadal u mlew bihom tnax-il qoffa. U kienu madwar ħamest elef raġel dawk li kielu, barra n-nisa u t-tfal.

2. Il-Meditazzjoni (Meditatio)

a) Biex wieħed jifhem aħjar il-Kelma ta’ Alla

Bil-missjoni u l-predikazzjoni ta’ Ġwanni l-Battista, il-poplu Lhudi għaraf li l-miġja tal-Messija u ż-żmien tas-Saltna ta’ Alla kienu fil-qrib (Mt 3,2). Minħabba f’hekk, fost il-poplu kien hemm stennija kbira. Kien jaf li meta jasal il-Messija, hu kellu jkun bħal xi wieħed mill-profeti l-kbar tat-Testment il-Qadim (Mt 16,14). Għaldaqstant, il-miraklu ta’ Ġesù, tal-ħames ħobżiet u ż-żewġ ħutiet, li permezz tagħhom tema’ dawk l-eluf kollha ta’ nies, kien għalihom sinjal ċar li l-Messija jinsab f’nofshom.

● Silta meħuda mill-“Il-Karmelu”, Lulju-Settembru 91/3 (2026) p 14-16. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

27/07/2026

Kalendarju Karmelitan
27 ta’ Lulju - San Titu Brandsma
Presbiteru u Martri Karmelitan

Twieled f’Bolsward, fl-Olanda fl-1881 u f’żgħożitu ħaddan l-Ordni Karmelitan. Wara li ġie ordnat saċerdot fl-1905, kiseb minn Ruma d-Dottorat fil-Filosofija. Għallem f’għadd ta’ skejjel fl-Olanda u nħatar Professur tal-Filosofija u l-Istorja tal-Mistiċiżmu fl-Università Kattolika ta’ Nijmegen, li tagħha kien ukoll Rettur Manjifiku. Minkejja li kien impenjat f’ħafna xogħol, baqa’ magħruf għax kien isib ħin għal kulħadd. Kien ġurnalist professjonali u fl-1935 inħatar kunsillier ekkleżjastiku għall-ġurnalisti Kattoliċi. Kemm qabel u kemm wara l-okkupazzjoni Nazista tal-Olanda, tqabad b’fedeltà għall-Evanġelju kontra t-tixrid tal-ideoloġija Nazista u għal-libertà tal-edukazzjoni u l-istampa Kattolika. Minħabba f’hekk arrestawh. Għadda minn ħabs għal ieħor u minn żewġ kampijiet ta’ konċentrament, sa ma fl-1942, wara ħafna tbatija u tkasbir, qatluh f’Dachau. Sal-aħħar ta’ ħajtu ma hediex inissel faraġ u sliem fi sħabu l-priġunieri u jagħmel il-ġid imqar lil dawk li kienu jaħqruh. Il-Papa Ġwanni Pawlu II iddikjarah Beatu nhar it-3 ta’ Novembru 1985. Kien dikjarat Qaddis mill-Papa Franġisku nhar il-15 ta’ Mejju 2022.

26/07/2026

Kalendarju Karmelitan
26 ta’ Lulju - Sant’Anna u San Ġwakkin
Protetturi Sekondarji tal-Ordni Karmelitan

Anna u Ġwakkin huma l-ġenituri tal-Verġni Marija. Ġwakkin kien ragħaj joqgħod f’Ġerusalemm, qassis anzjan miżżewweġ lil Anna. It-tnejn li huma ma kellhomx tfal u kienu mdaħħlin fiż-żmien. Darba waħda, waqt li Ġwakkin kien qiegħed jaħdem fl-għalqa, dehru anġlu u ħabbarlu li kien se jkollu tarbija. Hekk ukoll Anna kellha l-istess dehra. Huma semmew it-tarbija Marija, li jfisser ‘Maħbuba minn Alla’. Ġwakkin mar fit-tempju u flimkien mat-tifla ċkejkna, ħa miegħu għaxart iħrief, tnax-il għoġol u mitt gidien bla tebgħa. Iktar t**d Ġwakkin ħa lil Marija fit-tempju biex tkun edukata skont il-liġi ta’ Mosè. Dan it-tagħrif dwarhom jinsab fil-ktieb apokrifu li jġib l-isem “Il-Proto-Evanġelju ta’ Ġakbu” miktub fis-seklu II. Il-qima lejn Sant'Anna nsibuha dokumentata fil-Lvant fis-seklu VI u fil-Punent fis-seklu X, filwaqt li dik lejn San Ġwakkin fis-seklu XIV.
L-Ordni Karmelitan jiċċelebra b’devozzjoni lil Sant’Anna u San Ġwakkin, il-ġenituri ta’ Marija, il-Patruna Prinċipali tiegħu, bħala protetturi sekondarji għax fihom jara espressjoni l-aktar ħajja u ġenwina tal-kariżma u l-ispiritwalità li jħaddan.

24/07/2026

Kalendarju Karmelitan
24 ta’ Lulju - Beatu Ġwanni Soreth
Presbiteru Karmelitan

Il-Beatu Ġwanni Soreth twieled f’Caen fin-Normandija, fi Franza, fl-1394. Fl-età żagħżugħa daħal fl-Ordni Karmelitan u kien ordnat saċerdot qrib is-sena 1417. Kiseb il-lawrja fit-Teoloġija mill-Università ta’ Pariġi u kien maħtur Reġġent tal-Istudji. Aktar t**d kien magħżul Provinċjal u mill-1451 sal-mewt tiegħu, Pirjol Ġenerali tal-Ordni Karmelitan. Ħadem u saħaq ħafna fuq l-osservanza tar-Regola u sabiex jirriforma l-istess Ordni. Fisser b’ħila kbira r-Regola fil-kitba tiegħu bit-titlu “Expositio paraenetica”. Kien strumentali fit-twaqqif uffiċjali tas-Sorijiet Klawstrali u tat-Terz’Ordni Karmelitan, speċjalment bis-saħħa tal-bolla “Cum nulla” tal-Papa Nikol V fl-1452. Fl-1462 ippubblika l-Kostituzzjonijiet il-ġodda għall-Ordni kollu. Ġwanni miet f’Angers fil-25 ta’ Lulju 1471. Il-qima lejh bħala beatu, kienet magħrufa uffiċjalment mill-Papa Piju IX fl-1866. Fl-ikonografija, ħafna drabi, tippreżenta lill-Beatu Soreth b’pissidi f’idejh, b’tifkira tal-ġrajja li seħħet f’Liège, fil-Belġju, meta d-Duka ta’ Borgonja u sħabu, waqt il-ħerba li għamlu fil-belt, Ġwann Soreth, bla ma beża, ħareġ jiġbor l-Ostji kkonsagrati li kienu xerrdu fit-toroq b’disprezz lejn l-Ewkaristija.

22/07/2026

STORJA
Il-kamp tal-konċentrament ta’ Dachau
Fr Charles Buttigieg

Fil-15 ta’ Settembru 1935, Adolf Hi**er għadda diversi liġijiet kontra l-Lhud li kienu jgħixu fil-Ġermanja, fejn fost l-oħrajn ċaħħadhom miċ-ċittadinanza Ġermaniża li kellhom. Fil-lejl ta’ bejn id-9 u l-10 ta’ Novembru 1938, magħruf bħala ‘Kristallnacht’ (Il-Lejl tal-Ħġieġ Imkisser), in-Nażi kissru t-twieqi u qerdu l-proprjetajiet tal-Lhud, flimkien ma’ 7,500 ħanut Lhudi u 267 sinagoga, u hekk ħafna reġjuni ġew dikjarati ‘Judenfrei’ (Meħlusa) u ‘Judenrein’ (Imnaddfin) mil-Lhud. Dakinhar, madwar 10,000 Lhudi ntbagħtu fil-kamp ta’ konċentrament ta’ Dachau.

Fit-Tieni Gwerra Dinjija, li seħħet bejn l-1939 u l-1945, Hi**er kien responsabbli għall-ġenoċidju ta’ madwar 6,000,000 Lhudi. Miljun u nofs minnhom kienu tfal ċkejknin u innoċenti. Ma’ dawn is-sitt miljun Lhudi, Hi**er qatel ukoll miljuni oħra ta’ nies li kienu ta’ reliġjonijiet differenti. F’dak iż-żmien, il-Ġermanja kellha diversi kampijiet ta’ konċentrament imxerrda mal-Ewropa. F’dawn il-kampijiet saru kull forma ta’ tortura fiżika u psikoloġika, u nqatlu miljuni ta’ bnedmin innoċenti. B’kollox 20,000,000 ruħ għaddew minn dawn il-kampijiet. Vittmi ta’ dawn il-postijiet tal-biża’ kienu wkoll ħafna saċerdoti u reliġjużi rġiel u nisa.

● Silta meħuda mill-“Il-Karmelu”, Lulju-Settembru 91/3 (2026) p 20-21. Jekk tixtieq tkompli taqra dan l-artiklu, abbona f’“Il-Karmelu”. B’10€ tkun tista’ taqra l-artikli kollha ta’ sena sħiħa. Ibgħat ismek u l-indirizz tiegħek flimkien mal-ħlas lill-Editur “Il-Karmelu”, Kunvent tal-Karmelitani, Misraħ Santa Venera, Santa Venera SVR 1681.

20/07/2026

Kalendarju Karmelitan
20 ta’ Lulju - San Elija
Profeta u Missier il-Karmelitani

Elija, li ismu jfisser ‘Alla tiegħi huwa Jaħweh’, twieled fir-raħal ta’ Tisbi lejn tmiem is-seklu 10 qK, u għex fi żmien is-Sultan Aħab, li kien daħħal f’Iżrael il-qima lejn alla Bagħal. Il-profeta Elija deher quddiem is-Sultan Aħab biex iħabbarlu tlitt snin ta’ nixfa bħala kastig. Meta għaddew it-tlitt snin, Elija reġa’ lura għand is-Sultan, u biex jurih l-inkapaċità tal-idoli tiegħu, nieda l-isfida fuq l-Għolja tal-Karmelu kontra l-400 profeta ta’ Bagħal. Għat-talb tiegħu Jaħweh bagħat in-nar u x-xita. Imma Elija beża’ mir-rabja ta’ Ġeżabel, mart Aħab u s-segwaċi ta’ alla Bagħal. B’qalbu ttaqtaq, talab lil Alla biex jibgħatlu l-mewt. Imma wara li anġlu ġablu l-ikel, fuq il-Ħoreb deherlu Alla fid-daħla tal-għar. Il-profeta msaħħaħ mill-kelma ta’ Alla, reġa’ lura fost il-poplu tiegħu, u dilek lil Eliżew profeta minfloku. Il-profeta Elija miet b’mod misterjuż madwar is-sena 850 qK, bl-ispirtu tiegħu meħud fis-sema b’karru tan-nar. L-ewwel irħieb, li fis-seklu tlettax inġabru fuq l-Għolja tal-Karmelu, imxew fuq it-tradizzjoni monastika u filwaqt li ħarsu lejn dan il-Profeta, fasslu ħajjithom fuq tiegħu flimkien mal-qima speċjali lejn Omm Alla.

Address

Misraħ Santa Venera
Santa Venera
SVR1681

Website

https://fliphtml5.com/bookcase/exfz

Alerts

Be the first to know and let us send you an email when Il-Karmelu Malta posts news and promotions. Your email address will not be used for any other purpose, and you can unsubscribe at any time.

Want your business to be the top-listed Media Company in Santa Venera?