26/10/2025
Akhristu mu Mpingo waKatolika awapemphedwa kukhala odzikhuthura kwathunthu kwa Mulungu m'moyo wawo pamavuto komanso pamtendere potengera moyo wa Yohane Paulo wachiwiri woyera.
Bambo mfumu a parishi ya Chitedze, bambo Frank Phiri ndi omwe anena izi laMulungu pa 26 October pa mwambo womwe parishiyi imakumbukira nkhoswe yawo Yohane Paulo wachiwiri woyera mu Arkidayosizi ya Lilongwe.
Bambo Frank ati moyo wa akhristu ukhale wa umishonale kwa anthu onse amene safuna kumva mau a Mulungu achikondi, chilungamo ndi mtendere mosaopa kanthu.
Iwo ati akhristu onse atapereka moyo wawo wonse mu utumiki wa Mulungu, dziko lapansi likhoza k*tembenuka ndi kukhala ndi moyo weniweni mwa Mulungu.
"Papa Yohane Paulo wachiwiri woyera adapilira atataya okondeka ake komanso ali kudwala ngati Papa ankachitabe nsembe ya Misa ndi kupempherera dziko lapansi. Yohane Paulo wachiwiri woyerayu adafalitsa Uthenga wa Mulungu ngati Paulo woyera potsatira mlozo wake wa upapa 'Ine ndense wanu', choncho aliyense akuyenera kufalitsa Uthenga wa Mulungu nthawi zonse," atero bambo Phiri.
Mmawu ake, mlembi wa parishiyi a Monica Joseph ati ndi okondwa k*ti nkhoswe yawo Yohane Paulo wachiwiri woyera akuwaphunzitsa kugwira ntchito molimbikira potukula Mpingo mu magawo onse.
"Kudzera mmoyo wa nkhoswe ya parishi yathuyi, tikuyenera kufalitsa Uthenga wabwino ponseponse, kugwira ntchito zachifundo kuphatikizapo kulimbikira kugwira ntchito modzipereka potukula parishi yathu komanso Mpingo wonse wa Katolika," anatero a Monica.
Papa Yohane Paulo wachiwiri yemwe adabadwa pa 18 May 1920 ngati Karol Jozef Wojtyla mdziko la Poland ndipo adamwalira pa 2 April mchaka cha 2005, adasankhidwa kukhala woyera m'chaka cha 2014 ndi Papa Francis ndipo chaka chake chimakumbukiridwa pa 22 October chaka chilichonse.
Wolemba ndi Alex Nasono
