Chirundu FM

Chirundu FM Nkhata Bay Community Radio

Timu ya Chintheche United yatuwa mu nkhombu ya NBS National Division league yati yakwechulika musanawale ndi timu ya F...
11/01/2026


Timu ya Chintheche United yatuwa mu nkhombu ya NBS National Division league yati yakwechulika musanawale ndi timu ya FOMO ndi vigoli vitatu ku kanthu cha pa liwuwa la Rumphi.

Mc Phen Mdolo, Chitsazo Saidi ndi Grey Thomas ndiwu wahonese timu ya FOMO kupangisa kuti Chintheche United ije timu ya chitatu kutuliya kunu ku nkhondi kutuwa mu nkhombu iyi kulondo matimu nga Jenda United ndi Chilumba Barracks ngo ngakutuwa kali.

Mo vajaliya apa ndikwesa timu ya Ntaja United, yo yalimbananga ukongwa mundewu yakutuwa munkhombu iyi, yajaliya.

Inyaki mwatimu yoso yatuwa ndi timu ya Mchinji Villa.

Mo vajaliya apa ndikwesa timu ya Chintheche United ikatchayanga nkhombu ya Mbelwa Northern Region Football league kwamba chilimika chinu.

Nkhombu ya NBS National Division league, ikujalikisika ndi Football Association of Malawi, kuja nthowa yakuselele mu TNM Super league ndipu matimu nga Baka City, Mitundu Baptist kweniso Red Lions ndingu ngaja ngakwamba kusele mu nkhombu ikulu iyi chilimika chinu.

Wakulemba: Owen Vitumbiko Mwanyongo.

Mupupuka wakwendesa njinga ya motu mu boma la Nkhata Bay wapwetekeka ukongwa kutole ndi ngozi yo waganyana ndi motokal...
10/01/2026


Mupupuka wakwendesa njinga ya motu mu boma la Nkhata Bay wapwetekeka ukongwa kutole ndi ngozi yo waganyana ndi motokala pafupi ndi Nkhata Bay Chintheche Turn Off mu boma ili.

Wanthu wo wawona ngozi iyi ichichitika wati mpupuka uyu wapenjanga wajumphi motokala yo yenga pa nthazi p**i vyo vapangisa kuti wakakumani ndi inyaki kunthazi kwaki.

Wanthu wo takumana nawu pa malu agha wati ndimo mpupuka uyu wapwetekeke wakhumbika chovyu cha nthazi cha chipatala kweniso marombu kwaku Chiuta.

Tikupasiyeningi vinandi va ngozi iyi asani wapolisi wadapu mulomu kukwasana ndi zina kweniso nambala ya njinga iyi, po sonu motokala ndi njinga waluta navu ku polisi ndipu mpupuka uyu waluta nayu kuchipatala.

Wakulemba: Felix Kamanga

Komiti yakwendesa bola la malundi mu boma la Nkhata Bay yati chilimika cha masaza cha 2025/2026 muboma la Nkhata Bay c...
09/01/2026


Komiti yakwendesa bola la malundi mu boma la Nkhata Bay yati chilimika cha masaza cha 2025/2026 muboma la Nkhata Bay chawa ndi vyamampha kweniso viheni mukati mwaki.

Mulembi wa komiti ya Nkhata Bay District Football, Wilson Ngwira wati kurwandi lakuyenda umampha cha, nkhombu ya Castel Challenge cup ndiyu yakumana ndi nkhuta po mwaja muchichitika ndewu zinandi vyo vinguchitisa kuti kuje milandu ikuluyikulu ku komiti yo kwenga kakwamba kwendesa masaza anga.

Iwu wati nkhombu ya National Bank Under 23 yayenda umampha chifukwa pengavi milandu ikuluyikulu yo inguchitika. Iyu watamulaso kuti komiti yawu ikajanga pasi ndikupenja chovyu cho chingapangisa kuti waje ndi nkhombu zinandi mu boma ili kuleka kugomeza za Football Association of Malawi pe.

Mumazgu ngaki, nkhwantha pa makani nga masaza Billy Mphande wati komiti iyi itenere kunoza masuzu ngo wasanilana nangu kweniso kuwikapu mutima pa kusakata makopala ngo wangajalikisiya nkhombu zapade zinyaki.

Pankhombu ziwi zo zatchayika muchilimika cha 2025/2026, timu ya Home Sweepers ndiyu ikuto nkhombu ya Castel Challenge cup po Brazil Vuwa ikuto nkhombu ya National Bank Under 23.

Wakulemba: Owen Vitumbiko Mwanyongo

Wupu wa Malawi National Youth in politics wati kusambiza wamupupuka za Ndale M'maja ChatBot ndi nthowa imoza yakuwanoz...
09/01/2026


Wupu wa Malawi National Youth in politics wati kusambiza wamupupuka za Ndale M'maja ChatBot ndi nthowa imoza yakuwanozekese wamupupuka pa ndali.

Mukupanikiziya makani agha mulongozi wa Malawi National Youth in Politics, Raymundo Magangani wati Chat bot iyi yenge sukulu weni ukongwa pakusambiza wampupuka wo wapenja kuzipanga vya ndali.

Ndale M'manja itovyeka ndi ma wupu ngeti CIVICUS, World Alliance for Citizen Participation kuzumbuwa waka wamanavi.

Pikicha: Raymundo Magangani

Wakulemba: Aubrey kaima

Wupu waziliska wamakasopi ghakulekana lekana mu boma la Nkhata Bay wawovya chiwalu chakusunga vizizimu (mortuary) pa ...
08/01/2026


Wupu waziliska wamakasopi ghakulekana lekana mu boma la Nkhata Bay wawovya chiwalu chakusunga vizizimu (mortuary) pa chipatala chikulu chamu boma la Nkhata Bay ndi mipandu yo ikatatawuwanga masugzu ngo wakumananga nangu.

Chitengu cha wupu uwu, William Mguvu Phiri wati wupu wawu waghanaghana zakuwovya ku mortuary wati wawona kusoweke kwa mipandu ku chiwalu ichi.

Phiri wati wupu wawu wasewezese makopala pafufupi K600,000. pakugula katundu uyu ndipu wendi maghanaghanu ngakovyaso chipatala cha Chintheche ndi vipatala vinyaki vimanavimana mu boma ili.

"Pe vinthu vinandi vyo chipatala chisoweke ndipu chovyu chidu chingaziwa kusintha vinthu" wakamba viyo Phiri.

Dokotala mula wakuwona za munkhwala pachipatala chikulu chamu boma la Nkhata Bay, Alicy Khonje wati chovyu ichi chikamazganga sugzu lo lengapu lakusowa pakuja wanthu asani waza kuzito maliwavu ngazibali wawu ndipu wapempha wakukhumba kwamampha kuwovya chipatala ichi pa masuzu nganyaki.

Mulendu wakutumbikika pa nkholi iyi, Sub T/A Kamwadi wo wanguza mumalu mwa Senior Chief Mkumbira wati waliska wachita vinthu vapachanya ukongwa pakuwovyapu pa ili pakutole kuti wanthu wanandi waluwa kuti ndi chimoza mwa vigawa vakukhumbikiya ukongwa pa chipatala chechosi.

Wakulemba: Francisco Mwanza

08/01/2026


Apolisi mu boma la Nkhata Bay wapenjapenja munthu yo wabaya Musanda Manda wavilimika 41 yo wawanikikanga kuti Buju ndipu wenga ndi nthenda yamu wongu.

Mwakuyana ndi wachiwi ku mukambi wa polisi ya Nkhata Bay, Devoter Mithi wati liwavu laku Manda lasanilika usiku wapa 7 Januwale layamba kunangika pafupi ndi sukulu ya Nkhata Bay technical College.

Kupenjele kwakwambiliya kwa polisi kwawonesa kuti wakufwa uyu wagonanga ndi munyaki yo nayu mutu waki wendi sugzu ghakaghanaghaniru ndipu nyengu zinandi waja wachiyambana pa vifukwa vawu.

Apolisi pasonu panu waghanaghaniya munyaki uyu ndipu wemukati mwakumupenja kuti asani wakoleka waluti nayu ku kuchipatala chakuwona za matenda gha muwongu pakutole kuti wapereka chofyu ku wanthu kweniso kwaku iyu yija.

Chipondi Manda watuliyanga mumuzi mwa Zamandele, Senior Chief Mkumbira mu boma la Nkhata Bay.

Wakulemba: Beatrice Njikho

07/01/2026

APPEAL FOR FINANCIAL ASSISTANCE

Chintheche United is reaching out to well-wishers for financial support as the team prepares to take on Fomo this Sunday at Rumphi Stadium. This game is crucial for the team's success.

Details for Sending Assistance

.

Chintheche united F. C
Acc 1620000198279
Fdh Nkhata bay branch

Stainely Nyirongo-0995418091

UTHENGA WAKUPEMPHA CHOVYU.

Timu ya Chintheche United yo itchaya mu nkhombu ya NBS National Division one ipempha chovyu cha makopala po ilindizika kutchaya masaza ngaki nga umaliru ndi timu ya Fomo pa Rumphi Stadium pa Sabata apa.

Wanthu wakukhumba kwamampha wangatumiza chovyu chawu uku:

ya timu ya ku banki!

Chintheche united f.c.
Acc 1620000198279
FDH Nkhata Bay Branch

Stainely Nyirongo Treasurer-0995418091

06/01/2026


Apolisi mu boma la Nkhata Bay wapenjapenja munthu yo watimughanaghaniya kuti wakubaya Wilson Banda wavilimika 27 wa m'chigawa cha Chibunya TA Fukamapiri usiku wa pa 4 kufika 5 Januwale ku Chintheche.

Pakulongolo ndi Chirundu Online, mukambi wa polisi ya Nkhata Bay, Enala Kalua wati Banda wajanga yija chifukwa cha vakuchitika vaki vamphuvya vyo vwchitisanga abali waki watondekanga kujanayu nyumba imoza.

Kalua wati pa 5 Januwale nyengu ya 06:30 mulenji apapi waki wanguluta kunyumba kwaki kweni wangumusaniyacha vyo vingupangisa wayambi kupenja ndikumusaniya kuti wamangika pachimiti chayembi ndi waya kweniso wendi vilonda kumutu ndipu wanguchimangala ku polisi yapa Chintheche.

Vakupenjele vya chipatala, valongo kuti chochikumutole kunthumbu yachalu Wilson Banda ndikupwetekeka ukongwa kweniso kutaya ndopa zinandi.

Wakulemba: Beatrice njikho

MP waku mphala ya malangu waku Nkhata Bay West, Paulos Kapangama Chiumia wati wakaonesesanga kuti mu nyengu yaki sukul...
06/01/2026


MP waku mphala ya malangu waku Nkhata Bay West, Paulos Kapangama Chiumia wati wakaonesesanga kuti mu nyengu yaki sukulu za Lifupa kweniso Kadele pazengeka nyumba zakusambiliyamu zamampha.

Chiumia wati ntchakudinginyikisa kuti kutuwa mu chilimika cha 1974 po sukulu ya Lifupa, kweniso 1994 po sukulu ya Kadele zikuyambiya wana wechali kusambiliya mu vigongwi vakwesa kujintha kweniso kuyewa ndi uteka.

Iwu wati pade pakuti ku malu agha kwaja kuchilongozeka ndi wanthu wakulekana lekana palivi chakuzenga chakulongoleka cho chingasanilika pa sukulu ziwi izi vyo wati vitimbanyiza masambiru nga wana pade pakwenda mitunda itali itali.

Mkulutiliya a Chiumia wati nakana kuti mu nyengu yakunyengezele wanthu wanguyesa kwamba kuzenga nyumba yakusambiliyamu pa sukulu ya Lifupa yo yawa kundololosa vuwa yanthazi yo yanya mu sabata yajumpha.

Wakulemba: Peter Mayazi.

Yumoza mwakuwo wanguphalizana nawu ngeti mulongozi wachalu pa 16 Seputemba, Milward Tobias wapempha alongozi muma Cons...
06/01/2026


Yumoza mwakuwo wanguphalizana nawu ngeti mulongozi wachalu pa 16 Seputemba, Milward Tobias wapempha alongozi muma Constituency kuseweze umampha makopala ngo boma likapelekanga nga chitukuku.

Milward Tobias wanene Chirundu Online kuti kujalikisika kwa vitukuku muchigawa kutole ndondomeka zakwenele zo Village Development Committee (VDC) pamoza ndi Area development committee (ADC) wangaziwa kujalikisa pakukhumba kuwonesesa kuti makopala gha CDF ngayendi mwa dangu.

Mukulutiliya Tobias wati kulekana pa ndali vileki kutimbanizya zamo makopala agha ghakasewezekiyanga pa vitukuku mwaviyo wapempha adindu kweniso alongozi kuwa pamoza pa makani gha chitukuku.

Boma likhazika kupeleka makopala ghakukwana 5 billion kwacha mu Constituency yeyosi ghakusuweze pa chitukuku.

Wakulemba: Jason Banda

Musambizi wa timu ya Brazil Vuwa, Empraim Manda wati timu yawu itondeka kutorwandi munkhombu yakujalikisika ndi wupu w...
06/01/2026


Musambizi wa timu ya Brazil Vuwa, Empraim Manda wati timu yawu itondeka kutorwandi munkhombu yakujalikisika ndi wupu wa FAM muboma la Nkhata Bay chifukwa chakambilu kaheni mu boma ili.

Manda walongolo makani agha pa umaliru wa masaza ngo wadupuwa Chitundu 2 ku 1 kuti wato nkhombu ya National Bank Under 23 pa liwuwa la sukulu ya pulayimale ya Mkondezi ku umaliru wa Sabata yamala.

Iwu wati kambilu ka wakumbiya bola la malundi kapeleka mphwayi ndikuweze muvuli matimu ngamutalimutali mo mwe malusu nganandi.

Chinangauli wangudinginyika ndi wakumbiya, Manda walunguchizaso matimu nganyaki kutonga rwandi mu nkhombu za pasi pa wupu wa Football Association of Malawi (FAM).

Mukumukamu, mulembi wa komiti ya wakumbiya bola muboma la Nkhata Bay, Mac Nells Gausi wati wangakana cha za makani agha chifukwa pe wakumbiya wanyaki wo wathawa kulondo malangu ngafya kweniso kuto rwandi mu mayesu nga wakumbiya ku Mzuzu.

Mwezi iwi yajumphayo, wupu wa Football Association of Malawi unguchitisa visanbizu va wakumbiya wakwamba waka vyo mwa wakumbiya 69 wo wangulembesa, wakumbiya 23 pe ndiwu wanguto rwandi pa visanbizu ivi.

📷Mac Nells Gausi, mulembi wa komiti ya wakumbiya bola la malundi muboma la Nkhata (pakati) Kuma limoza ndi wanyawu kweniso walongozi wakutchaya bola wa Brazil Vuwa ndi Chitundu.

Wakulemba: Owen Vitumbiko Mwanyongo.

Address

Box 14
Nkhata Bay

Telephone

+265990022612

Website

Alerts

Be the first to know and let us send you an email when Chirundu FM posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Chirundu FM:

Shortcuts

Share

Category