inik Manang dara imun

inik Manang dara imun selamat Datai page ini manang dara imun,tau mega menuai ngagai ruai ini iya nya YT ini Manang dara imun

26/02/2025

PEMENCHI

Nadai ga aku kala' ngasaika diri lebih ari urang bukai bela' bekeradai begigaka pemakai nadai berasai ngembuan Tinchin Ajih Tekang Gemala Lintan Sega'. Enti semina ketegal Sampau aku luba gerah endur Empurau betumba nadai meh nya' ngasuh sida begedi menyati enda peiga-iga. Tang nya' ketegal tulang aku enda pungkang meranggang benchuk tulang belakang ngerembang madang Kelindang jarai tawas buya' repa'. Laban aku ngasaika diri purih urang merinsa mensena nyabung buku' siku tangkup patung mutik igi jereki ngusaika tembung tipan reba'.

Enda mega' aku kala' rangka' kengka utaika bisi diayanka aku magang dikena betunga nguan ruai pelandai panjai gelegar betingka'. Nadai sekali meh aku ngadang diri dipenyati ngeraya nya' ngenangka jaku sida ti suah beambu diri menyadi besumpah mali bula'. Nemu nya' mulut sida suah dibalut linut asi Pulut maia betunga tang dibelakang suah mila' Bunyam Subung Kancha'. Nadai ko enggau meh tuan kita' ga kempang ngaga' baka nya' amat meh aku enda mungkal mali nanjal ni ko kita' aja.

Enti sema' ruang bilik aku layu baka Kantuk Rampu kepung ba akar pagila lusa anang enda kita' ngandak beraban ketawa'. Tang enti Petara benung malik ka mua kira puntan aja meh juluk ati kita' ti deka' meda aku merinsa. Ingat kita' buat amat pan Raung lembau angkat tang iya luba mega' bekalih Ribih tali Ma'. Ini Andan Petara Rentang enda kala' belelak ngelelapka leka mata nyambut tengap mensia anak uda pansut bedara'.

👉 Leka turai ungkup siku madi ti ngasuh aku nampung sada ati iya ti dipenyati urang enggau pemenchi ba Messenger. Ngarapka Petara malik ka mua ngagai tudah tuai ngambika ruang bilik iya tegut baka bukit berambun gadung.

Sinu macha.
25/02/2025

Sinu macha.

PUANG

Puang aku apai nadai palan penepan manggaika suran Papan Turai. Puang aku indai nadai Keban endur besimpan ruman Rumput Rubai. Seduai ga udah lelang puntan semaia balang ngejang enda besemaia ngelanggur pulai. Teleba aku enda kala' nyepi penyamai meruan apai indai baka urang bukai ari mit nyentuk ka besai.

Enda aku minta maioh ba seduai ti berupai enggai mangku begadai ngenyut selemai. Chukup meh ngaga' ka aku Surat Pengada nyadika tungkat niti laluh ari kala' ka agi idup bedau sulai. Aki seduai ini mesa' endur aja seduai pulai ngelawa' Batang Mandai ketegal tuai enda bepengerai. Ba seduai iya meh endur aku ngelempaika Selampai Tawil luya' dikena ngambat ai mata ti semampai tebelunggang labuh bekeberai.

Enda aku minta' seduai pulai enti sema' aku pagila lusa bisi sentika' sereta menawa' laya sulai. Chukup meh nungkun Dian dikena nenggau pejalai tudah aku ti niti Andau T**i Rawan mali pulai. Anang meh seduai nyabak nangika semengat aku berasai sinu buji ba dunya suah merinsa berebah rimpai. Terima kasih ngagai seduai ti udah kiruh meri nyawa bebagi awak meda dunya tajapan kitai tiga enda kala begulai, mupuk aku apai, dulu aku indai.

👉 Leka turai penyinu ati ti dipinta' siku menyadi ba Messenger ngenang pemerinsa pengidup diri. Iya minta' aku ngaga ka iya leka sebana penyinu ati. Tudah tuai nadai apai indai ketegal apai seduai indai iya ti belaki bebini baru enda kala' pulai. Sinu ninga sebana madi kitai siku tu bejerita ngenang pengidup diri, tudah tuai mega' enda bangat dapat nadai ditemu batang penyakit. Aki seduai ini iya pan nyau tuai enda dapat gawa' agi, apai seduai indai iya nadai ditemu rita, agi idup tauka udah parai, chukup sinu.

15/01/2025

MENANTU NGUGI (Indu)

Ukai aku tama' ngapa ensuruk pia' aja nyemilik kita', tang meh aku diambi enggau Adat sereta basa ninggalka bilik penaik diri nyadika kaling nuan bini sereta menantu asie belama. Pia' meh kenu ko sagam ati aku suba asie enda nemu nya' semina kenyap ngelelapka leka mata siang ari raya. Tama' aku bilik kita' asaika tama' Tibang puang ditepuka aku kambut penyayau tang meh suah tebelunggang baka kambut enda tegut tanchang. Bebela ba dapur kediri-iri asaika nyadi Ama ba bilik bala Raja beberita kaya tebilang nyegang.

Enda aku bangat bekira gawa' ngintu bilik penaik laban ti sigi udah pengawa diri berintu bebela. Tang meh anang kelalu ga semina ngemataka tudah aku aja baka ti ngemataka Antu Gerasi Papa ngunyah anak mensia. Enda aku bangat minta dipebasaka kita' sebilik baka nunggah bala Petara nurun ari langit enda datai juluk Laja' Sumpit. Chukup meh enggau aku besaup ngintu bilik penaik betepaska keresik bekau latak tekang tanah bau lang umbau endur beselumbit.

Enda aku bangat nakal nyau baka ka kampar pejalai tejanggal baka penganyut agang remu batang tepanggai ba anchau jugu batu kerangan besai. Enti ati aku udah enda ulih diperekas ngena rambal kulit Tekalung, pandak iyaka udah panjai iyaka empai wai ambai. Enda aku bangat ngenyadika randau ti malut Punggu alai bepaut bekeradai nyemeraika seberai. Mesa' endur aja aku tau papa ngapa ditingggang Punggu ragai dan Tapang bebelat betungging tungsang nyelepak genting tebiang. Bilik penaik aku meruan bisi tajapan enda baka enggi kita' amat meh aku enda lapang be'engkayuka terutu ai mata belama nadai ngira malam siang.

👉Ungkup bala madi ti maioh minta turaika aku sada ati nyadi menantu indu ngugi/nguai nyemilik urang.

MENANTU NGUGI (Laki):
https://www.facebook.com/share/p/15cEiDTZPF/

Address

Betong

Telephone

+60139679011

Website

Alerts

Be the first to know and let us send you an email when inik Manang dara imun posts news and promotions. Your email address will not be used for any other purpose, and you can unsubscribe at any time.

Contact The Business

Send a message to inik Manang dara imun:

Shortcuts

Share

Category