17/08/2026
“ကျရှုံးချိန် Fighting ပြောသူ များပေမယ့်၊ အောင်မြင်ချိန် Congratulations ပြောနိုင်သူ ရှားတယ်”
🔳 လူ့ဘဝမှာ အလွန်စိတ်ဝင်စားစရာကောင်းတဲ့ သဘာဝတစ်ခု ရှိပါတယ်။ လူတစ်ယောက် လဲကျသွားတဲ့အခါ၊ အခက်အခဲကြုံနေရတဲ့အခါ ဖေးမကူညီချင်တဲ့ လက်တွေ၊ အားပေးစကားပြောတဲ့သူတွေ ပတ်ဝန်းကျင်မှာ အများကြီး ရှိနေတတ်ပါတယ်။ “အားတင်းထားနော်”၊ “အဆင်ပြေသွားမှာပါ” ဆိုတဲ့ စကားသံတွေကြားမှာ လောကကြီးက သိပ်နွေးထွေးတယ်လို့ ခံစားရတတ်ပါတယ်။
ဒါပေမယ့် အဲဒီလူ ပြန်လည်ထူမတ်လာပြီး တခြားသူတွေထက် ခြေတစ်လှမ်း ပိုရှေ့ရောက်သွားတဲ့အခါ၊ ဒါမှမဟုတ် ထူးထူးခြားခြား အောင်မြင်သွားတဲ့အခါမှာတော့ လှိုက်လှိုက်လှဲလှဲ လက်ခုပ်တီးပေးတဲ့သူ အရေအတွက်ဟာ သိသိသာသာ နည်းသွားတတ်ပါတယ်။
လူတွေဟာ သူတစ်ပါးရဲ့ ဆင်းရဲဒုက္ခကို စာနာပေးဖို့ လွယ်ကူပေမယ့်၊ သူတစ်ပါးရဲ့ အောင်မြင်မှုကို ဝမ်းသာပေးဖို့ကျတော့ ခက်ခဲနေတတ်ကြပါတယ်။ ဘာကြောင့်လဲဆိုတော့ လူတစ်ယောက် ကျရှုံးနေချိန်မှာ ကိုယ်က သူ့ထက် ပိုသာနေတယ်၊ ဒါမှမဟုတ် လုံခြုံတဲ့အနေအထားမှာ ရှိနေတယ်ဆိုတဲ့ စိတ်ခံစားမှုက ကိုယ့်ကိုယ်ကိုယ် အလိုလို ကျေနပ်စေပါတယ်။
ဒါကြောင့် ကူညီပေးရတာ၊ သနားပေးရတာဟာ ကိုယ့်ရဲ့ အတ္တကို မထိခိုက်စေပါဘူး။ ဒါပေမယ့် သူက ကိုယ့်ထက် သာသွားတဲ့အခါမှာတော့ “ငါရော ဘာတွေ လုပ်နေမိတာလဲ” ဆိုတဲ့ ကိုယ့်ကိုယ်ကိုယ် နှိုင်းယှဉ်တဲ့စိတ်က အတွင်းထဲမှာ ဝင်လာတတ်ပါတယ်။
🔳 ဒီလိုဖြစ်တာဟာ လူ့သဘာဝရဲ့ အားနည်းချက်တစ်ခုမျှသာ ဖြစ်ပါတယ်။ ကိုယ်နဲ့ အတူတူရှိနေခဲ့တဲ့သူ၊ ကိုယ်နဲ့ အဆင့်အတန်းတူတယ်လို့ သတ်မှတ်ထားတဲ့သူတစ်ယောက်က ရုတ်တရက် အပေါ်ကို ရောက်သွားတဲ့အခါ လူတွေရဲ့ စိတ်ထဲမှာ မလုံခြုံမှုတွေ ဖြစ်လာတတ်ပါတယ်။ အဲဒီမလုံခြုံမှုကနေတစ်ဆင့် အသိအမှတ်မပြုချင်တာ၊ လျစ်လျူရှုတာ၊ တစ်ခါတလေဆိုရင် အပြစ်ရှာချင်တဲ့စိတ်တွေအထိ ပြောင်းလဲသွားတတ်ပါတယ်။
ဥပမာ လူမှုကွန်ရက်စာမျက်နှာတွေမှာ ကြည့်လိုက်ပါ။ အဆင်မပြေတဲ့အကြောင်း၊ ဝမ်းနည်းစရာအကြောင်း ရေးတင်လိုက်ရင် အားပေးကြတဲ့ မှတ်ချက်တွေ၊ ဂရုစိုက်ကြတဲ့သူတွေ အများကြီး တွေ့ရပါလိမ့်မယ်။
ဒါပေမယ့် ဘဝမှာ ကြီးမားတဲ့ အောင်မြင်မှုတစ်ခု ရလိုက်တဲ့အကြောင်း၊ ဥပမာ—စီးပွားရေးလုပ်ငန်းအသစ်တစ်ခု စတင်လိုက်နိုင်တာပဲဖြစ်ဖြစ်၊ ဘဝအတွက် အရေးပါတဲ့ အပြောင်းအလဲတစ်ခု လုပ်နိုင်ခဲ့တာပဲဖြစ်ဖြစ် အဲဒီလို ဝမ်းသာစရာတွေ မျှဝေလိုက်တဲ့အခါမှာတော့ တကယ်ကို ရင်ထဲကနေ ဂုဏ်ပြုပေးတဲ့သူဟာ လက်ချိုးရေလို့ ရလောက်တဲ့အထိ နည်းပါးသွားတတ်ပါတယ်။
📌 “Anybody can sympathise with the sufferings of a friend, but it requires a very fine nature to sympathise with a friend's success.” “မိတ်ဆွေတစ်ယောက်ရဲ့ ဆင်းရဲဒုက္ခကို စာနာပေးဖို့ဆိုတာ လူတိုင်းလုပ်နိုင်ပေမယ့်၊ သူ့ရဲ့အောင်မြင်မှုကို လှိုက်လှိုက်လှဲလှဲ ဝမ်းသာပေးဖို့ဆိုတာတော့ တကယ့်ကို မွန်မြတ်တဲ့ စိတ်ထားရှိမှ ရတာပါ” လို့ ကမ္ဘာကျော်စာရေးဆရာကြီး အော်စကာဝိုင်းလ် (Oscar Wilde) က ဆိုခဲ့ဖူးပါတယ်။ ဒါဟာ အလွန်မှန်ကန်တဲ့ လူမှုဘဝအမှန်တရားတစ်ခုပါ။
ဒုက္ခရောက်ချိန်မှာ ကူညီပေးတဲ့သူတွေဟာ မိတ်ဆွေစစ်တွေလို့ ဆိုကြပေမယ့်၊ ကိုယ်အောင်မြင်လာတဲ့အခါ မျက်နှာမပျက်ဘဲ တကယ်ဝမ်းသာပေးနိုင်တဲ့သူဟာလည်း အလွန်ရှားပါးပြီး တန်ဖိုးထားရမယ့် မိတ်ဆွေစစ်တွေပါပဲ။ အောင်မြင်မှုဆိုတာ ကိုယ့်ဘဝအတွက် ဆုလာဘ်တစ်ခု ဖြစ်သလို၊ ကိုယ့်ပတ်ဝန်းကျင်က လူတွေရဲ့ စိတ်ရင်းအမှန်ကို စစ်ထုတ်ပေးတဲ့ ဇကာတစ်ချပ်လည်း ဖြစ်နေတတ်ပါတယ်။
🔳 အကယ်၍ ကိုယ့်ဘဝမှာ အောင်မြင်မှုတွေ ရလာလို့ ပတ်ဝန်းကျင်က လူတချို့ ခပ်ခွာခွာ ဖြစ်သွားတယ်ဆိုရင် ဝမ်းမနည်းပါနဲ့။ ကိုယ်က မာနကြီးသွားလို့၊ ဒါမှမဟုတ် ကိုယ်က ပြောင်းလဲသွားလို့ မဟုတ်ဘဲ၊ သူတို့ကိုယ်တိုင်က သူတို့ရဲ့ စိတ်မလုံခြုံမှုတွေနဲ့ ရုန်းကန်နေရလို့သာ ဖြစ်ပါတယ်။
အဲဒီလိုအချိန်မှာ ကိုယ့်ရဲ့ အလင်းရောင်ကို သူတို့မျက်စိမကျိန်းအောင်ဆိုပြီး ပြန်လျှော့ချပစ်စရာ မလိုပါဘူး။ လင်းလက်ခွင့်ရှိတဲ့အချိန်မှာ အားရပါးရ လင်းလက်လိုက်ပါ။ တကယ့်မိတ်ဆွေစစ်ဆိုတာ ကိုယ့်ရဲ့ အလင်းရောင်အောက်မှာ နွေးထွေးမှုကို ခံစားတတ်သူတွေသာ ဖြစ်ပါတယ်။
တစ်ဖက်ကပြန်ကြည့်ရင်လည်း ကိုယ်တိုင်ကရော တခြားသူတွေရဲ့ အောင်မြင်မှုအပေါ် ဘယ်လိုတုံ့ပြန်နေသလဲဆိုတာ ပြန်စစ်ဆေးကြည့်ဖို့ လိုပါတယ်။ လူတစ်ယောက်ရဲ့ တိုးတက်မှုကို မြင်တဲ့အခါ မနာလိုဝန်တိုစိတ်မရှိဘဲ “Congratulations” လို့ ရိုးရိုးသားသား ပြောနိုင်ဖို့ဆိုတာ Emotional Intelligence မြင့်မားမှ ရတာပါ။ ဗုဒ္ဓဘာဘာမှာဆိုရင်တော့ ဒါကို ‘မုဒိတာ’ လို့ ခေါ်ပါတယ်။ မေတ္တာ၊ ကရုဏာထားဖို့ထက် မုဒိတာပွားဖို့က ပိုခက်ခဲပါတယ်။ ဘာလို့လဲဆိုတော့ မုဒိတာပွားနိုင်ဖို့ ကိုယ့်ရဲ့ ‘အတ္တ’ နဲ့ ကိုယ့်ကိုယ်ကိုယ် နှိုင်းယှဉ်နေတဲ့စိတ်ကို အများကြီး လျှော့ချထားနိုင်မှ ဖြစ်လို့ပါပဲ။
📌 ဒါကြောင့် ဘဝမှာ အထီးကျန်ဆန်မှုကို ကြောက်ပြီး ကိုယ့်ရဲ့ ခြေလှမ်းတွေကို နောက်မဆုတ်လိုက်ပါနဲ့။ အမြင့်ကို တက်လေလေ အတူတူရပ်တည်ပေးမယ့်သူ နည်းလာလေလေ ဆိုတာကို ကြိုတင်လက်ခံထားရပါမယ်။ အောင်မြင်မှုဆိုတာ အခွင့်အရေးတွေ၊ ပျော်ရွှင်မှုတွေ ယူဆောင်လာပေးသလို၊ တစ်ချိန်တည်းမှာပဲ ဘယ်သူတွေက ကိုယ့်ဘဝမှာ ဆက်ပါလာသင့်သလဲ ဆိုတာကိုလည်း ပြတ်ပြတ်သားသား ဆုံးဖြတ်ပေးသွားတတ်ပါတယ်။
ဘဝမှာ ကိုယ်လဲကျချိန် လာရောက်တွဲထူသူတွေကို ကျေးဇူးတင်ပါ။ ဒါပေမယ့် ကိုယ်တောက်ပနေချိန်မှာ မျက်စိမနောက်ဘဲ အနားမှာ ဂုဏ်ယူစွာ ရပ်တည်ပေးနိုင်သူတွေကိုတော့ ဘယ်တော့မှ လက်မလွှတ်ပါနဲ့။
လူတစ်ယောက်ရဲ့ စိတ်ရင်းအမှန်ကို သိချင်ရင် ကိုယ်ပြေလည်နေချိန်မှာ သူ မုဒိတာ ပွားနိုင်၊ မပွားနိုင်ကို ကြည့်လိုက်ပါ။
#ဉာဏ
August 4, 2026
ဆရာမဉာဏ၏စာအုပ်များကို City Mart စင်တာများနဲ့ အမြို့မြို့အနယ်နယ် စာအုပ်ဆိုင်များမှာ ဝယ်ယူရရှိနိုင်ပါတယ်။ Online က မှာယူလိုပါလျှင် Page Messenger ကနေ လာရောက်မှာယူနိုင်ပါတယ်။
