Anak Rumah Panjai - ARP

19/09/2025

Fun Fair Boulevard Miri.

19/09/2025

Fun Fair UK Boulevard miri

18/09/2025

https://www.facebook.com/share/19yfav2SMB/?mibextid=wwXIfr

Selamat lemai,kita tau nitih ke tu au,ba ditu semua tajuk ensera ke udah diseluri admin.
Terima kasih laban semampai nyukung.🥰🥰😍😍😍

Author

17/09/2025

PUNI

Renggat 4

Lebuh Kilat enggau Tegung ninga punggu labuh,dia seduai iya alit ati. Dini enda pia laban maya ta nadai angin sereta ribut balat.

"Nasib tua jauh ney unggal,semak amai punggu nya labuh."pia ku Tegung.
"Nya mih unggal."pia ku Kilat.

Lebuh seduai ngili ai sungai,dia seduai bisi meda senaya urang benung duduk ba batang kayu rebah melintang ba sungai dia.
Tang senaya urang nya semian peda ari belakang aja.Dia seduai merati ke nya amai,dia seduai meda pala nyau lunchung sereta pala patung tinggi ari pala. Dia seduai enggai badu-badu nengau nya laban deka nemu sapa urang nya. Dia Kilat nyau teringat ke jerita urang tuai kelia menya,nya baru iya nemu.

"Unggal!, salah tu,aram tua pulai kulu kin baru."pia ku Kilat Nelai Tegung.
"Nama ku nuan unggal,nama utai ke salah,ukai tua ka nyidi nya sapa urang nya?."pia ku Tegung nadai nemu utai.
"Mupuk tua ari tu unggal,enda manah endur tu."pia ku Kilat ngelaung jaku iya.
"Enti pia,aram mih tua kulu kin."pia ku Tegung.

Lebuh maya seduai baru ka nyingkang kaki,dia seduai iya ninga utai baka bisi labuh ke ai. Nya mih seduai iya malik ke belakang,dia api kebait seduai tetengau ke mua kili ba urung batang ke melintang endur seduai meda antu nya tadi. Dia dih seduai sama bela tekenyit lebuh meda kaki ba ai sungai nya naka iya tinggi,dini nya tinggi dipeda seduai,terengkah ba ai sungai nya semina betis antu nya aja. Dia seduai iya ninga antu nya ta bedemuh.

"Uhhh...uhhh...."ku munyi antu nya.

Nya mih ngasuh seduai tegal agi bejalai laban bai ati kelalu takut. Tudah Tegung nyau begetar pala patung munti dapat nyingkang kaki.

"Unggal!,nama kaki aku tu ta enggai nyadi nyingkang,kada enda parai mih aku tu empa antu legi."pia ku Tegung.
"Ehh...mali munyi nya,aram tua mupuk nyingkang,aku narit jari nuan."pia ku Kilat megai jari iya.

Nya mih tudah Kilat naka alah ngirit Tegung laban kaki iya nyau enggai nyadika nyingkang semadi Tegung tu ngering ke semengat iya ngambi ulih nitihka Kilat.

Maya seduai berumban bejalai kaki,dia seduai ninga renjat kaki naka iya penginggar sereta nyau bedegum. Ukai nya aja,puchuk kayu abis patah labuh ke tanah baka dipatah ke urang.

Nya mih ngasuh seduai iya balat agi kesal sereta bulu pegu nyau ngeregu sereta tanah diindik nyau enda berasai baka ngindik tilam.

"Parai mih tua tu legi Kilat."pia ku Tegung.
"Anang guai munyi nya dulu,aram tua mupuk ngidup ke seput tua."pia ku Kilat agi ngirit jari Tegung.

Ngemendar nya seduai lari,sekali datai seduai iya ba pun pelai ba tebing sungai,dia seduai iya alu belalai ba bandir pelai.
Laban ke pelai nya besai amai bisi ngempat berap urang tuai.

"Ba ditu tua belalai unggal,baru teringat aku bisi ngemai selukai tadi."pia ku Kilat benung mantaika selukai ba dalam raga iya.

kilat pan alu nuchur ujung selukai ngena macis kayu. Pengudah nya idup sereta asap balat amai,dia Kilat bisi berasai lantang. Tudah Tegung semina duduk engkutung laban kelalu takut. Dia seduai iya nadai ninga munyi utai belah puchuk kayu labuh agi. Seduai iya nadai engkeretik sereta mending ke utai bukai engka antu nya agi ngagai seduai iya. Kira bisi sebatang ruku bakanya mih seduai udah duduk ba selepak bandir tadi,dia seduai nyau berunding deka angkat sereta ka mulai kediri.

"Aram mupuk tua pulai,kala nadai utai ngachau agi."pia ku Kilat.
Tang selukai seduai udah abis laban nya ke siti aja bai.
"Aram mih,nyau leminasai pala patung aku tu."pia ku Tegung.

Seduai ita pan alu angkat sereta mupuk mulai kediri. Maya seduai iya nyau ka datai ba rumah,dia seduai iya bepansa enggau siku Ini tuai urang. Lama seduai tegenung meda Ini tuai nya,nyau enda beilap-ilap tudah seduai meda.

"Ooo...Ini...ka kini nuan?."pia ku Tegung laban ke lanchat agi bejaku.
Bedau ga Ini tuai nya nyaut.
"Ooo...Ini....ka kini nuan?."pia ku Tegung nanya baru.
"Aku tu uchu ka ngabas peti aku ke ditan enda jauh ari tu,engka nya bisi nyangkut,enti bisi pama mih bisi ke dempa aku berapa minggu."pia ku Ini tuai nya.

"Au pia Ini,nama mih ngabas maya malam hari bakatu,nama enda nganti siang pagila dih?."pia ku Tegung.
"Siang enda tu meda aku uchu,malam bakatu baru aku lansik meda uchu."pia ku Ini tua nya.

Tudah Kilat nyau nemu sagam jaku Ini tuai nya. Kebuah pia laban iya nemu Ini tuai nya ukai sida serumah sereta leka jaku nyau lain. Laban sagam Kilat Ini tuai nya sigi antu tang iy a enda nemu antu nama.

"Nama nyuluh malam tu ka amai diregau antu."pia ku Kilat bejaku dalam ati.
"Nama utai ku nuan uchu."pia ku Ini tuai nya nanya Kilat.

Nya mih tudah Kilat nyau tekenyit laban enda nyangka Ini tuai tu nemu sagam ati iya.
"Pulai ari ni seduai tadi uchu?,meda nyau ngesuh amai bau tu."pia ku Ini tuai nya.
"Baru pulai ari ai sungai mit din kai duai,pulai ngiga pama."pia ku Tegung.
"Au pia,bisi bulih?."pia ku Ini tuai nya.
"Bisi,enda mayuh bisi enam iku."pia ku Tegung.
"Kami duai tu ka mupuk."pia ku Kilat narit jari iya ngasuh jauh agi ari Ini tuai nya.

Meda seduai iya nyau deka ngeyauh kediri,dia Ini tuai nya alu nanya baru.

"Nama utai diperumban seduai uchu,agi belala aku tu berandau."pia ku Ini tuai nya.
"Nyau lelak kami duai tu Ini,nya mih ka berumban pulai."pia ku Kilat.
"UKai nya jauh rumah panjai seduai,nya semak dia."ku Ini tuai nya majak ngenan ke seduai iya.

Nya mih Kilat majak enda nyamai ati laban iya meda mua Ini tuai nya ta lain dipeda iya,baka ka bebali. Dia Ini tuai nya tadi alu ngerising ke mua iya,dia ngeli ari atas nyau nyumbuh sereta ai liur nyau betali. Nya mih seduai Kilat enggau Tegung nyau temati kutu sereta bulu pegu nyau nyeregu sereta pala patung nyau lemi.

Kaki seduai majak surut ke belakang laban Ini tuai nya nyau ngasak agai seduai. Deka seduai iya ngelari kediri,enda ga sempat laban seduai iya nemu Ini tuai ke mali nyadi antu nya sigi ngagai seduai iya.

Seduai iya bela sama berunding bakani deka ngelari kediri ari digagai antu tu. Dia Kilat nyau teringat jaku aja niang akiniya suba,enti tetemu ke antu,mata duku alu diujak ke tanah sereta besampi ngambi antu enda berani ngagai tauka nitih sereta antu enda ulih bedengah kitai.

Nama agi dih dia Kilat alu nyintak duku iya sereta besampi,udah abis sampi iya,dia alu ngujak mata duku agai tanah,peda antu nya tadi alu engkajat sereta nyingkang kaki jauh agi ari seduai iya.

"Berani nuan ngasuh kaki aku angat sereta pedis,chabut duku ari tanah nya."pia ku antu nya nyau nyerauh madahka kaki iya angat sereta pedis.

Meda bakanya,dia Kilat narit jari Tegung alu dibai iya lari.

"Aram unggal,lari tua,mati tua laban antu tu legi."pia ku Kilat.
"Kati enggau duku nuan nya dih?."pia ku Tegung.
"Awak ke dia,pagila aku ngambi."pia ku Kilat.

Nya mih seduai iya naka alah ngelari kediri. Empai tu lama udahnya,dia seduai nyau datai ba ujung bilik sida Tegung. Seduai iya pan sama bela ngetu dia laban nyau seput-seput.
Dia seduai iya ninga antu nya nyau ngerauh naka pengingar nya.

Seduai iya pan alu niki pala tangga tanju sida Tegung. Seduai sama bela duduk ba tanju sereta agi seput-seput.

"Enda kala-kala aku dikeduan utai bakatu,berapa lama aku udah kala bejalai belah babas enda ngira siang malam."pia ku Kilat ngiling kepala iya.
"Aku pan bakanya mih unggal,bedau kala-kala dikeduan utai bakatu. Baik tua ulih ngelari kediri."pia ku Tegung.

Baru abis berandau seduai iya,dia tandan bau Tegung asai bisi ditegu urang.

Betampung renggat 5

17/09/2025

Bisi berita manah,pagila pansut "Ensera Puni"
Arap besabar au
-arp-

16/09/2025

Berebutka gerembung.

15/09/2025

Genteran ensera PUNI ti ka datai.

Lebuh seduai ngili ai sungai,dia seduai bisi meda senaya urang benung duduk ba batang kayu rebah melintang ba sungai dia.
Tang senaya urang nya semina peda ari belakang aja. Dia seduai merati ke nya amai,dia seduai meda pala nyau lunchung sereta pala patung tinggi ari pala. Dia seduai enggai badu-badu nengau nya laban deka nemu sapa urang nya. Dia Kilat nyau teringat ke jerita urang tuai kelia menya,nya baru iya nemu.

Uji sagam ati kita wai. Sapa urang nya wai.

Arap besabar nganti au.

14/09/2025

Nyau kembai kuyu meda tu wai.

14/09/2025

Hari majakka ujan,ketegal ujan mayuh endar kenangi. Mupuk mih tusah ati. Enda pia iya wai.
-arp-

13/09/2025

Selamat pagi agai bala menyadi ba ruai tu,berasai chelap sepagi tu ketegal ujan enda ngetu ari demalam. Dulu min ngemi baka ke pagitu.
Ensera Puni bedau pansut laban agi nulis jalai jerita.

12/09/2025

PUNI

Renggat 3

Maya Beni meda urang ngepai iya,dia Beni nyau enda berasai deka ngelawa kin. Meda Beni nyauka limpang ke bukai,dia Ajik alu nanya iya.

"Endu Beni !,ka kini nuan?."ku Ajik nanya iya.
"Aku ka kulu kin,meda batu kerangan din manah amai."pia ku Beni.
"Ni dipeda nuan ke manah,bela sama aja nya."pia ku Ajik nyau malik kulu kin.
"Eh!,nuan mandi ditu dulu,aku ka kin enda lama."pia ku Beni.

Beni pan alu mupuk nyingkang kaki iya agai kulu kin nengah batu kerangan ba tebing ai. Makin iya semak endur urang ke ngepai iya tadi,dia iya nyau meda siku laki ti chukup sigat peda iya. Tudah Ajik ngemata ke Beni aja,malik iya kulu kin,sebaka magang batu kerangan peda iya. Nyau bisi lima depa,dia Beni alu ngetu laban nyau damping amai laki nya. Peda iya sigat amai laki nya peda iya,nyau sigat agi ari niang laki iya. Dia dih Beni nyau tuchum malu laban diperening laki nya. Nyau pemuas dia laki alu bejaku.

"Oo...wai...,ngansak semak agi wai,anang malu ke aku. Aku nadai ngemedis ke nuan tang deka berandau enggau nuan."pia ku laki nya sambil tuchum.

Nya mih ngasuh ati Beni nyau gidan meda tuchum laki nya chukup sigat amai dipeda iya.

"Ooo...wai...kitu mih,enda patut tua berandau ngeyauh tu."pia ku laki nya.
"Au...mih...wai...,ka kia mih aku."pia ku Beni nyau nyingkang kaki ngelawa agai laki nya.

Nyau enda berasai kaki Beni nyingkang sepi iya nyau udah datai semak laki nya.
"Duduk berimbai enggau aku ditu wai,anang malu,nadai urang meda."pia ku Laki nya.
"Bisi urang meda tua duduk berimbai,peda nuan urang benung mandi nyin."pia ku ku Beni.
"Nya anang nuan irau wai,sida nya semina meda nuan aja,aku sigi nadai peda sida iya laban aku bisi ngena kerabun."pia ku laki nya.
"Enti nuan udah munyi nya,berasai lantang ati aku,enda alah aku dikumbai urang luba-luba laban baru bedau tu lama ditinggal laki enda pulai agi."pia ku Beni nyau meribih tudah tuai.
"Badu nuan tusah ati wai,utai udah nadai,kapa nuan kenangi agi,kapa nuan ngenang agi,aku tu bisi endur nuan bepanggai."pia ku laki nya naka iya ngelembut leka jaku ngasuh ati urang indu lemi.
"Dini enda aku tusah ati wai,udah ga kami duai baru sebulan udah jadi,chukup merinsa ditinggal urang ke disayau."pia ku Beni.
"Umbas mih nya wai,tu bisi aku endur nuan rindang."pia ku laki nya.

Bedau tu lama seduai udah berandau,dia Ajik alu nganggau iya ngasuh iya mandi laban deka pulai.

"Ooo...Beni...aram mandi,nyau chelap aku tu."pia ku Ajik rerauh ari pendai din.
"Anang guai...enda lama."pia ku Beni.
"Anang guai mih wai Beni,agi belala berandau enggau nuan. Kemaya enda tua ulih betrlu bakatu agi."pia ku laki nya nya lembut nyawa iya.
"Anang nuan irau wai,maya lemai bakatu ga tua betemu ba endur tu."pia ku Beni.
"Au mih,anang ngemulanke danji nuan wai."pia ku laki nya.
"Enda aku ngemula ke nuan wai."pia ku Beni.
"Baik mih nuan udah munyi nya wai."pia ku laki nya.
"Naka tu aja tua berandau,nyau petang tu,udah mandi alu pulai tu legi."pia ku Beni.
"Au mih."pia ku laki nya.

Beni pan alu angkat sereta ati iya nyau berasai gaga laban udah berandau enggau siku laki ti chukup sigat dipeda iya. Datai iya ba Ajik dia,dia Beni alu nyepuh ke tubuh ia agai ai kerangan.naka mih penyelap laban nya petang amai.

"Iya nama ambi nuan dugau-dugau duduk ba batu kerangan din tadi Beni,nyau baka urang ke mamau nuan peda aku."pia ku Ajik.
"Nadai pengawa,ka ngelantang ke ati."pia ku Beni nyau tuchum-tuchum.
"Iya nama nuan ta tuchum-tuchum dih?."ku Ajik nanya.
"Nama salah mih tuchum,enti mua aku redu kada ka nuan meda,sigi nuan bendar agi ngelara aku."pia ku Beni.
"Aram tua pulai,chelap amai isi aku tu,udah ga nyau petang."pia ku Ajik.
"Au mih."pia ku Beni malik agai kulu kin.

Maya Beni malik agai kulu kin,nadai iya meda laki nya agi,nyau gegining iya ngiga kini penungga laki nya.

"Iya lapa ga nuan bendar amai gegining,sapa ke peda nuan."pia ku Ajik.
"Nadai,meda rampa ai kerangan kitai ditu manah amai baka ke lemai tu."pia ku Beni nyalam ke Ajik.
"Eh...ta ngigau nuan baka ke lemai tu,baka ke enda kala mandi ditu sereta ukai ada ba ditu."pia ku Ajik.
"Ta lemai tu ke manah amai rampa ai kerangan kitai tu."pia ku Beni.
"Aram tua mupuk,enda bai nuan tuyu aku ba ditu."pia ku Ajik narit jari iya ngemai pulai.

Seduai iya pan alu mulaika diri,tudah Beni nyau tuchum kediri sepemanjai pulai ke rumah. Tudah Ajik enda nemu ulah Beni nyau bakanya laban iya sigi nadai nyangka nama-nama utai nyadi,kebuah pia laban peda Ajik semina Beni aja duduk dedugau ba batu kerangan. Datai ba pala tangga sida Beni,dia seduai alu niki sereta pulai agai bilik diri empu. Maya ke Beni tama agai bilik,dia Tuat benung gali ba bilik besai tang enda tinduk. Nya mih iya meda aka iya ta tuchum kediri.

"Nama utai ngasuh nuan tuchum aka?."pia ku Tuat.
"Nadai dih,ngenang ke kami duai Ajik mandi ba pendai tadi."pia ku Beni ngemula ke adi iya Tuat.
"Au pia."ku Tuat nyau enggai kiruh ke aka iya.

Datai iya ba dapur din,dia Beni meda indai iya ngusuk daun ubi. Iya pan alu begari sereta nulung indai iya.

"Aku nulung nuan ngusuk daun ubi tu indai."pia ku Beni.
"Au mih,aku ka nanggal ke asi dulu."pia ku indai iya.

Indai iya pan alu angkat sereta nanggal ke asi ba api kayu. Udah indai iya nanggal ke asi dia indai iya alu nanak ikan baung enggau ikan emparau ke lauk sida sian tadi. Maya nya indai iya meda ulah Beni ta tuchum-tuchum kediri. Dia indai iya alu nanya.

"Nama ngasuh nuan tuchum endu?."pia ku indai iya.
"Nadai indai,ati aku bisi berasai nyamai sereta lantang lemai tu indai."pia ku Beni.
"Baik mih nya endu,badu mih nuan ngenang utai ke udah,diatu nyau ngering ke diri nampi pengujinti deka datai."pia ku indai iya.
"Au indai,nadai aku tusah ati agi."pia ku Beni.

Udah tembu ngusuk daun ubi,dia indai iya alu manduk daun ubi. Udah mansau magang,sida sebuat pan alu belabuh makai. Naka pengenyang mih sida lemai nya.

Diatu kitai ngenang sida serumah ke benama Kilat. Nyadi kilat tu benung bujang raya sereta iya bisi menyadi tiga iku,semina iya aja ke laki,dua iku nya indu. Maya sida udah makai,dia Kilat alu pansut ke ruai alu ngelawa bilik sida Tegung mua ari ili. Nyadi Tegung tu biak agi ari Kilat. Seduai tu sigi bebakih ari mit nyentuk ke besai. Nyadi Tegung tu bisi menyadi indu benama Seri. Seri tu umbas iya pemajik. Nadai sida serumah bajik baka Seri tu.

Maya Kilat datai ba pintu ruai sida Tegung,dia Kilat ngetuk pintu sida Tegung. Baru sekali Kilat ngetuk pintu. Sekali pintu alu ditukang urang ari dalam,dia Kilat tekenyit laban Seri benung nukang ke pintu seretaka besatup mua enggau kilat.

"Eh...nyau ka besatup,enda ngadang nuan ka tama tadi Kilat."pia ku endu Seri.
"Aku pan tekenyit laban enda ngadang nuan jampat amaika pansut,nasib enda besatup tadi,enti enda pia sigi menchul kening tua."pia ku Kilat nyau tuchum.

Lebuh Endu Seri meda tuchum Kilat,dia endu Seri nyau ka runtuh asai ati sereta kesal meda tuchum Kilat tak narit ati iya. Nya mih tudah endu Seri nyau temenung enda pama meda penyigat Kilat.

"Nama lemai tu Kilat ta sigat oeda aku,meda ngelamatilu ita selalu ngusung aka aku nya baka nadai nama-nama maya bepansa tauka malik iya."pia ku Endu Seri bejaku ba dalam ati.
"Nai...iya lapa ga nuan balat temenung dih Seri."pia ku Kilat negu tandan bau Seri.

Nya baru endu Seri ngeleda meda bisi urang negu bau iya.

"Nama ku nuan tadi Kilat?."pia ku Endu Seri.
"Apu...balat amai iya tu temenung tadi,aka nuan Tegung bilik ba bilik?."pia ku Kilat nanya.
"Bisi...bisi...agi ba dapur din iya benung berandau enggau apai aku."pia ku Endu Seri.

Kilat pan alu ngelawa agai dapur din,datai iya din dia Tegung ngasuh iya duduk enggau seduai mapai dia.

"Duduk ditu unggal,nama pejalai unggal?."pia ku Tegung ngasuh bakih iya duduk semak iya dia.
"Eh...nadai pejalai bukai aku tu unggal,laban semina deka ngemai nuan nyuluh pama ba ai mit nanga sungai biru dia."pia ku Kilat.
"Manah amai nya unggal,enti pia aku ka laban lama amai enda makai pama."pia ku Tegung.
"Amai munyi ku nuan nya Dom. Aku lama mih enda makai pama,nemu tenguk amai tudah nyawa tu."pia ku apai Tegung benama Mabung.
"Kemaya tua mupuk dih unggal?."pia ku Tegung.
"Diatu tau mih,tumu nurun,tumu ga pulai."pia ku Kilat.
"Au mih,ni jalai tua legi dih unggal?."pia ku Tegung.
"Nuan nganti ba tanju legi unggal,legi aku ngelawa ujung bilik kita,ari ujung bilik kita tu mih jalai tua nurun legi."pia ku Kilat.

Pengudah seduai besemaya,dia Kilat alu mupuk pulai ke bilik sida laban deka begari. Dia Kilat ngemai jerepang sereta duku ke selalu dibai iya nurun ke tanah.

Diatu kitai ngenang tudah Tegung ke agi beradu. Maya nya indai iya benung nanggal ai kupi laban apai iya ka ngirup kupi. Tembu Tegung beradu iya alu nurun,tang iya enda ingat negu laban kelalu berumban. Ukai nama iya berumban laban bakih iya Kilat udah nganti ba ujung bilik din. Tegung pan alu nungkun api kebait iya sereta ditengau iya agai bakih iya Kilat,peda iya Kilat benung dedegi nganti iya din. Tegung pan alu berumban ngelawa agai Kilat laban enggai ngasuh siku nya lama nganti iya.

"Amat terang pancar api kebait nuan nya unggal?."pia ku Kilat.
"Pemancar tu sigi selalu dilap apai aku,laban apai aku enggai meda utai kamah."pia ku Tegung.
"Au pia,aram tua mupuk."pia ku Kilat.

Nyadi Kilat dulu ke seduai iya. Seduai iya sigi nadai bejalai berumban ngelawa anak sungai ka dilawa seduai. Nya mih seduai iya nengau ba belah puchuk kayu engka bisi meda jelu. Tang maya nya seduai iya nadai meda mata jelu jelangkit. Maya nyau deka datai ba anak sungai mit,dia Kilat meda pelanduk benung makai buah buan ke labuh. Dia kilat alu ngetu sereta nelai Tegung.

"Unggal!, peda nuan nyin,nyau perenching mata pelanduk benung makai buah buan larah nya. Nuan nganti ditu,aku nyubuk pelanduk nya. Legi nuan nengau pelanduk nya,api kebait aku tu dipadam aku dulu, aku nyubuk kin laban ka mantap pelanduk nya."pia ku Kilat nelai Tegung.

Tegung pan anguk pala iya nanda ke iya mereti utai ku Kilat tadi. Kilat pan mupuk nyubuk pelandung benung rindang makai buah buan. Kilat tu tadi nyubuk mua ari kanan laban angin datai ari kiba. Naka pengelubah mih Kilat nyingkang kaki iya sereta bejimat ngambi pelanduk enda lari lebuh maya ninga renjat kaki iya. Datai Kilat ba endur pelanduk kira setengah depa endur ulih iya mantap pelanduk nya. Duku sigi udah sintak Kilat maya iya nyubuk tadi. Maya ke ngam endur iya ka mantap ba urung rekung pelanduk nya. Dia Kilat alu mantap pelanduk nya,peda rekung pelanduk nya ka putus jamah duku Kilat. Ukai main penajam duku Kilat. Nya mih pelanduk pan alu rebah sereta mati ba endur nya. Udah pelanduk nya mati,dia Kilat alu ngepai Tegung ke agi nganti urung tadi. Maya Kilat ngambi pelanduk nya,dia iya meda ba pala pelanduk nya bisi tanduk tang enda panjai. Nya mih Kilat nyau alit ati laban tu mih keterubah iya meda pelanduk bisi tanduk.

Datai Tegung ba Kilat dia,dia Tegung enda merati ke pala pelanduk sereta alu ditepu ba dalam raga.

"Pama nih unggal."pia ku Tegung.
"Nasib tua mih nya."pia ku Kilat.

Seduai iya pan mupuk baru bejalai,empai lama udah nya seduai iya pan nuntung ai sungai mit. Ai sungai nya bisi dua depa pemesau tang bepasir sereta pabu. Seduai iya pan nurun ke ai laban ka ngiga pama. Tengau kilat ba tebing peda iya mata pama,sekali alu jepang iya sereta kena tubuh pama,sekali ambi iya pama ba mata jerepang,peda iya amai besai pama bisi bisi ngemesai empat tunjuk.

"Amai besai pama nya unggal,baru iya aku meda pama ngemesai nya."pia ku Tegung.
"Nya mih unggal,bidik tua malam tu."pia ku kilat.

Baru deka nyingkang kaki seduai iya,dia seduai iya ninga urang batuk.

"Ahuk...ahuk...."ku munyi batuk urang mua seberai ari kiba.

"Unggal,sapa enda urang ke batuk nya."pia ku Tegung nelai Kilat.
"Enda nemu unggal,engka kitai serumah bisi bejalai kitu."pia ku Kilat.
"Engka kini."ku Tegung.

Baru abis betelai seduai iya,dinga batuk baru. Tang tu batuk nyau betimbal baka ke bisi dua iku. Seduai iya ngetu sereta nengau ba belah nya,nadai ga seduai meda.

"Enda patut kitai serumah deka beduan tua unggal,tu nyau betimbal batuk."pia ku Tegung.
"sigi amai munyi ku nuan nya unggal,tang munyi nya baka ke semak unggal."pia ku Kilat.

Empai lama seduai berandau,sekali dinga dan kayu labuh nyau bedegum enda jauh ari seduai. Nya mih seduai bela tekenyit sereta kesal ati. Bulu lengan enggau bulu pegu nyau nyerengat. Enda memukai...

Betampung renggat 4