21/11/2025
प्रधानमन्त्री सुशीला कार्की र नेपाल कम्युनिस्ट पार्टी (माओवादी) का महासचिव नेत्रविक्रम चन्द ‘विप्लव’ बीच बिहीबार बालुवाटारमा भेटवार्ता भएको छ। प्रवक्ता खड्गबहादुर विश्वकर्मा ‘प्रकाण्ड’ पनि सो भेटमा सहभागी थिए। उनीहरूले मुलुकको वर्तमान राजनीतिक अवस्थाबारे आफ्ना धारणा प्रधानमन्त्रीसमक्ष राखेका छन्।
विप्लवले कार्की नेतृत्वको सरकार “विद्रोहको बलमा बनेको” भन्दै आफ्नो पार्टीको पूर्ण समर्थन व्यक्त गरे। जेन–जी आन्दोलनले उठाएका मागहरू पूरा गर्दै राजनीतिक समझदारी थप व्यापक बनाउनु अहिलेको आवश्यकता भएको उनको भनाइ थियो।
विप्लव नेतृत्वको नेकपा आयोगमा ‘नेकपा माओवादी’ नाममा दर्ता भइसकेको छ। प्रचण्डले माओवादी धार छाडेपछि आयोगले नयाँ रूपमा विप्लव समूहमै सो नाम दर्ता गरेको हो। यीले रातो गुलाफ चुनाव चिह्न पाएका छन्।
प्रधानमन्त्री कार्कीले यसअघि ११० दलका प्रतिनिधिसँग सामूहिक संवाद गरिसकेकी छिन्। हाल उनी दलका नेताहरूलाई अलग–अलग बोलाएर समसामयिक विषयमा विस्तृत छलफल गरिरहेको प्रधानमन्त्री कार्यालयले जनाएको छ।
