27/08/2022
Why I meet wit Atiku, Obasanjo, Tinubu – WIke
Rivers state Govnor, Nyesom Wike on Friday tok say hin team get interest for Naijaria wey beta and dem dey tok to pipo wey get maout for di contri.
Wike tok wen e follo di pipo wey dey do news yan for pitakwa internashunal airport for Omagwa for Ikwerre local govament area, as e land Naija from Obodo on Friday. Wit am, Benue state govnor Samuel Ortom and Abia State govnor, Dr. Okezie Ikpeazu naim dem gada dey.
Wike wey confam der meeting wit PDP presidential candidate, Atiku Abubakar, APC presidential candidate, Bola Tinubu; Labour Parti presidential candidate, Peter Obi and foma presido of Naija, Olusegun Obasanjo for obodoyibo tok say wetin dey top list na how to mek Naija beta pass how e dey befor.
Di Rivers state govnor tok say Naijaria neva still dey ok at all and dem dey find way to see say hope dey for Naijaria. E tok ‘I fi confam say dis na di fess time as team wey we dey meet wit di presidential candidates dem. We meet di presidential candidate of APC and we meet wit awa leader, foma presido of Naijaria, Olusegun Obasanjo.
We meet di presidential candidate of labour parti. We con still meet wit awa Presidential candidate, Atiku Abubakar. Anyhow wey e wot, we still dey follo pipo tok.
“And wetin we dey tok abat, na mek Naija beta and na for di interest of di pipo. No be say na one-way traffic or say e dey some pipo hand.
“We belive say wetin dey go on, na for di interest of Naijarians las las”. Wike condem di situashun wia dem don sell standard, training, and competence for low quality. E say leadership no suppose be one one man show and famili business but mek e for everi bodi interest.
“We still dey tok to pipo, no mind di pipo wey no belive say dis contri fi dey. “Leadership no be abat you and your famili. Na abat everi bodi. We don dey one chance for dis contri wia one man go finish eight years as govnor con bring hin pikin as govnor too and as memba of di nashunal assembli. Na for dis part of di world you go see dis kain tin wen we dey tok abat povati everi wia. Dis na pipo wey no wan mek Naija go front”. He yan.
Wike con rezin why religion and tribe be di tin to use describe Naijarians wen we nid who go fi do di job. E continue say, di only identity we get for dis contri na religion and tribe nutin else. Na say, I be Christian or Muslim or I be Fulani or I be Igbo. Naija no fi move forward except dem tink say e go be dem. Na wia we dey be da. We dey contri wey persin wey get primary skul cerfiticate fi collect Minista of foreign Affairs. Da na to tell you how bad di contri don dey”. But wit di pipo wey we dey meet dey tok to, dis mata go be yesterday. No amount of fear or say dem wan use us go scata us. We dey detamine to right all di wrong’.
Di leader of di team and Benue state govnor, Samuel Ortom, tok say dem don met wit strong pipo dem for som time now becos of der belive say Naijaria dey serious wahala and dem nid pipo to save di mara.
E say dem don get beta tok wit dose pipo wey dem don meet and di tok pass do or die politics, becos dose wey get good mind nid work togeda to se say Naijaria survive.
“For us, we dey lok di big pishure. Naija todai dey wahala, na abat wetin we fi do. No man or woman alone fi get am right for awa contri.
We dey lok how we fi take bring ideas togeda to see say we get out of di wahala wey we dey face for Naija todai.
“From top to bottom see wetin don happen from 2015 and wia we dey todai.
So wetin we dey do na di consan wey we get for awa contri Naija. Dis one pass do or die politics. We dey lok how we fi take com togeda find way to see say Naija survive. Naija dey on drip, Naija dey on oxygen and na how we fi take comot from dis wahala”, Ortom yan. E tok say di tiri separate meetin wey dem get durin di week mek sense for dem.
‘Di pipo wey we dey meet still dey go on and go continue to dey go on. We go still meet for hia. We go still meet som persin later and see how we go fit work to see say di project Naijaria work.”
For hin side, di Abia state govnor Dr. Okezie Ikpeazu press maout say, dem dey on mishun and dem dey detamine to find way save Naijaria. E say dem dey shadow di societi wey dem go giv dis genereshun, der shidren and grand shidren. E say, ‘And dis na contri wey get beta head and we nid protect am well. We tink say we nid to carri everi bodi . “We dey lok say we fi follo di civil societi organizeshun and dose wey get idea, wit Naijarians wey dey obodo. “All di resources wey dey for dis contri gas com togeda for dis time to see how good we fi take move Naija go front.”
