11/03/2026
Ƙungiyar ɗaliban ƙaramar hukumar Alkaleri, wato Alkaleri Local Government Student Association of Nigeria (ALSAN) a turance, ƙarƙashin jagorancin shugaban kungiyar Comrade Abdurrazak Gambo Musa, ta ƙaddamar da rabon kayayyakin makaranta ga ɗalibai da makarantu a ƙananan hukumomin Alkaleri da Kirfi na jihar Bauchi.
A yayin rabon kayayyakin, ƙungiyar ta raba littattafan rubutu guda dubu biyar (5,000), jakunkunan makaranta guda 200, lunch box guda 100, allunan rubutu na white board guda 100, tare da fensir, biro, marker da sauran kayan da ake buƙata a makaranta.
An raba kayayyakin ne ga makarantu sama da sittin (60) da ke cikin ƙananan hukumomin Alkaleri da Kirfi, inda ɗalibai da malamai s**a amfana da tallafin.
Da yake jawabi yayin rabon kayayyakin, shugaban ƙungiyar ta ALSAN Comrade Abdurrazak Gambo Musa ya bayyana cewa shirin na daga cikin ƙoƙarin ƙungiyar na tallafa wa harkar ilimi domin inganta koyarwa da karatu a yankin.
A cewarsa, “Manufar wannan rabon ita ce taimaka wa ɗalibai su samu kayan rubutu da sauran kayayyakin makaranta domin ƙarfafa musu gwiwar neman ilimi.”
Ya kuma bayyana cewa rabon kayayyakin ya samu ne bayan tallafin da ƙungiyar ta samu daga ɗan majalisar tarayya mai wakiltar Alkaleri/Kirfi, Hon. Alhaji Kabiru Yusuf Alhaji (Makaman Duguri), wanda ya bayar da gudunmawar kayayyakin da aka raba.
Taron rabon kayayyakin ya samu halartar shuwagabannin ilimi na ƙaramar hukumar Alkaleri, wakilan ɗan majalisar na Alkaleri da Kirfi, da kuma ɗalibai daga makarantu daban-daban a yankin.
Masu halartar taron sun yabawa ƙungiyar ta ALSAN da kuma Hon. Kabiru Yusuf Alhaji bisa wannan tallafi, inda s**a bayyana cewa hakan zai taimaka wajen bunƙasa ilimi tare da ƙarfafa gwiwar ɗalibai a yankin.
