07/01/2026
Mun Shirya Tsaf Domin Karɓar Miliyoyin Baƙi Da Za Su Halarci Maulidin Sheikh Ibrahim Inyass Karo Na 40 A Katsina
Babban kwamitin shirya Maulidin Sheikh Ibrahim Inyass, karo na arba'in wanda za a gudanar a jihar Katsina a ranar 17 ga watan Janairu na wannan shekarar ya ce shirye-shiryen sun yi nisa na karɓar bakin da ake sa ran za su halarta, wanda s**a kai sama da mutum Miliyan huɗu.
Shugaban babban kwamitin shirya Maulidin Sheikh Hadi Balarabe ya tabbatar da haka ga manema labarai a babban ofishin ƙungiyar Munazzamatul Fitiyanul Islam dake hanyar Batsari a cikin garin Katsina, yau Laraba.
Sheikh Hadi Balarabe ya kara da cewa wannan shi ne karo na ukku da jihar Katsina ke karɓar wannan babban taron Maulidin Sheikh Ibrahim Inyass kuma tun daga yau an fara gudanar da na wannan shekarar. Idan za a tuna mun taɓa karɓar a 2002 da 2016 da kuma bana, wanda an fara gudanar da taron Maulidin Sheikh Ibrahim Inyass a shekarar 1986, yau shekara 40 kenan cif da fara shi a Najeriya.
Shugaban kwamitin shiryawar, Sheikh Hadi Balarabe ya cigaba da cewa a bana a ranar 11 ga wannan wata za a fara gudanar da taron masana da kara wa juna sani na kasa da kasa, wanda za a kwashe tsawon kwanaki biyar ana yinsa, wanda masana daga kasashen duniya za su samu halarta domin gabatar da makaloli da s**a shafi rayuwar shahararren malamin Addinin Musulunci, Sheikh Ibrahim Inyass.
Haka zalika za a gudanar da babban taron Maulidin Sheikh Ibrahim Inyass a ranar 17 ga watan Nan, a filin Wasa na tunawa da Sarkin Katsina, Marigayi Muhammadu Dikko dake cikin garin Katsina, wanda za a fara da misalin karfe 8:00 na safiya zuwa karfe biyu na rana.
Malam Hadi Balarabe ya tabbatar wa mahalarta wannan gagarumin taron Maulidin cewa kwamitin ya shirya tsaf domin samar da tsaron lafiya da dukiyoyi da samar da masauki ga manyan baki da duk wani abu da ake buƙata. Muna kira ga wadannan dinbin baki na mu su zamanto masu bin doka da oda, domin an gudanar da taron lafiya an kuma tashi Lafiya.
~Focus News Hausa
