GANYE 24

29/07/2026

DA ƊUMI-ƊUMI: An Kafa Ƙungiyar Ganye Old Market Progressive Minds Domin Haɗin Kai da Ci gaban Tsohuwar Kasuwar Ganye

Mazauna yankin Tsohuwar Kasuwa da ke ƙaramar hukumar Ganye a Jihar Adamawa sun kafa wata sabuwar ƙungiya mai suna Ganye Old Market Progressive Minds (GOMPM) da nufin ƙarfafa haɗin kai da kuma samar da ci gaba a yankin.

A cewar bayanin da ƙungiyar ta fitar, GOMPM ƙungiya ce mai zaman kanta da aka assasa domin bunƙasa harkokin ilimi, kasuwanci da zamantakewa tare da kare muradun mambobinta da kuma tallafa wa ci gaban Tsohuwar Kasuwar Ganye da al'ummomin da ke kewaye da ita.

An bayyana cewa ƙungiyar ta haɗa 'yan kasuwa, masu sana'o'i, ma'aikatan gwamnati, ƙwararru daga fannoni daban-daban da sauran masu ruwa da tsaki, inda za ta yi aiki bisa ginshiƙan gaskiya, riƙon amana, haɗin kai, adalci da mutunta juna.

Haka kuma, ƙungiyar za ta kasance wata kafa ta tattaunawa da warware matsalolin al'umma, ƙarfafa zaman lafiya, bunƙasa kasuwanci da kuma haɗa kai da hukumomin gwamnati, sarakunan gargajiya da ƙungiyoyin ci gaba domin samar da ci gaba mai ɗorewa.

A cikin manufofinta, GOMPM ta ce za ta mayar da hankali kan wayar da kai, horas da mambobi, ƙarfafa su da aiwatar da shirye-shiryen ci gaban al'umma domin tabbatar da Tsohuwar Kasuwar Ganye ta kasance mai tsafta, tsaro, tsari da wadata.

Shugaban Kwamitin Riƙo na ƙungiyar, Malam Lawan Inuwa, ya yi kira ga al'ummar yankin da dukkan mambobin ƙungiyar da su haɗa kai wajen tallafawa wannan yunƙuri, yana mai cewa hakan zai taimaka wajen dawo da martabar kasuwar da kuma samar da kyakkyawar makoma ga matasa masu tasowa.

An kuma buƙaci masu sha'awar samun ƙarin bayani su tuntubi lambar wayar: 08032075124.

Rahoto: Comrd Isa Oga Abdulmumini mukaddashin Kakakin Ƙungiyar Ganye Old Market Progressive Minds

14/07/2026

Yau Talata, babban rukunin gidajen rediyo da talabijin na Sin wato CMG, ya gudanar da babban taron masu kirkirar manyan shirye-shirye da fina-finai a nan birnin Beijing.

Taron ya kunshi sassa guda biyar, wadanda s**a shafi wasan kwaikwayo, da shirin talabijin na labaran gaskiya, da wasu ayyukan hadakar kafofin watsa labarai da sauran abubuwa masu inganci guda 63. Shugaban CMG Shen Haixiong, da wakilin hukumar bunkasa ilimi, kimiyya da raya al’ada ta MDD wato UNESCO a kasar Sin Shahbaz Khan, da sauran wasu manyan jami’ai sun halarci bikin, kuma sun sanar da cewa, za a nuna shirye-shirye da fina-finai masu inganci a rabin karshen shekarar 2026.

Daga: Safiyah Ma

21/05/2026

SANARWA!!! Za A Gudanar Da Gasar Karatun Al-Qur’ani Ta Nana Asma’au A Ganye Jihar Adamawa

Kwamitin shirya gasar karatun Al-Qur’ani Mai Girma ta “Nana Asma’au Qur’anic Recitation Competition” reshen jihar Adamawa, ya gayyaci daukacin al’umma zuwa wajen halartar gasar karatun Al-Qur’ani karo na uku da za a gudanar a karamar hukumar Ganye da ke jihar Adamawa.

A cewar kwamitin, za a gudanar da gasar ne daga ranar 22 zuwa 24 ga watan Mayu, shekarar 2026, inda ake sa ran mahalarta daga sassa daban-daban za su nuna kwarewarsu wajen karatu da haddar Al-Qur’ani Mai Girma.

Kwamitin ya bayyana cewa, manufar shirya gasar ita ce kara bunkasa ilimin addinin Musulunci tare da karfafa matasa da yara wajen koyon Al-Qur’ani da aiki da koyarwarsa.

Haka kuma, kwamitin ya yi kira ga masu hannu da shuni da sauran jama’a da su bayar da gudunmawa domin tallafawa gudanar da wannan gagarumin aiki na alkhairi.

Kwamitin ya kara da cewa, masu bukatar karin bayani ko wadanda ke son bayar da tallafi za su iya tuntubar su ta lambobin wayar da aka tanada domin hakan.👇🏼

Account N0: 0-0-0-3-2-5-2-1-0-3
Account N-a-m-e: Nana Asma'u Quranic Recitation Competition Yola
B-a-n-k: Taj Bank.

Lambobin waya:
08131368022
08066165820

12/05/2026

Shari’a: Kwankwaso Ya Fallasa Wadanda S**a Kai Sunansa Majalisar Dokokin Amurka Domin A Saka Masa Takunkumi

Jagoran jam’iyyar NNPP kuma tsohon gwamnan Kano, Rabiu Musa Kwankwaso, ya bayyana cewa wasu “makiya na cikin gida” ne s**a kai sunansa zuwa Majalisar Dokokin Amurka domin neman a saka shi cikin jerin wadanda za a kakaba wa takunkumi kan batun aiwatar da Shari’a a Kano.

Kwankwaso ya bayyana hakan ne yayin wata hira da aka yi da shi a gidan talabijin na Arise TV, inda ya ce abin mamaki ne yadda ake alakanta shi kai tsaye da rikicin da ya shafi dokar Shari’a, alhali kuwa tsarin ya samo asali ne tun daga jihar Zamfara kafin Kano ta bi sahu.

A cewarsa, lokacin da aka fara batun aiwatar da Shari’a a Kano a shekarar 2000, bai yi gaggawar amincewa da kudirin ba sai bayan ya gudanar da nazari mai zurfi tare da tuntubar malamai, shugabanni da masana harkokin doka.

Kwankwaso ya kara da cewa wasu mutane ma sun nuna rashin jin dadi a lokacin saboda yadda ya dauki lokaci kafin ya rattaba hannu kan dokar, yana mai cewa an bi duk hanyoyin doka da tsarin dimokuradiyya kafin dokar ta fara aiki a Kano.

Rahotanni daga Amurka sun nuna cewa wasu ‘yan majalisar dokokin kasar sun gabatar da wani kudiri mai suna Nigeria Religious Freedom and Accountability Act 2026, wanda ke neman a kakaba takunkumi ga wasu mutane da kungiyoyi bisa zargin take hakkin addini.

Sai dai magoya bayan Kwankwasiyya sun yi watsi da batun, suna masu cewa akwai siyasa a ciki, musamman ganin yadda zaben 2027 ke kara matsowa. Wasu daga cikin magoya bayan nasa sun bayyana cewa ana kokarin bata sunan Kwankwaso ne a idon kasashen duniya domin rage masa karbuwa a siyasar Najeriya.

Masu sharhi kan harkokin siyasa na ganin wannan batu na iya kara jawo muhawara tsakanin bangarorin siyasa a Arewa, musamman a daidai lokacin da ake ci gaba da tattaunawa kan hadakar jam’iyyun adawa da shirye-shiryen zaben 2027.

Daga: Daily True Hausa

12/05/2026

30/04/2026

DA ƊUMI-ƊUMI: An Fara Raba Riguna Da Kuɗi Naira Dubu Goma Ga Matasa Domin Taron Tarbar Ɗan Takarar Gwamnan Jihar Gombe Aminu Yuguda (AG) Wanda Zai Gudana A Yau Alhamis.

Ko me kuka fahimta?

25/03/2026

Al’ummar ƙaramar hukumar Ganye da ke jihar Adamawa na ci gaba da bayyana damuwa kan matsalar rashin ingantaccen hanyar sadarwa ta kiran waya da ke addabar yankin da kewaye.

Rahotannin da GANYE 24 MEDIA ta samu daga mazauna yankin sun nuna cewa matsalar ta daɗe tana ci gaba, musamman a baya-bayan nan, inda suke fuskantar tangarda wajen yin kira ko karɓar kira, musamman a wasu lokuta na rana da dare. Wasu daga cikin mazauna sun ce sau da yawa dole sai sun matsa zuwa wasu wurare kafin su samu damar yin kira cikin sauƙi.

Mazauna yankin sun bayyana cewa matsalar na shafar harkokinsu na yau da kullum, ciki har da kasuwanci, sadarwa tsakanin iyalai, da kuma harkokin gaggawa. Sun ce a lokutan da ake buƙatar kiran gaggawa, kamar lokacin rashin lafiya ko haɗari, rashin network na iya janyo babbar illa.

Haka kuma, wasu matasa da ‘yan kasuwa sun koka cewa matsalar na rage musu damar gudanar da sana’o’insu da s**a dogara da sadarwa, musamman a wannan zamani na fasaha.

Al’ummar yankin na kira ga hukumomin da abin ya shafa da kamfanonin sadarwa da su gaggauta ɗaukar matakan gyara, domin samar da ingantaccen network da zai sauƙaƙa rayuwar jama’a tare da bunƙasa tattalin arziƙin yankin.

Sai dai zuwa yanzu ba a samu wata sanarwa kai tsaye daga kamfanonin sadarwa ba dangane da matsalar a yankin.

23/03/2026

HUBBUL QUR’AN TV Na Farin Cikin Gayyatar Ku Zuwa Wajen Taron Ta Na Shekara-shekara Da Ta Keyi

Muna farin cikin gayyatarku zuwa ga, Annual National Qur’anic Conference

Wanda zai gudana Kamar haka 👇👇

🗓 Rana: 24th March, 2026
⏰ Lokaci: 10:00am – 4:00pm
📍 Wuri: Muhammadu Inuwa Yahaya Multipurpose Hall, Dukku

Wannan taro zai haɗa manyan malamai da masu karatun Al-Qur’ani domin faɗakarwa, ilmantarwa da ƙarfafa zumunci tsakanin al’umma.

🤲 Kada ku bari a baku labari ku zo ku amfana!

Allah ya bada ikon halarta

22/03/2026

Ziyarar Mataimakin Shugaban Ƙasa: Rundunar ‘Yan Sanda ta Jihar Adamawa ta kammala shirye-shiryen tsaro

Rundunar ‘Yan Sandan Jihar Adamawa ta sanar da kammala dukkan shirye-shiryen tsaro domin tabbatar da zaman lafiya da tsaron jama’a gabanin, yayin da kuma bayan ziyarar Mataimakin Shugaban Ƙasa da ake sa ran zai kai a ranar Litinin, 23 ga Maris, 2026.

A cikin wata sanarwa da Jami’in Hulɗa da Jama’a na rundunar, SP Suleiman Yahaya Nguroje ya fitar, ya ce Kwamishinan ‘Yan Sandan Jihar, CP Dankombo Morris, ya jagoranci tsara tsare-tsaren tsaro tare da bayar da umarni ga dukkan shugabannin yankuna, DPOs, kwamandojin rundunonin musamman da shugabannin sassa domin tabbatar da aiwatar da ingantaccen tsaro.

Sanarwar ta bayyana cewa an riga an yi cikakken bayani ga jami’an tsaro tare da tura kayan aiki da jami’ai a wurare masu muhimmanci, inda aka mayar da hankali kan aikin leƙen asiri, tsaron kai tsaye, da kuma haɗin gwiwa tsakanin hukumomin tsaro daban-daban.

Daga cikin matakan da aka ɗauka akwai ƙarfafa aikin tattara bayanan sirri da sanya ido a wuraren da Mataimakin Shugaban Ƙasar zai ziyarta da hanyoyin da zai bi. Haka kuma, an girke tsauraran matakan tsaro a filin jirgin sama tare da tura jami’an rundunar PMF da na yaƙi da ta’addanci (CTU).

Bugu da ƙari, rundunar ta baza jami’anta a wuraren taro, manyan gine-ginen gwamnati da sauran muhimman ababen more rayuwa, yayin da aka umarci jami’an sintiri su rika kula da manyan hanyoyi da mashigai da ficewa daga jihar, tare da ƙara yawan sintiri a cikin birnin Yola.

Har ila yau, an tanadi tsarin kula da zirga-zirgar ababen hawa domin tabbatar da tafiya cikin tsari, tare da tura ƙwararrun jami’an EOD masu gano abubuwan fashewa domin share hanya da tsaftace wuraren da za a gudanar da taruka.

Rundunar ta ce tana aiki kafada da kafada da sauran hukumomin tsaro da s**a haɗa da Sojojin Najeriya, Rundunar Sojin Sama, DSS, NSCDC, FRSC da NDLEA domin tabbatar da ziyarar ta gudana cikin lumana ba tare da wata matsala ba.

Kwamishinan ‘Yan Sandan ya kuma gargadi jami’ansa da su kasance masu bin doka da oda, ladabi da mutunta jama’a yayin gudanar da aikinsu, tare da nuna ƙwarewa da tsantseni.

Rundunar ‘Yan Sandan Jihar Adamawa ta tabbatar wa al’ummar jihar aniyar ta na kare rayuka da dukiyoyi, tare da kira ga jama’a da su ba da haɗin kai domin samun nasarar wannan ziyara.

21/03/2026

ALLAHU AKBAR: Dandazon Musulmi na sallar idi a garin Bhopal dake kasar India