27/09/2023
KU DAINA ZAƘEWA GAME DA MAGANAR MAULIDI DA TIJJANAWA - KU DADDAGE A KAN MAHAƊINMU DA SU
A jerin gwano na matakai na da'awa da Manzo ﷺ ya bi tun farkon lamarinsa, Tauhidi ya fara kira zuwa gare shi, lamarin da ya ɗauke shi tsawon shekaru goma (10) gabanin a farlanta salloli, wanda daga nan, bayan hijra, sauran rukunnan Musulunci s**a biyo baya: zakka, azumi, hajji, hukunce-hukuncen jihadi da hukunce-hukunce game mu'amaloli.
Wannan jerin gwano na matakai na da'awa doli ne kiyaye shi a kowane lokaci da kowane bagire.
Lallai dukda maulidi bid'a ne, saidai ba shi ne ainihin asulin abunda ya haɗa mu faɗa da Tijjanawa ba. Asulin abunda ya haɗa mu faɗa da su shi ne ilhadi da shirka.
Bisa ga wannan, dukda ba za mu kame baki daga maulidi ba duk lokacin da bayani game da shi ya wajaba, amma ba Manhajo ba ne zaƙewa game da shi tsakaninmu da Tijjanawa, muna masu susucewa game da maganar Tauhidi da ita ce ainihin abu da ya haɗa mu faɗa da su.
Lallai doli ne mu bari Tijjanawa su ci gaba da sanin cewa ko sun daina bid'ar maulidi ba su zama Ahlussunna da wannan, saboda, dukda kasancewarsa bid'a, saidai ba wani daga cikinmu da ya riya cewa bid'a ce mai kafirtarwa daga Musulunci, ta fuskar shi karan kansa maulidin kawai.
Duk lokacin da na ga wani daga cikin Ahlussunnah ya zaƙe da Tijjanawa game da maulidi, hakan na sa in ji kamar yana nuna wa Tijjanawa ne cewa da za su bar maulidin da sun zama Ahlussunnah, wanda ko kusa. Ya za mu shiga bayani game da so ga Annabi ﷺ da wanda ko shigowa Musuluncin bai yi ba lura da akidarsa a jumlace?
Saboda haka doli mu riƙe cewa:
"TAUHIDI DAI GABANIN MAULIDI".
