03/06/2026
An Bawa Darakta Ashiru Nagoma Kyautar Sabon Mashin Da Kyautar Kudade Ta Dalilin Maishadda
Daga Ahmad Nagudu
Bayan ziyarar da fitaccen Furodusa Abubakar Bashir Maishadda ya kai wa tsohon Darakta a Kannywood wato Ashiru Nagoma a ranar Talata, 2 ga watan Yuni na shekarar 2026, da kuma fitar hotuna da bidiyon da ya dauka na daraktan, an samu wani bawan Allah ya bawa daraktan kyautar sabon Babur da kuma kudi ta hannun Maishaddan kwana ɗaya a tsakani.
Bawan Allahn mai suna Alhaji Khamisu Musa Shehu (Hasken Yobe) ya aiko da kudi kimanin Naira Miliyan 1 ne ta hannun Maishadda don ya saya masa Babur ɗin tare da kuma karin kyautar kudi wadda kuma duka aka damkawa Nagoman a ranar Laraba 3 ga watan Yunin.
A yayin da ya ke mika masa makullin Mashin da kudaden, Maishadda ya bayyana Haske Yobe a matsayin masoyin Darakta Ashiru Nagoma tsawon shekaru, kuma wannan dalilin ne ya sa ya aiko da wannan kyauta zuwa gare shi.
A na shi bangaren a yayin da ya ke godiya ga Hasken Yobe, Nagoma ya yi masa godiya sosai tare da nuna farin ciki kan wannan abun alheri tare da albishir ga daukacin masoyan sa kan su jira ayyukan sa da ke tafe nan ba da jimawa ba masu dauke da fadakarwa da darussa kamar yadda ya saba a baya.
Haka nan, Maishadda ya yi kira ga duk masoya tsohon darakta Nagoma masu sha'awa ko son taimakon sa a ciki da wajen masana'antar Kannywood da cewa kofa a bude take. Za su iya tuntubar sa kai tsaye don isa zuwa gare shi.
- Ahmad Nagudu
Nagudu TV 📺
