04/04/2025
Tsohon Shugaban Hafsoshin Sojin Sama, Sadique Baba Abubakar, Ya Halarci Jana’izar Sheikh Idris Tanshi
Bauchi, Najeriya – Tsohon Shugaban Hafsoshin Sojin Sama kuma Jakadan Najeriya a kasar Chadi na baya, Air Marshal Sadique Baba Abubakar (ritaya), ya halarci jana’izar fitaccen malamin addinin Musulunci, Sheikh Idris Tanshi, da aka gudanar a yau Juma’a a Jihar Bauchi.
Taron jana’izar ya samu halartar manyan malamai, jami’an gwamnati, sarakunan gargajiya da daruruwan mutane da s**a zo don girmama rayuwa da gudummawar da marigayin ya bayar wajen yada ilimin addini da shugabancin al’umma.
A cewar mai taimaka masa na kafafen yada labarai, Mazi Yari, Air Marshal Abubakar ya halarci jana’izar ne don girmama Sheikh Tanshi, wanda ya bayyana a matsayin "ginshikin hikima, tawali’u da shugabanci na ruhaniya." Yari ya kara da cewa tsohon Hafsan Sojin Sama ya nuna alhini tare da mika ta’aziyyarsa ga iyalan marigayin da al’ummar Musulmi baki daya.
“Sheikh Tanshi ba kawai malami ba ne, amma jagora ne na zaman lafiya da fahimtar juna,” in ji Yari a madadin Abubakar.
Tsohon Jakadan ya shiga sahun sauran manyan baki wajen yin addu’a domin Allah Ya jikan Sheikh Tanshi Ya kuma saka masa da Aljannatul Firdaus.
Sheikh Idris Tanshi ya shahara wajen yada ilimin addinin Musulunci da hada kan al’umma. Mutuwarsa babban rashi ne ga addini da ilimi a Jihar Bauchi da Najeriya baki daya.
Daga: Mujahid Saleh Saad
