29/05/2026
A zamanin baya, akwai wani sarki da ya mulki wata ƙasa mai albarka. Mutanen ƙasar suna da wadataccen ruwa saboda akwai manyan rijiyoyi da magudanan ruwa da gwamnati ke kula da su.
A farkon mulkinsa, aikin sarki shi ne tabbatar da cewa rijiyoyi suna aiki, ana gyaransu idan sun lalace, kuma ruwa yana isa ga kowa.
Amma saboda son yabo da neman farin jini cikin sauri, sai sarkin ya daina kula da rijiyoyin. A hankali rijiyoyi s**a fara lalacewa, wasu s**a bushe, wasu kuma s**a rushe gaba ɗaya.
Bayan wasu shekaru, mutanen ƙasar s**a shiga ƙunci. Ruwa ya yi ƙaranci, noma ya tsaya, rayuwa ta yi tsada. Talakawa s**a fara kuka suna neman mafita.
Sai sarki ya ga dama.
Maimakon ya gyara rijiyoyin da s**a lalace, sai ya sayo tankokin ruwa ya rika zagayawa yana rabawa mutane ruwa kyauta. Duk lokacin da ya zo, jama’a suna taruwa suna yi masa kirari:
“Sarki mai tausayi!”
“Sarki mai taimakon talakawa!”
Sai wani dattijo ya yi murmushi ya ce:
“Da farko aikin sarki shi ne ya tabbatar rijiyoyi suna aiki domin mutane su sami ruwa da kansu. Yanzu da ya bar wannan aiki har matsala ta faru, sai ya zo yana raba ruwa domin a yaba masa. Da ace rijiyoyi suna aiki, ai ba sai ya rika rabon ruwa ba.”
Dattijon ya ƙara da cewa:
“Shugaba mai kyau ba wanda yake yawan raba agaji bayan matsala ta faru ba ne; shugaba mai kyau shi ne wanda yake hana matsalar faruwa tun farko.”
Haka nan ma idan aka lalata tsarin noma, ilimi, lafiya ko tattalin arziki, mutane su shiga wahala, sannan a rika rabon kuɗi ko kayan agaji, ya kamata a tambaya:
Shin da an kula da tsarin tun farko, da wannan wahalar ta faru kuwa?
A darasin wannan labari, ba kowace kyauta ko agaji ce ke nuna kyakkyawan shugabanci ba. Wani lokaci mafi girman taimako shi ne gina tsarin da zai hana mutane shiga matsala tun daga farko.
A ra’ayinku, wane ɗan takara ko shugaba ne kuka fi ganin yana son gyara tushen matsala, kuma wane ne kuka fi ganin yana jira matsala ta faru sannan ya zo da maganinta? Ku bayyana ra’ayinku cikin mutunci.
