08/06/2026
An Nemi INEC ta Soke Rijistar NDC, An Shigar da Sabon Kara a Kotu
Ahidjo Karlahi, daraktan ADA, ya shigar da kara a kan NDC, yana neman INEC ta soke rijistar jam’iyyar.
An shigar da karar ne a ranar Talata da ta gabata a gaban Babban Kotun Tarayya dake Abuja, mai lamba FHC/ABJ/CS/1115/2026, kuma Shugaban babbar Kotun tarayya (FHC), shine ya bai wa Justice Mohammed Umar alhakin sauraron karar.
Rahoton Daily Trust ya nuna cewa Seriake Dickson, jagoran NDC, ya tabbatar cewa babu wata kara ko daukaka kara da ke kalubalantar rijistar jam’iyyar. Dickson ya bayyana hakan ne a yayin taron farko na kasa na jam’iyyar da aka gudanar a Abuja, inda ya ce jam’iyyar tana da cikakken halaccin aiki kuma an hade ta a shirye-shiryen zaben 2027.
Amma a cikin karar da Karlahi ya shigar, ADA ta ce NDC ba ta cika sharuddan doka da kundin tsarin mulki da ake bukata ba kamar yadda aka tanada a Sashe na 221-225A na Kundin Tsarin Mulkin Tarayyar Najeriya, 1999 (kamar yadda aka gyara) da kuma Sashe na 75 da 79 na Dokar Zabe, 2022.
Karlahi, wanda ya hada INEC da NDC a matsayin wadanda ake kara da su na farko da na biyu, ya yi ikirarin cewa NDC ba ta cikin jerin kungiyoyin da aka cancanci su yi rajista a 2025. Ya ce NDC ta kauce wa duk matakan da doka ta tanada, don haka bai kamata a yi mata rijista a matsayin jam’iyya ba.
Ya ce:
“NDC ba ta cikin jerin kungiyoyin da aka amince su yi rajista a 2025.
NDC ba ta biya kudin gudanarwa na Naira miliyan 2 ba kuma ba ta samu lambobin shiga tsarin rajista na INEC ba.
NDC ba ta amfani da shafin rajistar jam’iyyu na INEC wajen cike fom EC15A ba, wanda shi ne hanyar da doka ta amince da ita don yin rajista.
Wannan ba zargi kawai ba ne – abubuwan suna cikin kundin tarihi na jama’a.”
Karlahi ya bukaci kotu ta bayyana cewa ci gaba da daukar NDC a matsayin jam’iyya abu ne marar doka, ba halatta, ba daidai ba, kuma babu tasiri.
Ya kara da cewa:
“Kara ta na neman kotu ta bayyana cewa:
Kundin tsarin mulki ba ya ba da damar rajistar wata kungiya da bata cika sharuddan doka ba.
Ci gaba da daukar NDC a matsayin jam’iyya da INEC ke yi ba bisa doka ba ne.
A soke takardar rajistar NDC da INEC ta bayar. A umarci INEC ta dakatar da duk wata hulda da NDC a matsayin jam’iyya.
A hana NDC ci gaba da gabatar da kanta ko shiga harkokin zabe a matsayin jam’iyya mai rajista.
Karlahi ya bayyana cewa wannan karar ba ta da wata manufar siyasa ko ta kashin kai, kuma ba a shigar da ita ne a madadin wata kungiya ko rukunin mutane ba, ciki har da ADA.
Ya ce:
“Na yi imani cewa gaskiya a zabe shi ne ginshikin dimokuradiyya. Idan tsarin rajistar jam’iyyu ya lalace, dukan tsarin dimokuradiyya zai shiga cikin hadari. Wannan karar gudummawa ce ta kokarin kiyaye tsarin.”
Ya kuma yi kira ga duk ‘yan Najeriya, ba tare da la’akari da jam’iyya, kabila ko addini ba, da su fahimci wannan lamari, su tallafa, kuma su hakura yayin da shari’a ke gudana.
Ya kara da cewa:
“Kotu ita ce mafaka ta karshe ga talakawa kuma ita ce babban mai kiyaye kundin tsarin mulki. Ina da cikakken amincewa ga hukuncin kotu.”
Me za ku ce?
