05/02/2025
Shi Mal. Albani Zaria (رحمه الله) a wajena malami ne kuma uba. Mutum ne mai zurfin hangen nesa. Ga shi da son alheri. Ga tarin karatu na ɗar-ma-sa'a. Ba shi da manufa sai ƴaɗa sunnar Manzon Allah (SAW)
Mutum ne mai kwarjini sosai. In ba ka san shi kai tsaye ba, zai yi wuya ka fahimce shi da wuri. Musamman in ka fara gamuwa da magautansa.
Amma in ka sa san shi kai tsaye, to ka san irin sauƙin mu'amalarsa da falsafarsa game da rayuwa da tawali'unsa da kuma tarin manufofi na nesa kamar bature.
Mal. Albani zai koya ma karatu, ya ba ka kudi ya ba ka shawara akan ilimi da kasuwanci da noma da aure da sauransu.
Ba shakka in dai ka zauna da Mal Albani Zaria to kuwa za ka koyi abubuwa da yawa a rayuwa da addini.
Ga shi dai babban malami, amma ba ya raina tunanin ɗan ƙaramin ɗalibi. Yana son a saki jiki a tattauna mas'ala, in kuma ya gane cewa ra'ayin waninsa ne daidai sai ya karɓa hannu bibbiyu. Sannan kuma in an gan ku tare sai ya ce wa mutane kai abokin sa ne.
Allah Ubangiji ya ji ƙan Mal. Albani, Allah ya sa mutuwa hutu ce. Allah ya ɗaukaka darajar sa.
Dr. Kabir Abubakar (Asgar) Hafizahullah
