05/04/2026
Matasa Su Tashi Domin Dimokuraɗiyyar Najeriya NYA Ta Yi Kira
Najeriya na cikin mawuyacin hali Sanata Gumba ya yaba da kishin ƙasa na NYA
Bauchi, Najeriya — 5 ga Afrilu, 2026
Shugaban National Youth Alliance (NYA), Ambasada Aliyu Bin Abbas, ya yi kira ga matasan Najeriya da su tashi tsaye da jarumtaka, haɗin kai, da kyakkyawan buri domin kare dimokuraɗiyyar ƙasa da makomarta.
An yi wannan kira ne a yayin taron karawa juna sani na NYA mai taken “Haifar da Sabuwar Najeriya”, tare da rantsar da masu kula da ƙananan hukumomi 112 na shiyyar Arewa maso Gabas, wanda aka gudanar a Jihar Bauchi.
A cikin jawabinsa, Ambasada Abbas ya bukaci matasa su kasance masu ladabi, gaskiya, da sadaukarwa ga aikin ƙasa, yana mai jaddada cewa alhakin sake gina da farfaɗo da Najeriya yana hannun matasa.
Ya ce: “Najeriya na cikin wani mawuyacin lokaci. Dole ne mu tashi tsaye da ƙuduri da hangen nesa guda domin ceton ƙasarmu da kuma mayar da ita kan turbar da ta dace.”
Ya kuma jaddada muhimmancin shigar matasa cikin shugabanci da harkokin mulki, yana mai cewa lokaci ya yi da sabon ƙarni zai ɗauki nauyin kare dimokuraɗiyya da kuma ci gaba da sadaukarwar jaruman ƙasa na baya.
Baƙon mai jawabi, Sanata Adamu Ibrahim Gumba, ya yaba wa NYA bisa hangen nesa da kishin ƙasa da take nunawa wajen sauya fasalin Najeriya. Ya kuma ƙarfafa gwiwar mambobi da su shiga harkokin siyasa tare da aiki a cikin ingantattun tsare-tsare domin samar da sauyi mai ɗorewa.
Haka zalika, Kwamishinar Jinƙai ta Jihar Bauchi, Hajara Yakubu Wanka, ta bayyana fata mai kyau kan rawar da matasa za su taka wajen gina ƙasa, tana mai cewa haɗin kai, jajircewa, da hangen nesa na matasa za su kai Najeriya ga ci gaba mai dorewa.
Wannan taro ya zama wani babban mataki a ƙoƙarin NYA na haɗa kai, ƙarfafa gwiwa, da kuma bai wa matasan Najeriya dama domin gina ƙasa mai cike da adalci, ci gaba, da dimokuraɗiyya mai ƙarfi.labarin GAZE TV NEWS HAUSA
