19/09/2025
Na ƙalubalanci Ganduje da ya nuna aiyuka 4 da ya kammala a shekaru 8 na mulkin sa a Kano - Gwamna Abba
Gwamnan jihar Kano, Abba Kabir Yusuf ya caccaki tsohon gwamna Abdullahi Umar Ganduje, inda ya zarge shi da wawure dukiyar talakawa ba tare da ya yi wani aikin a zo a gani ba.
Da ya ke jawabi a yayin rabon takardar daukar aiki na dindindin ga malaman BESDA su 4, 315, wanda ya gudana a filin wasa na indo a jihar Kano a yau Alhamis, gwamna Abba ya ƙalubalanci Ganduje da ya nuna aiyuka hudu kacal da ya kammala a shekaru takwas na mulkin sa.
Gwamnan ya kuma zargi Ganduje da zaluntar ma'aikata da yan fensho, inda ya ce "da a lokacin su ne da wannan odar ta aiki sigar muku da ita za su yi."
"Sun zalunci ma'aikata, sun zalunci malaman makaranta da yan fensho.Gashi nan mun taba ofa kuma ba wanda ya bada ko sisi. Mun duba cancanta ne mu ka ɗauke ki aikin nan," in ji Gwamnan.
Gwamna Abba ya kuma zargi gwamnatin Ganduje da yiwa lalitar gwamnatin jihar karkaf, inda ya ce a takardun mika mulki, ya ga asusun da wani banki ke bin Kano Naira dubu 9.
Ya kuma ce gwamnatin sa na yin mulki ba tare da cin hanci da rashawa na, inda ya ce dalilin da ya sa ta tara makudan biliyoyin Naira a asusun ta kuma da su ake dimbin aiyuka a jihar.
Gwamnan ya ce yan APC na sukar gwamnatin sa ne saboda suna buƙulun farin jinin ta sakamakon irin ayyukan da take yi a jihar.
A ƙarshe ya hori ma'aikatan da su yi aiki da gaskiya da rikon amana.
Ya kuma umarci hukumar SUBEB da ta ƙara daukar wani rukunin na malaman makarantun firamare.
