17/07/2025
My Purge Chronicles – 24th September 2020 Edition 😂
That day na 24th of September 2020. I bin wan travel go Calabar. As I dey go, I branch for Enugu stop greet my cousin sister. She come give me yam and that local sauce join. I chop am sharp-sharp, say make I continue my journey.
Na there wahala start 😩. For road like this, my belle begin do me one kain... I no even suspect say na purge dey load. I think say na that kind belle wey go do you small then go rest... but this one get mission!
I bone face, no talk, just dey endure. I dey pray for my mind say make driver stop for break. E no stop o! Wahala wear suit.
The thing come dey hot for my body, na so I dey sweat anyhow. One fine bobo wey sitdown beside me come ask, “Are you okay?” I just squeeze smile reply am, “Yes, I’m fine” 😅. But my eyes don already turn red like tomato wey wan burst.
As God go do am, driver finally stop to drop one passenger. Before I fit shout hallelujah, heat wey pass both white and brown full my body. My body start to shake. I swear, e be like say I wan evaporate 😭.
Driver drop me for junction wey I suppose enter another motor go my final destination. Na there the devil nearly catch me for real 😩. I gather the last strength wey remain for my soul hold the thing like say na fasting and prayer dey my mind.
As I reach gate of where I dey go, na there the thing begin pour by force🤧no permission, no brake. I tear race like say I be Spider Woman 🕷️💨. If you see the way I take jump enter house ehn! I go beat Usain Bolt for that moment!
Till today, I no fit forget that wahala. I see SHEGE that day. Make nobody ever chop yam and sauce join long journey again abeg 😂😂😂.
