Mbido Igbo

Home
Mbido Igbo

Ịkwado agụụ mmụta asụsụ na omenala Igbo.

29/07/2025

Ncheta Chukwuma Nzeọgwụ na Ụmụnakwe Agụiyi-Irọnsị

N'ụbọchị taa ka soja ụmụ Igbo abụọ a, zara oku ọnwụ. Nzeọgwụ nwụrụ na agha Biafra n'afọ 1967, ebe Agụiyi-Irọnsị nwụrụ n'afọ 1966, n'aka ndị soja Naịjirịa. Nzeọgwụ bụ onye Anịọma dị na Delta Steeti. Ọ banyere armị n'afọ 1957, ebe o ruru ọkwa majọ.

Mgbe agha Biafra malitere, Nzeọgwụ nke ruola ọkwa "Lt. Colonel" na armị ndị Biafra zutere ọnwụ ya na Nsụka. Ka agha biri, onyeisi ala bụ Gowon nyere iwu ka e lie ozu ya na "Military Cemetery" nke dị na Kaduna, ma kwanyere ya ugwu ruru ya.

A mụkwara Johnson Ụmụnakwe Agụiyi-Ironsi n'ụbọchị nke atọ, n'ọnwa March n'afọ 1924. Ọ bụ onye Ibeku dị n'Ụmụahịa, Abịa Steeti. Ọ banyere armị n'afọ 1942, ebe o ruru ọkwa Majọ-Generalụ. E mere ya onyeisi ala Naịjirịa na Janụarị n'afọ 1966 ka Nzeọgwụ na ndị soja ụfọdụ wetara ọchịchị ndị nkịtị na njedebe.

A kpara ya nkata ọnwụ na Ibadan nke ọ dabara n'ime ya. E gburu ya na Fajuyi na Ibadan. Agụiyi-Ironsi Ironsi gbara afọ iri anọ na abụọ oge ọ nwụrụ. Ka mkpụrụ obi ụmụ Igbo abụọ ndị a na-ezu ike n'udo.
Amen 🙏🏾

25/07/2025

"Ihe dị na mmadụ ịbụ ọgaranya sigburu onwe ya n'ike. Ọgaranya ga na-eme nke o ji bụrụ ọgaranya, makana ọgaranya mewe ka ogbenye, e lelịa ya ka e si na-eleli nwa ogbenye."

Tony Ubesie.

21/07/2025

Ncheta Buchi Emecheta

N'ụbọchị taa n'afọ 1944 ka a mụrụ Buchi Emecheta na Legọs. N'agbanyeghị na anaghị akwado ụmụnwaanyị ịje akwụkwọ n'oge ahụ, Buchi ekweghị ka o gbochie ya ịga akwụkwọ.
Akwụkwọ ụfọdụ ọ dere dịka nnukwu odee akwụkwọ n'oge ya, gbara mkpagbu ụmụnwaanyị ibe ya na-agabiga n'anwụ tụmadị ndị nọ na di ka ụwa mara.

N'ezie, ọ bụ ndị dị otu a ka ndị ọgbọ ọhụrụ a kwesịrị ịṅomi.

Daalụ nụ.

20/07/2025

Ncheta Sir B.O Chiedu(Ugodịnobi)

N'ụbọchị taa n'afọ 2001 ka Benneth Okoye Chiedu zara oku ọnwụ. Ọ bụ onye Ọraukwu nwere mmasị pụrụ iche ịkwalite asụsụ Igbo. Dị ka onyeisi ụlọọrụ "Kawuriz & Manilas Publishers," o bipụtara akwụkwọ Igbo abụọ bụ ọkpọkọpị.

Otu bụ Igbo Grammar, nke ọzọ bụ Mbido Igbo(1989). Ọzọkwa, o bidoro asọmpi agụmagụ Igbo n'ụlọakwụkwọ dị n'ala Igbo.

Sir B.O gaa n'ihu na-ezu ike n'udo. Anyi ka ji ọrụ ọma gị dum wee na-echeta gị.

19/07/2025

Ncheta Ụbọchị A Mụrụ

Taa bụ ụbọchị ncheta a mụrụ Okwute Ndị Igbo. Ekpere anyị bụ ka ogologo ndụ, ahụike na amara Chineke bara ya ụba. Ndị ajọ mmụọ na mmadụ agaghị ahụ ya maọbụ zute ezinaụlọ ya.
Ọ bịara igbu ya ga-egbu onwe ya. Ebumnobi ya banyere Naịjirịa ị gbanwee ma gawa n'ihu ga-abịa na mmezu.

Isee!!!🥂🍾🎂🎼

18/07/2025

Ncheta Archbishop Onyemelụkwe

N'ụbọchị taa n'afọ 2011 ka Archbishop Onyemelụkwe zara oku ọnwụ. Ọ bụ onye Nanka nke dị n'Anambra Steeti, ma gakwa ụlọakwụkwọ DMGS. Dịka Bishop Niger Diocese, o hibere ọtụtụ ụlọakwụkwọ tinyere ụlọọgwụ.

Ka mkpụrụ obi ya na-ezu ike n'udo.
Amen 🙏🏾

17/07/2025

"Unu eṅomisịna ndị ọcha n'ihe niile. Ndị ọcha e meela elu ụwa a, eluigwe ha. Ma unu onwe unu, unu a ga-ata ahụhụ, ma n'ụwa a na ọzọ na-abịa?"

Fr. Cyprian Iwene Tansi.

13/07/2025

Abụ Ofufe
Ụbọchị Ụka

🎶Onye na-edu m
Ọ gaghị ekwe ka m nwụọ n'ụzọ
Onye na-edu m
Ọ gaghị ekwe ka ịhere mee m ooo
Onye na-edu m
Ọ gaghị ekwe ka m nwụọ n'ụzọ
Onye na-edu m agaghị ekwe🎶

🎶Ị mara mma
Ị dị ebube
Ị dị oke ọnụ ahịa
Ewooo
Jehova bụ Chineke
Onye anyị na-efe
Riwe otuto na ịbụ ọkaka.🎶

12/07/2025

Ncheta Ụbọchị Amụrụ Rita Dominic Anọsike

Taa bụ ụbọchị ncheta a mụrụ Rita Dominic Anọsike. Ekpere anyị bụ ka ogologo ndụ, ahụike na amara Chineke bara ya na ezinaụlọ ya ụba. Ndị ajọ mmụọ na ndị ajọ mmadụ agaghị ahụ ya n'ụbọchị Eke, Orie, Afọ na Nkwọ. Ya gazie. 🎊🎶🍾🎉🍷🥂🍰🎂

10/07/2025

Ndị Igbo Ji Eme Ọnụ
Ada Priscilla Nzimiro

A mụrụ Ada na Port Harcourt n'ụbọchị iri atọ n'ọnwa April, n'afọ 1923. Ada banyere mahadum dị na "Glasgow Scotland," ebe ọ gụrụ ma nara ọzụzụ ịbụ dọkịta Bekee bido n'afọ 1945 ruo mgbe ọ pụtara n'afọ 1950.
Nke a mere ya nwaanyị mbụ bụ Dọkịta n'ala Igbo. Ọ nwụrụ ka ọ dị naanị afọ iri abụọ na asaa. Nke a mere e ji gbanwee "William Wilberforce Academy" nke nne na nna ya guzobere wee gụọ ya "Priscilla Memorial Grammar School" iji wee na-echeta Ada.

04/07/2025

Abụ Une
Agaghị M Aba N'Ụlọ Onye Kpọrọ M Asị

Mmiri zowe, zowe
Anwụ mụwa, mụwa-o
Agaghị mụ aba n'ụlọ onye kpọrọ m asị
Ọ na-akpọ m onye iberibe
Kpọọ mụ onye na-aṅụ mmanya
Hapụnụ mụ oo, ka m were aka mụ
Zụwa onwe mụ o-o.

03/07/2025

Akụkọ Ifo
Ihe Mere Ezi Ji Adụ Imi N'Ala

Mbe na ezi bụ enyi. Otu mgbe agụụ chọrọ igbu ha n'ezinaụlọ ha. Ha wee bilie gawa na nke mgbada. Mgbada bụkwasị nnukwu ọgaranya n'obodo ụmụ anụmanụ n'oge ahụ. Ha gakwuru ya ka o nye ha ọrụ, ha rụcha ọ kwụọ ha ụgwọ.

Ha malitere rụwa ọrụ. Ka ha rụchara, mgbada kwụrụ ha ụgwọ. Ma ego mbe natara ejughị ya afọ. Ọ rịọrọ ezi ka ọ gbazinye ya ego, kwee ya nkwa na ọ ga-akwụ ya ma izu abụọ gachaa. Ezi wee mee otu ahụ.

Ka oge ruru, mbe malitere ị mịpụ n'ụlọ ya n'isi ụtụtụ tutu mgbada bịa. Mgbada bịa, nwunye mbe asị ya na di ya anọghị ya. Ihe a ka o megidere iwe wee jide ezi. Ọ gwara nwunye mbe na ọ bịa echi, mbe e nyeghị ya ego, o mebie ihe. Ka mbe nụrụ nke a, aṅụrị ju ya obi. O wee siere ezi ọnya.

Ezi bịara echi hụ Anịm ka ọ na-ezu ihe n'ịkwe, jụọ ya ase mbe. Anịm asị ya na ahụ adịghị ya. Ozigbo, ọ maburu ikwe Anịm tụba n'ime ọhịa n'iwe lawa. Ọ maghị na ọ bụ mbe bụ ihe ahụ. Mbe biliri were nwayọ chere ka ọ laa, wee bata n'ụlọ ya. Na mgbede, ezi abịakwa ọzọ kwudo mbe. Ma mbe kwere ya nkwa na o bute ikwe ya na ọ ga-akwụ ya ụgwọ.

Ezi maba n'ime ọhịa, ma ọ hụghị ikwe ahụ. Ọ bụ ya mere ezi ji adụgharị imi n'ala ruo taa ka ọ mara ma ọ ga-ahụ ikwe mbe.

O nwere ihe ị mụtara n'akụkọ ifo a?

Zitere anyị ozi.
Ya gazie.

Address

Opening Hours

Monday	09:00 - 17:00
Tuesday	09:00 - 17:00
Wednesday	09:00 - 17:00
Thursday	09:00 - 17:00
Friday	09:00 - 17:00

Telephone

08067964763

Website

http://www.mbidoigbo.com/

Alerts

Be the first to know and let us send you an email when Mbido Igbo posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Mbido Igbo:

Shortcuts

Address
Telephone
Opening Hours
Alerts
Contact The Business
Claim ownership or report listing
Want your business to be the top-listed Media Company?

Country:

City: