08/03/2026
SALLAR TAHAJJUDI TARE DA SIFIKA:
Hana liman yin sallar tahajjudi tare da sifika daidai yake da hana liman yin sallar asuba da azahar da la’asar da magariba da isha’i da idi tare da sifikar; saboda bayani kamar haka:
Na farko dai yana da kyau al’ummar Musulmi su san cewa shi yin sallar tahajjudi da maza da mata suke yi tare a cikin jama'a a masallaci a goman ƙarshe na Ramadan abu ne da ya dace da ingantacciyar Sunnar Annabi mai tsira da amincin Allah; saboda hadithai sun inganta a kan cewa Annabi mai tsira da amincin Allah ya yi wa al'ummar Musulmi maza da mata limancin wannan sallar a cikin wasu daga cikin waɗannan kwanaki da muka ambata.
Abu na biyu shi ne yana da kyau a san cewa shi limamin jama’a yana bayyanar da karatunsa ne cikin irin waɗannan salloli na dare; duk kuwa inda bayyanar da karatun sallar liman ya shar'antu, ko ya halatta to kuwa ya halatta shi liman ɗin ya yi wannan karatu nasa sifika kuma ta ɗauka, babu saɓanin mujtahidai cikin wannan lamarin a iya sanina. Allah muke roƙon Ya karɓi ibadodinmu, Ya kuma taimake mu har kullum. Ameen.
