19/05/2026
An Samu Cigaba game da Batun Kwalejin Fasaha ta Gwamnatin Tarayya dake Rano
Bayan shafe fiye da shekaru, ana kai komo domin tabbatar da kafuwar Kwalejin Fasaha ta Gwamnatin Tarayya ta Rano, bisa wakilci da jagorancin Rt. Hon. Kabiru Alhassan Rurum, a yau Gwamnan Kano ya tabbatar da mallakawa wannan makaranta gine-ginen Makarantar SORTED, wadda aka fi sani da RURAL domin fara ayyukan koyo da koyarwa.
Haka na Mai Girma Gwamna ya sake yin alkawarin mallakar da babban asibitin Rano domin ya zama Cibiyar Kiwon Lafiya ta Rano wadda ita ma an samar da ita ne bisa wakilcin Rt. Hon. Kabiru Alhassan Rurum.
Da wannan sabon cigaba da muka samu, zamu iya cewa ayyukan gudanarwar sabuwar Kwalejin Fasaha ta Rano (Federal Polytechnic Rano) zai kankama nan ba da jimawa ba. Muna matukar farin cikin domin wadannan manyan ayyuka ne da bamu saba ganin irin su a yankunan mu ba. Ayyuka ne da zasu samar da guraben ayyukan yi ga matasa maza da mata masu yawa tare da habaka fannonin ilimi, kiwon lafiya da tattalin arzikin mutanen wannan yanki namu.
Da fatan Allah ya tabbatar mana da alkhairin dake cikin wadannan manyan ayyuka. Ina taya mutanen Rano, Kibiya da Bunkure, dama mutanen Kano ta Kudu murnar samun wadannan nasarori. Allah ya ba wakilan mu damar cigaba da farauto mana irin wadannan ayyuka da zasu taba rayuwar mutanen mu kai tsaye, amen.
Kawu Sule Rano
18/05/2026
