24/04/2026
Turanci ba Ilimi bane🛞
Babu yadda za a yi mu tashi muddin muna amfani da fika-fikan da ba namu ba.
Iƙirarin kwarewa a harshen Turanci ya zama sarka dake daure mana tunani, alhali gaskiyar ita ce Turanci harshe ne kawai na sadarwa, ba ma'aunin INTELLIGENCE ba. Idan har kana tunanin cewa sai ka iya Turanci ne sannan kake da ilimi, to ka fada cikin babban tarkon da aka dana wa Afirka tun shekarar 1884 a taron da akayi a Berlin; tarkon da aka sanya don mutum ya raina asalinsa, ya watsar da harshen mahafiyarsa, sannan ya rungumi ilimin da yake koya masa yadda zai yi wa wasu aiki, maimakon yadda zai gina kansa.
Je ƙasar Denmark, za ka ga ana koyarwa da yaren Danish; je Norway, Norwaygian ake amfani da shi; haka Japan, je india, spain da China, kowannensu da harshensa yake kera fasaha da kimiyya. Amma mu a nan Afirka, musamman a Arewacin Najeriya, an koya mana cewa muddin baka iya Turanci ba, to baka da wayo, koda kuwa kana da basirar da zata iya sauya duniya. Wannan shi ne babban kuskuren da ya sanya muke da injiniyoyin da ba za su iya gina mana hanya ba, sai chinawa sun zo, muna da likitocin da idan s**a kamu da rashin lafiya sai dai a kaisu Dubai ko Jamus, domin ba su amince da tsarin da s**a karantu akai ba. Ilimin da aka bamu ba na kirkira ba ne; ilimi ne na samar da ma'aikata (Clerks) bayi wadanda za su rinka mara wa daular mulkin mallaka baya.
Babban abin mamakin ma shi ne yadda muke alfahari da digiri a fannin aikin gona, amma bamu iya banbance tsakanin akuya da tunkiya a aikace ba. Muna da furofesoshi a fannin likitanci, amma lokacin da annobar COVID ta zo, daukacin Afirka kuka muke yi muna roƙon Moderna dq Pfizer daga Amurka, ko Sputnik daga Rasha; wannan yana nuna cewa iliminmu ba shi da asali a cikin bukatar al'ummarmu. An dasa mana kiyayya da kanmu ta yadda idan yaro ya yi magana da Hausa ko wani harshe na asali a makaranta, sai a kira shi Vernacular a sanya masa tara, alhali a nan ne asalin tunaninsa da basirarsa suke. Mafi girman hankali shi ne Metacognition, ikon lura da yadda kake tunani; amma mu an mayar da mu Autopilot, muna maimaita abin da aka gaya mana ba tare da mun tantance amfaninsa ba.
Gaskiyar dake boye ita ce, matuƙar ɗan Afirka bai gane cewa wayewa ba ita ce sanya kwat da riga a cikin zafin da ya kai digiri 40 ba, to har yanzu yana cikin sarka. Ilimi na gaske shi ne wanda yake magance matsalolin al'ummarka ta hanyar amfani da abin dake ƙasa, ba wanda yake sanya ka zama mabaracin ra'ayin wasu ba. Lokacin da kuka ga mutum yana takama da Turanci yana raina harshensa, shi ba san cewa har yanzu yana cikin barcin da aka sa shi tun karni na 19 ba.
Lokaci ya yi da za mu farka, mu gane cewa babu yadda za a yi mu tashi muddin muna amfani da fika-fikan da ba namu ba.
