https://www.facebook.com/nuraprimemedia

Nura AG, Abuja, Tudun Wada (2026)

27/03/2026

GASKIYA 5 DA BA A FAƊAWA MATASA GAME DA NASARA

Matashi, ana yawan gaya maka “ka yi ƙoƙari zaka yi nasara.” Amma akwai wasu gaskiya masu zafi da ba a yawan faɗa ba. Idan ka san su da wuri, zaka guji nadama.

1. Nasara tana ɗaukar lokaci fiye da yadda kake tunani. Ba a yin nasara cikin dare ɗaya. Wasu suna wahala shekaru kafin a ga sakamakon su. Idan baka da haƙuri, zaka daina a hanya.

2. Babu wanda ya damu da kai kamar yadda kake tunani. Mutane suna da nasu rayuwa. Saboda haka ka daina rayuwa don burge mutane, ka fara rayuwa don makomarka.

3. Za ka rasa wasu mutane a hanya. Yayin da kake girma, wasu abokai ba za su dace da sabuwar rayuwarka ba. Hakan normal ne, ba matsala ba.

4. Za ka yi kuskure. Ba za ka iya guje wa gazawa ba. Amma gazawa darasi ce. Wanda bai kuskure ba, bai gwada ba.

5. Discipline ya fi muhimmanci fiye da baiwa. Mutane da yawa suna da baiwa amma ba sa yin nasara saboda basu da horo. Horo ne yake sa ka ci gaba ko da ba ka jin sha’awa.

Gaskiya mai zafi: Nasara ba ta jin tausayi. Tana zuwa ne ga wanda ya shirya, ya jure, kuma bai daina ba.

Tambaya: Wanne daga cikin wadannan gaskiyoyi ne ya fi girgiza ka?

— Nura AG ✍🏻

26/03/2026

LAZINESS WATO RAGWANCI BA HUTU BA NE... SHI NE BABBAR CUTAR DA KE KASHE MAFARKA A HANKALI.

Mutane da yawa suna kiran kansu “ina hutawa”… alhali gaskiya ragwance suke yi.

Hutu yana da iyaka. Amma ragwance? Babu iyaka.

Za ka ce: “Zan fara gobe…” “Zan yi daga baya…” “Yanzu ban shirya ba…”

Haka zaka ci gaba da ɗaga abu har shekaru su wuce ba ka yi komai ba.

Bari mu yi wani lissafi mai sauƙi:

A ce kana bacci awa 8 a rana.

Sauran awa 16 fa?

A ciki: – Awa 5 a waya
– Awa 3 hira da abokai
– Awa 2 kallon film
– Sauran lokaci babu abin kirki

A ƙarshe rana ta ƙare… amma babu abin da ya canza a rayuwarka.

Ka tuna:

Ragwanci baya kashe ka nan take. Yana kashe mafarkinka ne a hankali.

Mutanen da kake gani sun yi nasara… ba su fi ka hankali ba. Ba su fi ka sa’a ba.

Abin da ya bambanta ku shi ne: Su sun yi abin da kai kake jinkirtawa.

Ka daina jiran “motivation.” Motivation yana zuwa ne bayan ka fara aiki.

Discipline ne kawai zai ceci rayuwarka.

Ko kana so ko ba ka so… ka tashi ka yi abin da ya kamata ka yi.

Domin gaskiya ita ce:

Babu wanda zai zo ya ɗaga ka daga inda kake. Kai ne dole ka ɗaga kanka.

Shekaru 3 masu zuwa… za su nuna bambanci tsakanin wanda ya yi aiki da wanda ya yi ragwanci.

Tambaya ita ce:

Kana cikin masu aiki ne… ko masu uzuri?

Allah yasa mudace.

Nura AG ✍️

24/03/2026

KORAFI WATO COMPLAINING BA YA CANZA RAYUWA... AIKI NE KAWAI KE CANZA TA.

Yawancin mutane sun fi kwarewa wajen yin korafi fiye da yin aiki.

Komai ya zama musu matsala: – Rayuwa ta yi tsada
– Babu aiki
– Gwamnati ba taimako
– Manyan gari suma ba taimako

Amma tambaya ita ce: kai me ka yi domin canza halin da kake ciki?

Ba ina cewa rayuwa mai sauƙi ba ce… a’a. Kowa yana da nasa ƙalubalen. Amma gaskiya ita ce:

Korafi ba zai taɓa kawo mafita ba.

Bari mu yi gaskiya da kanmu:

A rana awa 24 kake da ita kamar kowa.

A cikin wannan lokaci: – Nawa ka kashe kana korafi?
– Nawa ka kashe kana koyo?
– Nawa ka kashe kana gina kanka?

Mutumin da yake samun nasara ba shi da lokaci da yawa… amma yana amfani da kaɗan da yake da shi.

Kai kuma? Kana jira komai ya zama daidai kafin ka fara.

Ka tuna:

Babu lokacin da za ka taba zama “perfect.” Babu wanda zai zo ya ceci rayuwarka. Babu wanda zai yi maka aikin da kai ya kamata ka yi.

Idan ka ci gaba da jiran taimako daga waje… zaka iya jira har rayuwa ta wuce ka.

KA fara da abin da kake da shi. Ka fara a inda kake. Ko da ƙanƙani ne… fara.

Domin aiki kaɗan yau… ya fi mafarki mai girma da babu aiki.

Ka daina korafi. Ka fara motsi.

Shekaru masu zuwa ba za su tambaye ka dalilin da ya sa ka kasa ba… sai dai su nuna maka sakamakon abin da ka yi.

Tambaya ita ce:

Kana son canji ne… ko kana son korafi ne?

Allah yasa mudace.

Nura AG ✍🏻

24/03/2026

Dole ka tsaya da kafafunka kafin ka yi aure
Inji Dr.Alhassan Mai Lafia

Dole ka tsaya da kafafunka kafin ka yi aure, domin aure ba wasa ba ne, ba jin daɗin soyayya kawai bane, ba jima'i kawai bane, aure rayuwa ce gaba ɗaya mai ɗauke da nauyi, hakuri, da alhaki. A yau, akwai matasa da yawa da suke shiga hidimar aure da gaggawa saboda soyayya, matsin lamba daga abokai ko iyaye, ko kuma ganin wasu sun yi aure.

Suna ganin aure kamar wasa ne kawai, ba tare da sun shirya rayuwarsu ba, ba tare da sun tanadi abin da zai rike gida ba. Misali, akwai wani saurayi mai aiki na lokaci-lokaci (part-time) kawai, sai ya yi aure saboda soyayya, ba tare da ya duba yadda zai ciyar da iyali ba, ko shekara biyu ba ayiba matar ta fara amsar wankau daga maqobta saboda rashin kulawa, yaran s**a fara tasowa ba tarbiyya, suna yawo suna yawon gwangwan a t**i, shikenan gida ya rikice da rashin tsari. Wannan shine ainihin illar saurin aure.

Annabi ﷺ ya ce:
يَا مَعْشَرَ الشَّبَابِ، مَنِ اسْتَطَاعَ مِنْكُمُ الْبَاءَةَ فَلْيَتَزَوَّجْ (Bukhari da Muslim)
“Ya ku matasa! Duk wanda ya samu iko (ikon aure), to ya yi aure.” Wannan iko da Annabi ﷺ ya ambata ba sha’awa kawai ba ce; a’a yana nufin ikon ɗaukar nauyi, ikon kula da iyali, da ikon tsayuwa da kafafunka kafin aure. Duk wanda ya yi aure ba tare da wannan iko ba zai iya fuskantar matsaloli masu yawa.

Haka kuma Allah Maɗaukaki Ya ce:
الرِّجَالُ قَوَّامُونَ عَلَى النِّسَاءِ (Suratun Nisa’i: 34)
“Mazaje su ne masu kula da mata.” Wannan aya tana nuna cewa namiji ba kawai ya yi aure ba — yana da babban alhaki: ya ciyar da iyalinsa, ya koya musu tarbiyya da ilimi, ya samar da gidan da zai kasance mai albarka, tsari, da zaman lafiya.

Misalan rayuwa a yau suna bayyana abin da ke faruwa ga wadanda s**a yi aure da gaggawa.

Gaskiya mai zafi ita ce: aure ba wasa ba ne. Idan ba ka shirya ba, ba kai kaɗai ka lalata ba — har da matarka da ‘ya’yanka zasu fuskanci matsaloli. Ka tsaya ka duba rayuwarka: Shin ina da aiki ko sana’a mai ɗorewa? Shin zan iya ciyar da iyali ba tare da damuwa ba? Shin ina da tsari da hakuri? Shin zan iya gina gidan da zai zama mai albarka da kwanciyar hankali? Ka tuna: kadan daga halal ya fi yawa daga haram, albarka tana cikin abin da Allah Ya yarda da shi ne kawai.

Saboda haka, dan uwa, ka tsaya da kafafunka kafin ka yi aure. Ka shirya rayuwarka, ka nemi halal, ka gyara halinka, ka koya hakkin aure, ka samu tsari. Ka sani cewa aure amanar Allah ne, kuma za a tambaye ka yadda ka kula da ita. Allah Ya ba mu ikon yin aure cikin tsari, Ya tsarkake gidajenmu, Ya albarkaci iyalanmu, Ya kare mu daga kuskure da nadama. 🤲

Nura AG ✍🏻

22/03/2026

YADDA ZAKA ZAƁI MACEN DA TA DACE DA ZAMA MATAR AURE

Zaɓin mace ba wasa ba ne.
Abin da ka zaɓa yau, shi zai zama rayuwarka gobe.

Ka bi waɗannan ka’idoji:

1. KA FARA DA ADDINI:
Mace mai tsoron Allah ita ce mafi aminci.
Idan tana kiyaye Allah, zata kiyaye ka da gidanka.

2. KA DUBA HALI BA KYAWU BA:
Kyawu yana gushewa,
amma hali yana zaune.
Haƙuri, mutunci, da ladabi su ne ginshiƙin aure.

3. KA DUBA IYALINTA:
Yadda aka raineta yana tasiri sosai.
Tarbiyyar gida, tana bayyana a rayuwar aure.

4. KA GA YADDA TAKE MU’AMALA DA MUTANE:
Yadda take da iyayenta, ƙawayenta, da sauran mutane
yana nuna yadda zata kasance da kai.

5. KA DUBA MANUFARTA A RAYUWA:
Shin tana son aure ne da gaske?
Ko wasa kawai take?
Ka guji wanda ba shi da tabbas.

6. KA JI NATSUWA A ZUCIYARKA:
Ba rikicewa ba.
Ba tsoro ba.
Idan zuciyarka tana samun salama, wannan alama ce mai ƙarfi.

7.KA ROKI ALLAH
Duk wannan abubuwan sai ka haɗa rokon Allah, mafi Alkhairi a kowanne irin lamari

Dan uwa…

Kar ka zaɓi mace saboda kyau kaɗai.
Ka haɗa da hankali.

Domin soyayya na iya sa ka makance,
amma aure yana buƙatar gani sosai.

Ka zaɓi wacce za ta taimaka maka ka zama mafi alheri,
ba wacce za ta ja ka baya ba.

Allah ya haɗa mu da mata nagari 🤲🏻.

Nura AG ✍🏻

20/03/2026

Assalamu Alaikum wa rahmatullah 🤍🌙

Ina mika sakon Barka da Sallah ga daukacin masoyana da masu bibiyata. Allah Ya maimaita mana da alkhairi, Ya karɓi ibadunmu, Ya yafe mana kurakuranmu, Ya kuma cika mana burikanmu na alheri 🤲

Ina godiya matuƙa da soyayya, goyon baya, da addu’o’in da kuke ci gaba da yi min. Ku ne karfina da farin cikina 💖

Allah Ya sanya wannan Sallah ta zamo mana alkhairi, zaman lafiya, da yalwar arziki. Duk wanda ke cikin wata damuwa, Allah Ya sauƙaƙa masa 🤲

Allah SWT ya maimaita mana .
Barka da Sallah! 🌙

19/03/2026

Jama'a naga kwana biyun nan anata ceceku ce akan maganar da Alhassan Mai Lafia yayi akan tsayuwa da kafafu kafin aure. To nima zan tofa albarkacin bakina.

A wannan zamani da muke ciki, matasa da yawa suna yin aure da gaggawa ba tare da tsari ba. Wasu suna yin aure saboda dadin soyayya kawai, wasu saboda matsin lamba daga iyaye ko al’umma, wasu kuma saboda ganin abokai sun yi. Amma gaskiya ita ce, aure ba wasa ba ne ko abin gwaji ba ne. Aure rayuwa ce gaba ɗaya, kuma yana ɗauke da nauyi da alhaki mai girma wanda dole ne mutum ya shirya kafin ya shiga.

Annabi ﷺ ya ce:
يَا مَعْشَرَ الشَّبَابِ، مَنِ اسْتَطَاعَ مِنْكُمُ الْبَاءَةَ فَلْيَتَزَوَّجْ
(Bukhari da Muslim) “Ya ku matasa, duk wanda ya samu iko (ikon aure), to ya yi aure.” Wannan iko da ake magana akai ba wai sha’awa bace ake nufi, a’a ana nufin ikon ɗaukar nauyi — ciyarwa, kula da iyali, da kuma iya tafiyar da rayuwar aure cikin tsari.

Haka kuma Allah Maɗaukaki Ya ce:
الرِّجَالُ قَوَّامُونَ عَلَى النِّسَاءِ (Suratun Nisa’i: 34)
“Mazaje su ne masu kula da mata.” Wannan aya tana nuna cewa namiji yana da babban alhaki a cikin aure. Bawai suna kawai ake masa ba, ana ɗora masa nauyin kula da iyali ne gaba ɗaya.

Idan muka dubi halin da ake ciki a yau, za mu ga cewa yawan auren da ake yi ba tare da shiri ba yana haifar da matsaloli da dama. Aure yana farawa ne da farin ciki da soyayya, amma bayan ɗan lokaci sai matsaloli su fara bayyana.

Rashin kuɗi yana jawo sabani, rashin haƙuri yana kawo faɗa, rashin fahimta kuma yana ruguza zaman lafiya. A ƙarshe sai a ga mace tana cikin damuwa, namiji yana kin sauke nauyin da ke kansa, yara suna tasowa ba tare da ingantacciyar tarbiyya ba, kuma wani lokaci har saki ya biyo baya.

Shi yasa gashi nan ba inda yakai arewa yawan zawarawa.

Gaskiya mai zafi ita ce: idan mutum bai tsayu da kafafun sa ba yayu aure to ba kansa kaɗai zai wahalar da ba, har da matarsa da ‘ya’yansa. Aure ba soyayya kawai ba ne, aure alhaki ne, aure haƙuri ne, aure tsari ne. Duk wanda ya shiga shi ba tare da ya shirya ba, zai iya shiga cikin matsala mai tsanani.

Saboda haka, kafin ka yanke shawarar yin aure, ya kamata ka tambayi kanka: shin ina da abin da zan ciyar da iyalina da sauran bukatunsu? Shin na fahimci hakkin aure? Shin ina da haƙuri da juriya? Shin ina da tsoron Allah da zai hana ni zalunci? Idan amsar waɗannan tambayoyi ba ta gamsar ba, to lokaci ne na ka tsaya ka gyara kanka kafin ka shiga.

Kada ka yi aure saboda gasa dan kaga wani naka ko abokin ka yayi, bakasan mai ya taka ba kuma karkayi saboda maganganun mutane akanka. Kada ka yi aure saboda jin daɗin soyayya kawai. Ka yi aure idan ka shirya ɗaukar alhaki da nauyin da ke tattare da shi. Domin aure amanar Allah ne, kuma babu shakka za a tambaye ka yadda ka kula da wannan amana.

Allah Ka ba mu ikon yin aure cikin tsari da hikima, Ka sanya albarka a cikin gidajenmu, Ka kuma kare mu daga kuskuren da zai jawo mana nadama. 🤲

Nura AG ✍🏻

19/03/2026

MATASHI, KA SAN WANNAN — BA KOWA NE ZAI TAIMAKE KA BA

Dan uwa… ka daina rayuwa da tunanin cewa wani zai zo ya gyara maka rayuwa.
Yawancin lokaci, kai kaɗai ne.

1. Mutane suna da nasu matsalolin
Ba kowa ke da lokacin duba naka ba.

2. Wasu suna maka alkawari ne kawai
Amma idan lokaci ya yi, ba za su cika ba.

3. Taimako yana da iyaka
Mutane na iya fara maka hanya, amma kai zaka ƙarasa.

4. Kai ne ke da alhakin rayuwarka
Idan ka faɗi, kai ne. Idan ka tashi, kai ne.

5. Dogaro da kanka yana gina ƙarfi
Yana sa ka zama abin dogaro, ba abin tausayi ba.

6. Allah shi ne kadai mai tabbacin taimako
Shi ba ya gajiya, ba ya mantawa.

7. Ka zama mutumin da zai taimaki kansa
Domin a nan ne nasara take farawa.

Matashi, ka daina jira — ka fara.
Rayuwarka tana hannun Allah, ba a hannun kowa ba.
Allah SWT ya ƙarfafa mu. 🤲
Nura AG ✍🏻

18/03/2026

HAƘURI DA JURIYA SUNE MAFITA GA DUK WANI MATSALA.

Rayuwa ba ta farawa da sauƙi .
Kowanne mutum yana fuskantar wahala, rashin nasara, da jarrabawa.
Wasu suna jin kamar ba za su iya ba.
Wasu suna so su daina, su jefa komai.

Amma ka sani…
babban banbanci tsakanin wanda ya ci gaba da wanda ya tsaya shi ne haƙuri da juriya.

Haƙuri ba wai kawai jiran abu ba ne.
Haƙuri yana nufin ka tsaya da imani, ka yi aiki, ka dage, ko da sakamako bai bayyana ba tukuna.

Juriya kuma tana nufin kada ka bar ƙalubale ya karya ka.
Duk lokacin da ka fadi, ka tashi.
Duk lokacin da aka wuce ka, ka yi ƙoƙari ka wuce su da daraja.

Mutane da yawa suna rasa nasara ba saboda basu da basira ko kuɗi ba.
Suna rasa ta ne saboda rashin haƙuri da rashin juriya.

Matashi, ka tuna:
duk abin da ya fi wuya a farko, shi ne mafi daraja a ƙarshe.
Duk abin da ya fi wahala ka jure, shi ne zai zama ginshiƙi ga nasararka.

Ka dage.
Ka haƙura.
Ka tashi duk lokacin da ka fadi.

Domin wanda ya daure, shi ne ake ganin a ƙarshe.

Nura AG ✍🏻

18/03/2026

SHIN TALAUCI UZURI NE NA RASHIN NASARA KO KAWAI HANYA CE TA KARE KAI?

Gaskiyar tana da daci, amma dole mu faɗe ta.

A yau, matasa da yawa suna cewa:
“Ba ni da kuɗi…”
“Ba ni da gata…”
“Ba ni da kowa…”

Toh tambaya ita ce — shin wannan uzuri ne na gaskiya? Ko kuwa hanya ce kawai ta boye gazawa?

Akwai mutane da s**a tashi cikin talauci s**a zama manya.
Akwai wadanda ba su da komai amma s**a yi nasara.
To me ya bambanta su da wasu?

Wasu za su ce:
“Sa’a ce…”
Wasu za su ce:
“Dama sun samu taimako…”

Amma gaskiya ita ce — wasu sun zaɓi su yi ƙoƙari, wasu kuma sun zaɓi su daina.

Ba ina cewa talauci ba matsala ba ne. Matsala ce babba.
Amma tambaya ita ce — shin kana amfani da shi a matsayin dalili na tashi, ko uzuri na zama a wuri guda?

Wasu suna cikin talauci amma suna ƙoƙari:
✅ Suna koyo
✅ Suna aiki
✅ Suna dagewa

Wasu kuma:
❌ Kullum korafi
❌ Kullum jiran taimako
❌ Kullum zargin kowa

Rayuwa ba ta da adalci a wasu lokuta — amma hakan ba yana nufin ka daina ba ne.

To kai fa?

👉 Talauci yana hana nasara ne?
👉 Ko kuwa tunanin mutum ne ke hana shi?

Ka faɗi ra’ayinka tare da hujja a comment 👇

17/03/2026

ABUBUWA GUDA 6 DA KE LALATA AURE A YAU.

Aure a yau yana rushewa ba wai saboda babu soyayya ba, amma saboda halaye da dabi’u da muka dauko daga waje ba tare da tunani ba.

Gaskiyar tana da daci — amma dole mu fade ta.

1. Rashin Hakuri Tsakanin Ma’aurata

Kowane karamin abu sai ya zama babbar matsala. Babu wanda yake son ya yi hakuri. Kowa yana son a fahimce shi, amma shi baya son ya fahimci ɗan uwansa.

2. Saka Iyayen Gida Cikin Komai

Wasu aure ba ya tafiya sai an kira uwa ko uba. Kullum sai an kai kara. Wannan yana lalata zaman lafiya a gida.

3. Rayuwar Social Media

Kwatanta aure da na mutane a Facebook da Instagram. “Su suna haka, mu kuma ba haka ba.” Wannan yana kawo rashin godiya da damuwa.

4. Rashin Girmamawa

Mace ba ta girmama mijinta, ko miji baya daraja matarsa. Da zarar girmamawa ta tafi — zaman lafiya ma zai bace.

5. Rashin Tattaunawa

Wasu ma’aurata basa zama su tattauna matsalolinsu. Sai su bar komai ya taru har ya zama babbar matsala.

6. Rashin Tsoron Allah

Idan babu tsoron Allah a cikin aure, komai zai lalace. Domin babu abin da zai hana mutum zalunci ko rashin adalci.

Dan uwa, aure ba wasa ba ne. Idan ba a kula da shi ba, yana iya zama damuwa maimakon rahama.

Ka yi hakuri.
Ka girmama juna.
Ka rage sauraron mutane.
Ka saka Allah a gaba.

Domin aure mai kyau ana gina shi ne, ba a samunsa kawai ba.

Allah Ya gyara aurenmu, Ya sanya zaman lafiya a gidajenmu.

Nura AG

17/03/2026

INNA LILLAHI WA INNA ILAIHI RAJI UN

Yanzu na ci karo da wani mummunan labari na wani abu da ya f@she a Maiduguri wanda yayi sanadiyar mvtuwa® mutane kusan ashirin tare da jikkata kusan dari.
Lallai wannan ba karamin abu bane ace mutane suna cikin watan Ramadan wata mai dinbin falala amma baza abar su ba, abun nan ya kai makura gaskiya, inaso ake so dan arewa yasa rayuwar shi yajen yankin wasu an tsangwameshi a yankin nashi ma ba abar shi masifa ta ko ina 😭.

Wannan lamari abin takaici ne matuƙa, ya girgiza ni . Ina addu’ar Allah ya jikansu da rahama, ya gafarta musu, ya kuma ba iyalansu haƙuri da juriya a wannan lokaci mai cike da jimami. Haka kuma ina addu’ar Allah ya ba waɗanda s**a jikkata lafiya cikin gaggawa.

A lokaci guda, ina kira ga hukumomin tsaro na gwamnati da su ƙara ɗaukar matakan tsaro da kulawa domin kare rayuka da dukiyoyin al’umma. Ya zama wajibi a binciko musabbabin wannan lamari tare da ɗaukar matakan da s**a dace domin hana faruwar irin haka a nan gaba.

Rayuwar al’umma na da muhimmanci ƙwarai, kuma kowa na da hakkin samun tsaro da kariya.

Allah Ya kiyaye gaba, Ya kuma maimaita zaman lafiya a ƙasarmu.

Amin.

Nura AG

27/03/2026

26/03/2026

24/03/2026

24/03/2026

22/03/2026

20/03/2026

19/03/2026

19/03/2026

18/03/2026

18/03/2026

17/03/2026

17/03/2026

Address

Website

Alerts

Shortcuts

Share