09/01/2026
BABBAN MAKARANTAR WURO-YANKA NGURORE MAKARANTA MAI TARIHI NA FUSKANTAR KALUBALE.
Babbar Makarantar Wuro-Yanka da ke garin Ngurore na ɗaya daga cikin tsofaffin makarantu masu tarihi a yankin, wadda aka kafa tun shekaru da dama da s**a gabata domin ilimantar da yara da matasa na al’ummar yankin.
Makarantar, wadda ke ɗauke da matakan karatu na firamare da sakandare, babba da ƙarama, ta taka muhimmiyar rawa wajen samar da fitattun mutane masu tasiri a Ngurore da ma wajenta.
Sai dai kuma, tsawon lokaci da rashin isasshen gyare-gyare sun yi tasiri ga gine-ginen makarantar. A halin yanzu, ana iya ganin alamun tsufa da lalacewa a wasu ajujuwa, rufin gine-gine da kayan koyarwa, lamarin da ke kawo cikas ga yanayin koyarwa.
A shekarun baya, gwamnatin jihar Adamawa ƙarƙashin Hukumar ASUBEB ta gudanar da wasu ayyukan gyare-gyare tare da katange makarantar domin kariya. Duk da haka, rahotanni daga malamai da iyayen yara sun nuna cewa har yanzu akwai bangarori da dama da ke buƙatar kulawa ta musamman, musamman a fannin gine-gine da kayan aiki.
Masana ilimi na ganin cewa, idan aka sake sabunta makarantar yadda ya dace, hakan zai taimaka wajen inganta ingancin ilimi da kuma samar da yanayi mai kyau ga dalibai da malamai, daidai da tsarin ilimi na zamani.
Ngurore Community TV za ta ci gaba da bibiyar lamarin, tare da kawo muku cikakken rahoto kan ƙalubalen da makarantar ke fuskanta, ra’ayoyin al’umma, da kuma matakan da ya dace gwamnati da masu ruwa da tsaki su ɗauka a nan gaba.
