https://www.facebook.com/168785812994828/

Alerto Eastern Visayas, Eastern Visayas, Philippine (2026)

19/09/2026

𝗕𝗔𝗥𝗔𝗡𝗚𝗔𝗬 𝗞𝗔𝗚𝗔𝗪𝗔𝗗, 𝗣𝗔𝗧𝗔𝗬 𝗠𝗔𝗧𝗔𝗣𝗢𝗦 𝗣𝗨𝗦𝗜𝗟𝗢𝗡 𝗡𝗚 𝗣𝗨𝗟𝗜𝗦 𝗡𝗔 𝗨𝗠𝗔𝗡𝗚𝗞𝗢𝗡 𝗛𝗔 𝗣𝗔𝗟𝗔𝗣𝗔𝗚, 𝗡𝗢𝗥𝗧𝗛𝗘𝗥𝗡 𝗦𝗔𝗠𝗔𝗥

Patay an usa nga barangay kagawad matapos hiya pusilon han iya mismo umangkon nga usa nga pulis ha Barangay Mapno, Palapag, Northern Samar, han Setyembre 18, 2026.
Ginkilala an biktima ha alyas nga “Gel,” usa nga inasaw-an ngan residente han nasabi nga barangay. Base ha inisyal nga impormasyon, igo hiya ha ulo ngan waray na maluwas.
An ginduduhaduhaan nga suspek amo an iya umangkon nga Patrolman nga naka-assign ha 2nd Northern Samar Mobile Force Company ngan residente liwat ha Barangay Mapno.
Ha hitabo, lima ka putok an ginkikita nga ginpabuto gamit an 9mm nga pusil. Lima liwat nga basyo han bala an narekober ha crime scene.
Personal nga kasina an ginkukonsiderar han mga otoridad nga posible nga motibo ha krimen.
Katapos han insidente, boluntaryo nga nagsurrender an suspek ha mga otoridad, kaupod an iya pusil, tulo nga magazine, ngan 23 nga bala.
Ginkukustodiya na yana an suspek ha Palapag Municipal Police Station samtang nagpapadayon an imbestigasyon.
Inisyal pa la ini nga impormasyon ngan mahimo magbag-o samtang nagpapadayon an imbestigasyon.

09/09/2026

𝗡𝗣𝗔 𝗟𝗘𝗔𝗗𝗘𝗥, 𝗡𝗔𝗠𝗔𝗧𝗔𝗬 𝗛𝗔 𝗘𝗡𝗚𝗞𝗪𝗘𝗡𝗧𝗥𝗢 𝗛𝗔 𝗕𝗔𝗬𝗕𝗔𝗬 𝗖𝗜𝗧𝗬

Usa nga ginkikilala nga lider han New People’s Army (NPA) an namatay matapos an engkwentro han mga armado nga grupo ngan han mga sundalo han 8th Infantry “Stormtroopers” Division ha kabukiran han Brgy. Caridad, Baybay City, Leyte, dida han September 8, 2026.
Sumala ha militar, nagresponde an mga tropa ha impormasyon nga ira nakarawat tikang ha usa nga concerned citizen mahitungod han presensya han mga armado nga indibidwal ha lugar nga gin-aaligar nangongolekta hin kwarta ngan pagkaon tikang ha mga residente.
Ha nahitabo nga pagbinalyuay hin buto, namatay an ginkilala nga NPA leader nga hi Erwin Murillo Maceda, alyas “Romnick.” Gintudlok hiya han militar nga Vice Team Leader 1 han Island Committee (IC) Levox ha ilarom han Eastern Visayas Regional Party Committee (EVRPC).
Usa nga M16 rifle an ginkuhang armas han mga sundalo ha lugar han engkwentro.
Hi 802nd Infantry Brigade Commander Brig. Gen. Pompeyo Jason Almagro nagsiring nga hi Romnick ngan an iya grupo in ginkakaw-ing ha mga alegasyon hin mga aktibidad kontra ha mga sibilyan ngan lokal nga opisyal. Lakip hini an pangolekta hin kwarta pinaagi hin pagpirit, panarhog ha mga residente ngan negosyante, ngan mga pag-atake ha mga pasilidad han gobyerno.
Ha pahayag han 8th Infantry Division, ginpahayag nga nagpapakita an insidente nga padayon an paningkamot han militar nga mapugngan an armado nga mga grupo nga bumalik ha mga komunidad nga nag-eenjoy na hin kamurayawan ngan seguridad.
Ginduso gihapon han 8ID an panawagan ha mga nahibilin nga miyembro han CTG nga bayaan an armado nga pakigbisog, magsurender, ngan magbalik ha mamurayawon nga kinabuhi pinaagi ha pagsunod ha balaud.

06/09/2026

45 𝗔𝗡𝗬𝗢𝗦 𝗡𝗚𝗔 𝗟𝗔𝗟𝗔𝗞𝗜 𝗚𝗜𝗡 𝗣𝗔𝗧𝗔𝗬 𝗔𝗡 𝗜𝗬𝗔 𝗞𝗔𝗟𝗨𝗚𝗔𝗥𝗜𝗡𝗚𝗢𝗡 𝗡𝗔𝗡𝗔𝗬 𝗛𝗔 𝗖𝗔𝗧𝗕𝗔𝗟𝗢𝗚𝗔𝗡

𝑪𝑨𝑻𝑩𝑨𝑳𝑶𝑮𝑨𝑵 𝑪𝑰𝑻𝒀- Usa nga makasurubo nga panhitabo an nahitabo ha Purok 6, Brgy. Guindapunan, Catbalogan City, diin usa nga 79 anyos nga babaye an namatay matapos an ginkukwestyon nga panhitabo nga naglambigit han iya 45 anyos nga anak.
Ginkilala an suspek nga hi alyas “Anik,” 45 anyos ngan usa nga tricycle driver. Sumala ha inisyal nga impormasyon, nagkaada kuno hin mainit nga diskusyon an mag-iroy antes nagin pisikal an ira panaglalis.
Gin-aalegar nga ginpiklok ngan tubal, naigo an biktima ha ulo gamit an usa nga metal nga butang, nga amo an ginkakabig nga hinungdan han iya pagkamatay.
Gindara pa ha ospital an biktima para hin medikal nga bulig, pero gindeklarar hiya nga dead on arrival.
An gintatahapan naman in yana aada na ha kustodiya han Catbalogan PNP samtang nagpapadayon an imbestigasyon han mga awtoridad.
📍 Catbalogan City, Samar
📅 September 6, 2026

📙K7News

05/09/2026

𝗣14 𝗺𝗶𝗹𝘆𝗼𝗻 𝗻𝗴𝗮 𝗽𝗼𝗻𝗱𝗼 𝗵𝗮𝗻 𝗕𝗮𝗿𝗮𝗻𝗴𝗮𝘆 𝗦𝗮𝗻 𝗣𝗲𝗱𝗿𝗼 𝗵𝗮 𝗠𝗼𝗹𝗼, 𝗜𝗹𝗼𝗶𝗹𝗼, 𝗽𝗶𝗻𝗮𝗽𝗮-𝗿𝗲𝗶𝗺𝗯𝘂𝗿𝘀𝗲 𝗵𝗮𝗻 𝗖𝗢𝗔
𝑰𝑳𝑶𝑰𝑳𝑶 𝑪𝑰𝑻𝒀- npapabalik han Commission on Audit (COA) an gin-estimar nga P14 milyon nga pondo han Barangay San Pedro ha Molo, Iloilo, matapos nga diri nakapasa an barangay hin kompleto nga mga resibo ngan liquidation reports para ha mga transaksyon tikang Mayo 2019 tubtob Hulyo 2026.
Sumala ha report han GMA Regional TV, ginkumpirma liwat ini ni Punong Barangay Karl John Lapascua ha news team.
Ha iya pahayag, an pondo ginsiring nga nagamit para ha honoraria ngan allowances han mga opisyal han barangay, sugad man ha pagpalit hin computer, printer, ngan mga lingkoran.
Ginpahayag liwat han Punong Barangay nga waray kuno nagin korapsyon ha paggamit han pondo. An iya depensa, waray la hira makapagpasa ha takna han ginkikinahanglan nga mga dokumento ngan papeles para ha liquidation.
Antes pa man kuno makarawat an notice of disallowance tikang ha COA, nagtikang na hira pagbayad han ira obligasyon hadto pa Oktubre 2025.
Siring pa, P5,000 kada bulan an ginkakaltas ha honoraria ni Lapascua ngan han treasurer han barangay.

📌 Source: GMA Regional TV

03/09/2026

𝗦𝗘𝗡. 𝗕𝗢𝗡𝗚 𝗚𝗢, 𝗡𝗔𝗚𝗣𝗔𝗔𝗕𝗢𝗧 𝗛𝗜𝗡 𝗣𝗔𝗞𝗜𝗞𝗜𝗗𝗨𝗬𝗢𝗚 𝗡𝗚𝗔𝗗𝗔 𝗛𝗔𝗡 𝗣𝗔𝗠𝗜𝗟𝗬𝗔 𝗛𝗔𝗡 𝗡𝗔𝗦𝗔𝗪𝗜 𝗡𝗚𝗔 𝗡𝗨𝗥𝗦𝗘 𝗛𝗔 𝗖𝗔𝗧𝗕𝗔𝗟𝗢𝗚𝗔𝗡

Nagpaabot hin pakikiramay ngan pinansyal nga bulig hi Senator B**g Go ngadto han pamilya ni Kelvin Rod Castro, 35 anyos, usa nga volunteer nurse nga namatay matapos maguba an waiting shed nga iya ha Catbalogan City, Samar.

Hi Kelvin usa nga nurse nga naka-assign ha Catbalogan City Health Office. Antes han makasurubo nga panhitabo, katatapos pa la nira han iya kaupod nga nurse an ira pagserbisyo ha measles-rubella supplemental immunization activity ha Barangay Canhawan Gote.

Dugang ha iya pakikiramay, naghatag liwat hi Senator B**g Go hin pinansyal nga ayuda ngadto han pamilya han namatay nga nurse.

Gindayaw liwat ni Senator B**g Go an dedikasyon ni Kelvin ha pagserbisyo ha komunidad, ngan ginkilala hiya sugad nga usa han mga modernong bayani nga padayon nga nagtatrabaho para ha kaayuhan han iba.

Source: B**g Go

30/08/2026

𝗧𝗦𝗜𝗡𝗘𝗟𝗔𝗦 𝗡𝗚𝗔 𝗡𝗔𝗕𝗔𝗬𝗔𝗔𝗡 𝗛𝗔 𝗟𝗨𝗚𝗔𝗥 𝗛𝗔𝗡 𝗞𝗥𝗜𝗠𝗘𝗡, 𝗡𝗔𝗚𝗜𝗡 𝗜𝗠𝗣𝗢𝗥𝗧𝗔𝗡𝗧𝗘 𝗡𝗚𝗔 𝗟𝗘𝗔𝗗 𝗛𝗔 𝗣𝗔𝗚𝗞𝗜𝗟𝗔𝗟𝗔 𝗛𝗔𝗡 𝗦𝗨𝗦𝗣𝗘𝗞 𝗛𝗔 𝗣𝗔𝗡𝗕𝗨𝗡𝗢 𝗛𝗔 𝗢𝗥𝗠𝗢𝗖 𝗖𝗜𝗧𝗬

𝙊𝙍𝙈𝙊𝘾 𝘾𝙄𝙏𝙔 - Usa nga tsinelas nga nabilin ha lugar diin nakit-an an biktima an nagin usa han mga importante nga basihan han kapulisan ha pagkilala han gintutudlok nga suspek ha panbuno han usa nga 38-anyos nga lalaki ha Barangay Catmon, Ormoc City.
Sumala ha impormasyon tikang ha Ormoc City Police, usa nga barangay kagawad an nagpasabot dayon ha mga otoridad matapos makita an waray na kinabuhi nga lalaki ha usa nga bakante nga lote ha Purok 2.
Samtang gin-iimbestigaran han kapulisan an lugar, nakarekober hira hin usa nga tsinelas nga ginhuhunahuna nga posible nabayaan han responsable han krimen.
Ginsundan han mga imbestigador an impormasyon mahitungod han tsinelas, nga naggiya ha ira ngadto ha usa nga panimalay nga hirani ha lugar. Didto, nakita an katugbang nga tsinelas nga gin-uugnan nga pag-aari hin usa nga 47-anyos nga lalaki.
Ginkumpirmar naman han asawa han lalaki nga iya ito mister an tag-iya han nasabi nga tsinelas.
Pero antes pa makadaop an mga otoridad ha suspek, ini in nakapalagiw na ngadto ha waray pa maklaro nga destinasyon.
Padayon pa ha pagkayana an imbestigasyon han kapulisan basi hibaroan an motibo ha nahitabo. Ginkokonsiderar naman han mga imbestigador nga usa nga circumstantial evidence an tsinelas nga nabilin ha lugar han krimen.
Nahibaroan liwat nga an gintutudlok nga suspek in may daan na nga kaso nga frustrated murder ngan nakagawas matapos makagpiyansa.
Nakiki-coordinate na an Ormoc City PNP ha iba nga mga lugar nga posible makadtoan han suspek basi dayon ini mahibaroan an iya kahimtang ngan lokasyon.

Source: Carlo Medino

29/08/2026

𝐋𝐀𝐋𝐀𝐊𝐈 𝐆𝐈𝐍𝐏𝐔𝐒𝐈𝐋 𝐇𝐀 𝐔𝐋𝐎 𝐇𝐀 𝐂𝐀𝐓𝐁𝐀𝐋𝐎𝐆𝐀𝐍 𝐂𝐈𝐓𝐘; 𝐒𝐔𝐒𝐏𝐄𝐊, 𝐆𝐈𝐍𝐏𝐀𝐏𝐀𝐍𝐆𝐈𝐓𝐀

𝘾𝘼𝙏𝘽𝘼𝙇𝙊𝙂𝘼𝙉 𝘾𝙄𝙏𝙔 - Usa nga construction worker an ginreport nga ginpusil ha ulo ha Brgy. 10, Catbalogan City, Samar, pasado alas-10 han aga yana nga Sabado, Agosto 29, 2026.
An biktima nga ginkilala ha alyas nga “Roy,” 40 anyos, residente han Brgy. 1, Salug 1, Catbalogan City.
Sumala ha pauna nga impormasyon tikang ha kapulisan, nakit-an ha CCTV nga nagmamaneho hi Roy han iya motorsiklo tikang ha Catbalogan City Public Market pakadto ha Brgy. San Pablo.
Samtang nagbibiyahe, ginsundan kuno hiya han usa nga lalaki ngan ginpusil ha likod nga bahin han iya ulo. Tungod han pagpamusil, natumba hiya tikang ha iya motorsiklo samtang an suspek madagmit nga pinalagiw.
Gindara dayon an biktima ha Samar Provincial Hospital basi mahatagan hin medikal nga pag-ataman.
Ha pauna nga imbestigasyon, natudlok han kapulisan an ginsususpetsahan nga gunman nga hi Reymond Dabuet Abarcar, alyas “Tari,” 40 anyos, waray trabaho ngan residente han Brgy. San Pablo, Catbalogan City.
Ginpahayag han kapulisan nga mayda na kuno daan personal nga diri pagkasinabtanay o away ha butnga han biktima ngan suspek.
Padayon an hot-pursuit operation han Catbalogan City Police Station basi madakop an suspek. Ginpapadayon liwat an imbestigasyon basi mahibaroan an bug-os nga kahimtang han insidente ngan makumpirma an armas nga gin-gamit.
📢 PANAWAGAN HAN KAPULISAN:
An bisan hin-o nga may impormasyon mahitungod han suspek o han iya posible nga gintatagoan, gin-aaghat nga makigkomunikar ha PNP Catbalogan pinaagi han hotline 0905-310-7114, o direkta nga pumakadto ha pinakamahirani nga police station.

28/08/2026

𝐍𝐔𝐑𝐒𝐄 𝐍𝐀𝐌𝐀𝐓𝐀𝐘 𝐌𝐀𝐓𝐀𝐏𝐎𝐒 𝐌𝐀𝐓𝐔𝐌𝐁𝐀 𝐀𝐍 𝐂𝐎𝐍𝐂𝐑𝐄𝐓𝐄 𝐒𝐋𝐀𝐁 𝐇𝐀 𝐒𝐈𝐄𝐑𝐑𝐀 𝐈𝐒𝐋𝐀𝐍𝐃 𝐁𝐑𝐆𝐘 𝐂𝐀𝐍𝐇𝐀𝐖𝐀𝐍 𝐆𝐎𝐓𝐄,𝐂𝐀𝐓𝐁𝐀𝐋𝐎𝐆𝐀𝐍 𝐂𝐈𝐓𝐘
CATBALOGAN CITY, SAMAR — Namatay an usa nga 35-anyos nga nurse matapos maigo han concrete slab han usa nga waiting shed ha Sierra Island, Barangay Canhawan Gote, Catbalogan City, han Agosto 27, 2026.
Ginkilala an biktima nga hi Kelvin Castro, 35 anyos, waray asawa, nurse han Department of Health (DOH) nga naka-assign ha Catbalogan City Health Office. Residente hiya han Purok 3, Barangay Canlapwas, Catbalogan City.
Base ha inisyal nga impormasyon, tikang ha Measles-Rubella Supplemental Immunization Activity ha Barangay Canhawan Gote hi Castro kaupod an iya katrabaho nga hi Jeffrey Cañete, 42 anyos, nga nurse gihapon ha City Health Office.
Katapos han ira health activity, kinadto hira ha docking area han mga motorboat basi maghulat han ira sakyan pabalik ha Catbalogan City.
Samtang naghuhulat, nalingkod hi Castro ha ilarom han waiting shed. Waray pag-iha, tigda nga naruso an bahin han konkretong estruktura ngan nahulog an concrete slab ngadto ha iya.
Nagkaada hiya hin mga samad ha magkalain-lain nga parte han lawas, upod na an grabe nga kadaot ha ulo.
Binulig dayon hi Cañete, kaupod an pipira nga residente ngan mga daycare teacher han City Social Welfare and Development Office (CSWDO), ha pagkuha kan Castro tikang ha ilarom han narusak nga estruktura.
Gindara hiya ha Samar Provincial Hospital basi matagaan hin dayon nga pag-ataman medikal. Gintirok han mga doktor ngan medical personnel an ira mga pamaagi ha pagresuscitate ha iya, pero waray na hiya maluwas.
Pag-abot ha ospital, igin-deklarar hi Castro nga Dead on Arrival (DOA).
Padayon naman an imbestigasyon han Catbalogan City Police Station basi mahibaroan kon ano an hinungdan han pagkaruso han concrete slab ngan kon may iba pa nga mga detalye nga kinahanglan usisahon.
Ginhangyo liwat han kapulisan an pamilya nga magpa-post-mortem examination basi matigamnan an eksakto nga mediko-legal nga hinungdan han kamatayon.

Source: DjLet

20/08/2026

𝗟𝗔𝗟𝗔𝗞𝗜 𝗡𝗚𝗔 𝗚𝗜𝗔𝗧𝗔𝗞𝗘 𝗛𝗔𝗡 𝗛𝗜𝗚𝗛 𝗕𝗟𝗢𝗢𝗗, 𝗡𝗔𝗞ATALWAS 𝗠𝗔𝗧𝗔𝗣𝗢𝗦 𝗕𝗜𝗥𝗔𝗛𝗢𝗡 𝗔𝗡 𝗜𝗬𝗔 𝗜𝗞𝗜𝗡𝗔𝗧𝗔𝗪𝗢

Usa nga lalaki ha Legazpi City, Albay an makalilipay nga nakaluwas ha peligroso nga kahimtang matapos hiya atakihon hin high blood hin duha ka beses.
Sumala han istorya, hi “Enting” usa nga manangite ngan nagtitinda hin tuba. Iginsumat han iya asawa nga agsob hiya mag-inom. Ha siyahan nga pag-atake han iya high blood, nakaghatag dayon hin bulig an iya mga kaupod ngan nadara hiya ha hospital.
Pero ha ikaduha nga pag-atake, mas seryoso an iya kahimtang. Han baga hin diri na hiya namamatian, may usa nga tawo nga naghimo hin usa nga tradisyonal nga paagi pinaagi han pagbira ha iya kinatawo. Katapos hini, nakamata hi Enting ngan nakagawas ha peligro.
May mga istorya liwat nga nagamit hin sugad nga tradisyonal nga pamaagi ha pipira nga lugar hadto, labi na ha mga komunidad nga limitado an access ha mga hospital ngan moderno nga medisina.
Bisan pa man, importante nga masabtan nga waray igo nga siyentipiko nga ebidensya nga nagpapakita nga an pagbira han kinatawo han lalaki usa nga epektibo nga pagtambal para ha high blood o iba nga seryoso nga sakit.
Kon may tawo nga nagkakaada hin sintomas han high blood o iba nga emerhensya, mas importante an paghatag hin husto nga first aid ngan pagkadto dayon ha pinakaduok nga health facility o hospital.

Courtesy: Diego Delos Reyes Jr.

19/08/2026

𝗚𝗥𝗔𝗗𝗘 9 𝗦𝗧𝗨𝗗𝗘𝗡𝗧 𝗡𝗔𝗞𝗨𝗛𝗔𝗔𝗡 𝗛𝗜𝗡 𝗦𝗛𝗔𝗕𝗨 𝗛𝗔 𝗘𝗦𝗞𝗪𝗘𝗟𝗔𝗛𝗔𝗡 𝗛𝗔 𝗣𝗔𝗟𝗢𝗠𝗣𝗢𝗡, 𝗟𝗘𝗬𝗧𝗘

𝐋𝐄𝐘𝐓𝐄- Usa nga 14-anyos nga Grade 9 student an nadakop han mga otoridad matapos makuhaan hin ginsususpetsahan nga shabu ha sulod han usa nga eskwelahan ha Barangay San Miguel, Palompon, Leyte, han aga han Agosto 18.
Ginkilala an menor de edad ha alyas nga “JVO,” estudyante han Alfredo Parilla National High School.
Sumala ha Palompon Municipal Police Station, napansin han security guard an estudyante samtang may dara nga tulo nga bag. Durante han security inspection, nag-react an metal detector, salit ginpaeksamin hin mas maopay an iya mga dara.
Ginpangaro dayon hin bulig an kapulisan ha eskwelahan para ha pag-inspeksyon han mga bag. Didto nakita ha sulod han usa nga green pouch an substansya nga ginsususpetsahan nga shabu.
An nakumpiskar nga substansya ginbanabana nga may kabug-aton nga 0.70 gramos ngan may ginsisiring nga kantidad nga P4,760.
Gindara anay han kapulisan an menor de edad ha Palompon MPS, pero ha urhi igin-turn over hiya ha Municipal Social Welfare and Development (MSWD) Office para han angay nga proseso, interbensyon ngan disposisyon subay ha mga panuyo para ha Children in Conflict with the Law (CICL).
Padayon naman an imbestigasyon han kapulisan basi hibaroan kun diin tikang an ginsususpetsahan nga ilegal nga droga

Alerto Eastern Visayas

19/09/2026

09/09/2026

06/09/2026

05/09/2026

03/09/2026

30/08/2026

29/08/2026

28/08/2026

20/08/2026

19/08/2026

Adres

Website

Meldingen

Snelkoppelingen

Delen

Categorie

Verzoek om vermelding te verwijderen