Samferdselsfoto

23/02/2026

GEIRANGERFJORD III ER SJØSETT AV BRØDRENE AA: I dag blei Geiranger Fjordservice sitt nybygg sjøsett av Brødrene Aa i Hyen.

"Geirangerfjord III" har siste månadane gjennomgått ei forvandling frå "Tyra" inne i hallen til byggeverftet. Det mest synlege er den nye fargedrakta og trappene akter som fører opp på toppdekket. Her vil passasjerane ha mykje plass å boltre seg på.

Sjøsettinga i dag er den historisk første for det nye selskapet Brødrene Aa Hyen. Sidan konkursen i fjor sommar og re-starten i haust har aktiviteten auka godt på. Dagens sjøsetting er i så måte ein viktig milepel. Samstundes er det og historisk at same fartøyet blir sjøsett to gongar som i dette tilfellet.

Etter installasjon av nye batteripakkar og testing kan Geirangerfjord III ta imot sine første passasjerar til våren.

16/02/2026

MING ZHU HU er tilbake i Noreg. Dermed er ringen slutta for hurtigbåten som blei bygt av Brødrene Aa i Hyen i 2020. Saman med fleire andre hurtigbåtar blei den levert til kinesisk rederi og sendt til Kina med tungløftfartøy. Der gjekk den i trafikk mellom Hong Kong og Guangzhou.

Ming Zhu Hu vart så kjøpt av Fjord1 for å setjast inn i rutene selskapet har fått kontrakt på.

Etter ei lang reise frå Kina entra Ming Zhu Hu igjen norsk farvatn 7. februar som dekkslast på tungløftfartøyet Ella på veg mot Florø. Dagen etter vart den sjøsett i hamnebassenget i Florø før ferda gjekk til Eikefjord Slipp. Der vil den bli klargjort for neste kapittel som norsk hurtigbåt og omprofilert med nye fargar og norsk namn.

Hurtigbåten har plass til 300 passasjerar er nær 43 meter lang og gjer heile 40 knop ved hjelp av fire MTU-motorar.

16/02/2026

MIDNATSOL overleverer snart stafettpinnen til Vesterålen i hurtigrutetrafikken Bergen-Kirkenes. Vesterålen gjennomgår for tida verkstadopphald i Frederikshavn etter nokre månader i opplag.

25. mars er den planlagt inn i fast rute igjen. Då går Midnatsol over i Hurtigruten sine signaturseglingar og blir parhest til Trollfjord på Svalbardlinjen frå mai.

Videoen viser Midnatsol på sørgåande ut frå Florø ein vakker vintermorgon på ein av sine siste turar i ordinær hurtigrutetrafikk.

15/02/2026

HISTORISK TILBAKEBLIKK - VEØY PÅ SJELDAN IS-CRUISE: Med den langvarige kuldeperioden vi har, kan det vere artig med eit tilbakeblikk på ein annan kald vinter med mykje fjordis.

Ferjeikona Bolsøy og Veøy er nært knytt til Geirangerfjorden gjennom dei 30-40 siste åra. Her har eit stort tal passasjerar opplevd stasferjene, mest sommarstid, men dei seinare åra også til dels vinter, vår og haust.

Langt færre kan skilte med å ha reist med dei på Nærøyfjorden i Sogn. I samband med at ferjene låg i vinteropplag i Flåm, vart det nemleg utført nokre svært få passasjerturar.

Vanlegvis trafikkerte Skagastøl sambandet Flåm-Gudvangen vinterstid. Men på ettervinteren 2018 trong den vikar nokre dagar. Dermed vart Bolsøy og Veøy tatt ut av opplag for å gå nokre turar kvar på den islagte Nærøyfjorden, både for å halde oppe ruta og halde råka open i den raskt tilfrysande fjordisen.

12/01/2026

STOR LOGISTIKK NÅR 200 BUSSAR SKAL FASAST INN OG UT: 104 nye bussar er godt i gang i dei to nye bussanboda på Sunnmøre. Om lag like mange er parallelt skifta ut. Samferdselsfoto har fulgt prosessen når dei nye bussane har kome til Sunnmøre og dei gamle legg gamle trakter bak seg.

Oppstarten blei markert med talar og kake i Ålesund 5. januar der mellom anna Vy som operatør og FRAM/Møre og Romsdal fylkeskommune som oppdragsgjevar var tilstade.

Rutepakke 4 og 5 gjeld lokalruter i dei fleste Sunnmørs-kommunene, FRAM Ekspress Kristiansund-Molde-Moa/Ålesund-Volda, Ålesund-Åndalsnes og Ålesund-Stryn. Kontraktene har ein samla verdi på kring 3,3 milliardar kroner og strekker seg over 10 og 13 år.

I tråd med FRAM si nye profilering er ekspressbussane heilkvite og lokalbussane heilblå.

Det ligg mykje logistikk bak å bytte 104 nye bussar med om lag like mange gamle bussar på dei mange lokasjonane. Før nye bussar kan rullast ut må dei gamle fullføre rutene sine. Redusert rutedrift i skuleferien gjer jobben litt lettare ved at ikkje alt må byttast "over natta".

Dei fleste nye bussane er av merket Yutong frå Kina. Dei vart først mellom anna registrerte og profilerte i Arendal etter ankomst Noreg. Deretter blei dei fleste frakta sjøvegen med Fjordline til Bergen før Seatrans tok dei vidare til Ålesund. Her vart dei samla på den gamle containerkaia i Skutvika for diverse klargjering før opplæring av sjåførar og stasjonering.

Etter endt teneste kom dei gamle bussane motsett veg for å bli lagra ei kort tid i Skutvika.

Derifrå ventar tre utvegar. Nokre blir omplasserte til andre anbod, andre blir vidareselde, medan siste gruppa skal ut på si siste reise til resirkulering.

For å utføre delar av transporten frå Ålesund har Vy alliert seg med Rutebilhistorisk Forening avd. Sunnmøre. Gjennom dugnaden frå dei som stiller opp får foreininga viktige kroner i kassa ved eit beløp frå Vy. Laurdag 10. januar gjekk den første kolonna med bussar austover. Då henta 11 sjåførar ut kvar sin buss og la i veg austover med Vinstra som mål. Her vart dei møtt av eit tilsvarande tal sjåførar frå Hønefoss som tok bussane vidare til Vy sitt anlegg der for vidare ekspedering.

01/01/2026

NYTT BUSSANBOD I GANG: I dag er fleire av dei nye Yutong-bussane sett inn på FRAM Ekspress mellom Volda-Moa/Ålesund-Kristiansund.

Her er ein av dei nye 15-meters boggibussane på sin første tur ut frå Volda i ettermiddag.

Ein del lokalbussar er også i sving, noko som aukar på i morgon. Men full ruteproduksjon med nyebussane blir det først frå 5. januar når skulerutene er tilbake.

31/12/2025

GODT NYTT ÅR OG TAKK FOR DET GAMLE: 2025 nærmar seg slutten og 2026 ventar med nye samferdslehendingar. Nokre epokar er over, andre begynner.

På Sunnmøre er 104 nye bussar klare til teneste i to nye anbod. Samtidig takkar mange trufaste profilar for seg etter mange år og utallige passasjerar i lokal- og langrutetrafikk.

Med dette bildet av to Volvo-ar på veg bort, og i front ein av mange nye Yutong-ar klar for sine første passasjerar frå 1. januar, ønskjer vi godt nytt år!

24/12/2025

Med dette ferske stemningsbildet frå julaften morgon med Bruvik og Richard With på veg inn mot Ålesund, vil Samferdselsfoto ønskje alle kundar og følgjarar ei riktig god jul!

30/11/2025

BILFERGEN PÅ SJELDANT VINTERTOKT: I midten av november var den freda veteranferja "Bilfergen" på sjeldan vinterleg tur til Valldal inst på Sunnmøre i samband med eit utleigeoppdrag.

Den staselege veteranen vart bygt i 1921. I denne filmsnutten frå seglasen utover Storfjorden kan du nyte klassikaren gli gjennom det sunnmørske vinteren med sin taktfaste lyd frå den gamle Bolinder-maskina.

24/11/2025

EIN HISTORISK DAG - BRØDRENE AA ER TILBAKE

Eit halvt år etter konkursen i mai var det idag igjen aktivitet ved det kjende verftet i Hyen. Verftet gjekk konkurs etter at kontrakta med Norled på dei tre nybygga Tyra, Vår og Magni vart kansellert. Verftet rakk akkurat å sjøsette det som skulle bli Magni to dagar før konkursen 30. mai. Trillingane har sidan lagt i opplag langs verftskaia.

Det nye selskapet Brødrene Aa Hyen AS som er heileigd av Aa-familien vidarefører no drifta etter å ha signert nødvendige avtalar med bustyret og bankane om å overta driftsmidlane frå idag.

Første arbeidsoperasjonen starta ved daggry måndag. Tyra, den førstefødde av trillingane, er seld til Geiranger Fjordservice og skal byggast om til sightseeingbåt for å setjast inn i turisttrafikken til selskapet. Dei første på jobb ved verftet fekk dermed i oppdrag å stokke om fartøya ved kaia for å føre Tyra til slippvogna og inn i byggehallen igjen. Etter endt ombygging blir den dermed sjøsett for andre gong, men med ny profil.

02/11/2025

Hyggeleg at foto frå Samferdselsfoto pregar Vestland Classic AS sin stand på reiselivsmesse i Lugano, Sveits.

Lykke til med messa og godt sal av turar med legendariske Nordstjernen til jubileumssesongen som startar med 70-årscruise Bergen-Kirkenes-Bergen i mars 😊

https://www.facebook.com/share/p/1A6jmk7Cwz/

Visit us at the SIHE Swiss international holiday exhibition at Lugano, October 31st to November 02nd 2025. You find us at stand 479, in the Scandinavian Corner with neighbors from Finland and Iceland. And in front of us there is the stand of the historic Centovalli Railway.

31/10/2025

THE FJORDS AVSLUTTA PÅ GEIRANGERFJORDEN: 31. oktober klokka 1600 la MF Bolsøy frå kai i Geiranger for siste gong i rute for The Fjords.

Etter 11 sesongar utleigd til The Fjords, skal ferjeikona Bolsøy og Veøy etter planen frå neste år igjen driftast i Fjord1-regi på fjorden.

Avslutningsdagen vart markert med samling om bord for mannskap og tilsette i The Fjords og inviterte gjestar. Etter ruteslutt var toppsalongen dekka til julemiddag som siste felles avslutning for mannskap og rederi på sambandet.

Med storflagging og knallgule haustfargar som omgjevnader, var det eit vakkert skue å sjå Bolsøy for full fart gjennom fjorden. Veteranen blei bygt som Hjørungavåg i 1971 for ruta Ålesund-Hareid. I 1983 vart ho for første gong sett i rute Geiranger-Hellesylt. Med nokre få års unntak er det blitt kring 40 sesongar på ruta. Lang fartstid har også Veøy som vart lagt i opplag i september. Den kom inn på sambandet i 1997.