Samferdselsfoto

Hjem
Norge
Bergen
Samferdselsfoto

Samferdselsfoto har spesialisert seg på dokumentasjon av tema innanfor samferdsle gjennom foto/video/tekst, på eige og andre sitt initiativ.

06/06/2026

EID OG VÅGSØY MØTTEST I SEKKEN-RUTA: Denne veka har Fjord1-ferja Eid vikariert i ferjeruta Molde-Sekken i samband med verkstadopphald for Vågsøy. Idag var Vågsøy tilbake og Eid kunne sette kursen nordover mot Levanger igjen. Der er ferja til vanleg reserveferje i sambandet Levanger-Hokstad (Ytterøy).

Eid og Vågsøy har som namna tilseier tidlegare fartstid i Sogn og Fjordane. Begge har vore hovudferje på Måløy-Oldeide, medan Eid har trafikkert ei rekke samband.

Med gjesteopptredenen i Sekken-ruta var det og ein ferjehistorisk kuriositet at sambandet vart trafikkert av ei AtB-profilert ferje (kollektivselskapet til Trøndelag fylkeskommune).

21/05/2026

HISTORISK VDS-MØTE: Den gamle sightseeingbåten Langøysund kom nyleg til Nederland der den blir husbåt. Båten vart opprinneleg bygt som lokalbåten Flakstad for Vesteraalens Dampskibsselskab (VDS) i 1954. Seinare vart den seld til TFDS og fekk namnet Skjervøy.

I nyare tid er Langøysund kjent for mange gjennom dagsturane den gjekk ei årrekke med turistar frå Longyearbyen på Svalbard. Før den vart seld låg den i opplag i Tromsø.

Ferda sørover frå Tromsø til Amsterdam vart delt opp i dagsetappar langs Norskekysten før kryssing av Skagerrak og seglas langs vestkysten av Danmark og Tyskland.

Tilfeldigheitene ville at gamle Flakstad var i Ålesund samtidig som ein annan VDS-veteran, hurtigruteskipet Vesterålen, det siste nybygget VDS fekk levert i 1983.

Vesterålen fekk for nokre år sidan tilbake VDS-fargane på skorsteinane. Historieinteressert som den nye reiaren av Langøysund er, har han faktisk planer om å gjere det samme med skorsteinen på sin nye husbåt og la den få tilbake det opprinnelege namnet Flakstad.

Sannsynlegheita for at dei to VDS-veteranane møtest igjen er nok lita, men eit siste historisk treff vart det i alle fall.

17/05/2026

Bolsøy rundar av nasjonaldagen på kveldens siste tur inn mot Hellesylt 🇳🇴🇳🇴🇳🇴

17/05/2026

Samferdselsfoto gratulerer så mykje med nasjonaldagen 🇳🇴🇳🇴🇳🇴

Video: MF Selje flaggpynta på dagen

12/05/2026

DEN FØRSTE AV DEI TO NYE VESTFJORDFERJENE til Torghatten kom idag til Myklebust Verft i Gurskebotn for utrustning. Den greske slepebåten Dionysios Z har brukt ein knapp månad på slepet frå Yalova i Tyrkia der stålarbeidet er utført.

Dei 117 meter lange ferjene vert rekna som verdas største hydrogenskip.

Videoen viser siste innspurt for slepet mot land etter at losen vart sett om bord i Vanylvsgapet.

10/05/2026

HYDROFOILEN PÅ SJØEN IGJEN: Denne veka blei eit nytt tilskot til veteranfartøy-flåten i Noreg sjøsett. Med Ekspressen restaurert er også dette samferdsle-kapittelet representert i porteføljen av historiske fartøy.

Ekspressen er kjent for mange, særleg i Ryfylke. Fartøyet blei henta heim av DSD og sett på land i Stavanger for snart 10 år sidan, lillejulaften 2016. Unnateke nokre dagar på sjøen under Fjordsteam i Stavanger i 2017, har den stått på land. Den vart etter kvart frakta til Leirvik på Stord der omfattande restaurering er utført i regi av Stiftelsen Ekspressen / Hydrofoilbåten "EKSPRESSEN"

Etter sjøsettinga vart Ekspressen slept over til ei spesialbygt kai ved Oma Baatbyggeri a.s som tek omsyn til foilane som stikk ut på sidene av fartøyet.

I tida framover blir siste innspurt av klargjering gjort før Ekspressen igjen kan heve seg på foilane med eiga kraft og ta om bord passasjerar på ulike veteranbåtturar.

30/04/2026

FERJESKIFTE BRATTVÅG-DRYNA: Ytterøy erstatta nyleg Stetind som hovudferje på sambandet Brattvåg-Dryna. Stetind set snart kursen nordover igjen for å gå inn i si faste sommarrute Andenes-Gryllefjord. Ytterøy blei opprinneleg bygt for sambandet Levanger-Ytterøy der den vart avløyst av Harøy når Fjord1 overtok anbodet frå 2025. Siste tida har ho trafikkert Festvåg-Misten.

30/04/2026

HISTORISK HURTIGBÅTMØTE - 2 X EKSPRESSEN: Sist veke var det møte mellom gamal og ny hurtigbåtepoke på Stord. Hydrofoilen Ekspressen (bygt 1961) nærmar seg fullført restaurering og har no fått påmåla namnet igjen.

Dagens Ekspressen (bygt 2008) som går mellom Kristiansund og Trondheim var innom Oma Slipp for service.

I bakgrunnen er endå ein samferdselsepoke med, om enn med anna namn: Sunnhordland frå 1949.

29/04/2026

SISTE REIS FOR HARDINGEN SR: 60 år etter at ho vart levert, la den klassiske veteranferja Hardingen Sr tysdag kveld ut på si siste reise under slep av Chief frå Kristiansund til Fosen Gjenvinning i Stoksund. Der ventar endeliktet for ferjeikonet som svært mange har eit forhold til.

Den våte og blygrå regntjukka i Stoksund sette eit ekstra melankolsk og trist preg på siste kapittel for den gamle som snart skal gå ut av tiden.

Etter å ha gått i trafikk for HSD til 1991 vart Hardingen seld til Italia. 25 år seinare vart ho henta heim til Noreg og sett i fart som turistferje på Nærøyfjorden. HSD-profilen og det gamle namnet var tilbake på ferja, tilføyd Sr for å skilje ho frå etterkomaren med same namn.

Det kom til å bli eit kort comeback i gamlelandet. Etter kun fire sesongar vart ferja teken ut av trafikk. Ho vart seld og har sidan 2020 lagt i Kristiansund.

Meir historikk og bildereportasje kjem på seinare tidspunkt.

12/04/2026

YTRE STEINSUND BRU tek form i landskapet ytst i Solund. I november erstattar den ferjesambandet Daløy– Haldorsneset.

Brua som blir 811 meter lang kryssar den sterkt trafikkerte skipsleia gjennom sundet. Ytre Steinsund bru har difor seglingshøgd på heile 42 meter. Heile vegprosjektet på fylkesveg 606 inkludert ny veg på begge sider av brua, blir 4365 meter og er kalkulert til kring 1,3 milliardar kroner. Prosjektet finansierast ved ferjeavløysingsmidlar og løyving frå Vestland fylkeskommune som vedtok prosjektet i 2021. Brubygginga starta i desember 2023.

Det er Skanska som har kontrakta på brua som vert bygt etter fritt frambygg-prinsippet. Første samankopling er venta innan sommarferien. Heile brua skal henge saman i august.

Samferdselsfoto takkar for synfaring på anlegget 11. april i det praktfulle fotoveret med mykje aktivitet i sundet.

Anleggsferja Selbjørn (tidlegare Ropeid) er i arbeid med å frakte betongbilar frå blandeverket på riggområdet og ut i sundet. Betongen blir så heisa opp med ein såkalla betong-tobb med kontrollerbar opning i botnen. Nysand var inne med ein av dei siste gruslastane til anlegget.

Av trafikk elles gjekk Sundferja trufast att og fram, medan Havila Polaris gjekk sørover i skarp rute mot Bergen. Lokalbåten Solundir var innom på si ferd gjennom øyriket.

Adresse

Bergen

Telefon

+4795188566

Nettsted

http://www.samferdselsfoto.no/

Varslinger

Vær den første som vet og la oss sende deg en e-post når Samferdselsfoto legger inn nyheter og kampanjer. Din e-postadresse vil ikke bli brukt til noe annet formål, og du kan når som helst melde deg av.

Kontakt Bedriften

Send en melding til Samferdselsfoto:

Snarveier

Vil du plassere din bedrift på toppen av Mediafirma-listen i Bergen?

Del

Type

Medie-/nyhetsbedrift