12/02/2025
TRAPPAR NED ETTER NESTEN 30 ÅR I FORLAGSBRANSJEN
– Eg nærmar meg 68 år, og føler at det er på tide å ha meir fritid, seier forleggjar Torkjell Djupedal i Selja Forlag om kvifor han vel å trappe ned forlagsdrifta.
Sidan første boka kom ut i juni 1996 har Selja Forlag gitt ut over 300 bøker. I snitt vert det 10-12 bøker i året. Forlaget er kanskje mest kjent for turbøkene i OPPTUR-serien, men har også gitt ut eit rikt tal bøker innanfor lokalhistorie, kokebøker, reise- og kultur, kystkultur, kunst, biografiar og romanar og humorbøker. Nesten alle bøkene er på nynorsk og med vestlandsk profil. Mange er rikt illustrerte, mellom anna det store bokverket Historia om Førde, der siste bind kom ut før jul.
– Vi er takksame for alle dei kunnskapsrike og hyggelege menneska vi har jobba med og som har valt oss som samarbeidspart, seier Djupedal. Han vil rette også ei stor takk til bokhandlarane og andre forhandlarar som alltid har vore positive og laga plass for lokal litteratur. Og det at kundane vil ha lokal litteratur er tydeleg, for mange av bøkene til Selja Forlag har vore inne på Topp 10 listene til dei lokale bokhandlarane kvart år før jul.
Toppåret var 2017, då forlaget med tre tilsette gav ut 19 nye bøker. Kontoret har heile tida vore i Førde, midt på Vestlandet, og namnet Selja Forlag signaliserer at det er eit vestlandsforlag, sidan Selja var det første senter på Vestlandet, før Bergen vart grunnlagt.
I alle år har forlaget hatt eigen distribusjon. Lageret vert no flytta til Bergen, med sal og distribusjon gjennom Fagbokforlaget.
– Dei færraste vil merke nokon skilnad. Bøkene vil framleis vere å få i bokhandelen eller kan bestillast på nett. Straumsvåg Antikvariat i Fjærland vil også ha mange av bøkene våre for sal.
(Pressemelding 12.02.25)
Bilettekst:
NYE TIDER: No blir mange av bøkene sendt til Bergen, og forlagsverksemda trappa ned. Anne Britt Fedøy, som har vore redaktør og marknadsansvarleg i meir enn 15 år har begynt i ny jobb på Fagskulen Vestland, avd. Førde, medan Torkjell Djupedal skal nyte meir av pensjonisttilværet – og kanskje han bestemmer seg for å skrive fleire bøker etter kvart.
