30/09/2025
Ein merkedag for Bok & bibliotek!
I dag passerte https://www.bokogbibliotek.no for første gong 10 000 sidevisingar på ein månad (og det var før vi publiserte saka om at Aslak Sira Myhre går av som nasjonalbibliotekar)!
Verdt ei blautkake, sjølv om det berre hadde vore snakk om ein enkeltståande månad der alt gjekk ekstra godt. Altså ikkje det at Aslak går av som nasjonalbibliotekar, men det med 10 000 sidevisingar. Men til alt overmål er det del av ein tendens. Her kjem det ein del tal, men med så oppegåande lesarar som dykk, veit eg at det går heilt fint:
Til i går hadde sakene på nettsida blitt lesne 69 678 gongar i år. På same tid i fjor var talet 48 353. Denne auken på 44,1 prosent kjem på toppen av ein trafikkauken på 34,2 prosent frå 2023 til 2024.
Takk til alle som les og deler (deling i sosiale medium er ekstremt effektivt får å nå ut)!
Men er eg nøgd? På ingen måte. På ein alminneleg dag er det rundt 250 personar innom bokogbibliotek.no. Eit kjapt søk i statistikk for bibliotek og skular viser at det nok er godt og vel 8000 som jobbar med bibliotek her til lands (1678 tilsette i fag- og forskingsbibliotek, 2454 i folkebibliotek, 2692 grunnskular og 400 vidaregåande skular + fylkesbibliotek m.m.). Så kan vi plussa på andre i kulturfeltet, politikarar og administrasjon, journalistar, samfunnsdebattantar, og så bortetter.
Lat oss seia at kjernemålgruppa er på 10 000. Om vi tenkjer at nokre av dei 250 som er innom sida er der no, og andre er der då, og tar med i rekninga at det er 624 abonnentar på e-postlista, då finn vi at ... hm ... Kanskje åtte prosent av dei som kunne hatt nytte og glede av bokogbibliotek.no, faktisk tek ressursen i bruk. I alle fall færre enn ti prosent.
Så nei, eg er på ingen måte nøgd. Eg freistar å gjera det eg kan på min kant. Så håpar eg de som heiar på Bok & bibliotek tipsar, deler, framsnakkar og kritiserer.
Vi treng ei felles offentlegheit for alle norske bibliotek.
Bibliotekarforbundet har sendt ut ei undersøking om vald, trugsmål og tryggleik i bibliotek. Det blir meir av slikt i Sverige. Ola Eiksund fryktar det same her til lands. aktuelt Trygg på jobb?
