24/05/2026
“मोबाइलको दुरुपयोग बालबालिकाको मुख्य चुनौती” — कमलबजारमा दुई दिने पालिका स्तरीय बाल भेला सम्पन्न
कमलबजार, जेठ १० ।
World Vision International Nepal को सहयोग साझेदारी तथा Aastha Nepal को सहजीकरणमा कमलबजार नगरपालिकामा सञ्चालित दुई दिने पालिका स्तरीय बाल भेला सम्पन्न भएको छ। कमलबजार नगरपालिका महिला, बालबालिका तथा ज्येष्ठ नागरिक शाखाको समन्वय तथा नगर बाल सञ्जालको आयोजनामा जेठ ९ र १० गते कार्यक्रम सञ्चालन गरिएको हो।
नगर बाल सञ्जालकी उपाध्यक्ष भूमिका विष्टको अध्यक्षतामा सम्पन्न उद्घाटन कार्यक्रममा Yagya Prasad Dhakal प्रमुख अतिथिका रूपमा उपस्थित रहनुभएको थियो भने शारदा विष्ट कुँवर विशिष्ट अतिथि रहनुभएको थियो। कार्यक्रममा कमलबजार नगरपालिकाका नि प्रमुख प्रशासकीय अधिकृत खड्ग बहादुर विष्ट, महिला, बालबालिका तथा ज्येष्ठ नागरिक शाखा प्रमुख डम्बर ढुंगाना, सेफ गल परियोजनाकी अधिकृत दीपा बम, आस्था नेपालका कर्मचारी दिल बहादुर शाही, सामुदायिक मनोसामाजिक संयोजक कल्पना देवकोटा, वाक नेपालका कर्मचारी दिनेश विक, पत्रकार हिक्मत बहादुर नेपाली लगायतको सहभागिता रहेको थियो। कार्यक्रममा नगरका सबै वडाबाट बालबालिकाको प्रतिनिधित्व रहेको थियो।
बालबालिकाको समग्र विकास, समस्या पहिचान तथा आगामी आर्थिक वर्ष २०८३/०८४ को नीति तथा कार्यक्रममा बालबालिकाका सवाल समावेश गराउने उद्देश्यले आयोजना गरिएको भेलामा बाल अधिकार, बाल संरक्षण, बालबालिकामा लगानीको आवश्यकता, बजेट निर्माणका सात चरण लगायत बाल भेलाका विभिन्न औजार प्रयोग गरी सवाल पहिचान तथा प्राथमिकीकरण सम्बन्धी सहजीकरण गरिएको थियो।
भेलामा विभिन्न औजार प्रयोग गरी बालबालिकाका १३ प्रमुख सवाल पहिचान गरिएको थियो। सहभागीहरूले मतदानमार्फत समस्यालाई प्राथमिकीकरण गर्दा “मोबाइलको दुरुपयोग” पहिलो नम्बरमा परेको छ। त्यसपछि क्रमशः बाल विवाह, मर्यादित महिनावारी व्यवस्थापनको कमी तथा गुणस्तरीय शिक्षाको अभाव प्रमुख समस्याका रूपमा अगाडि आएका छन्।
बालबालिकाले मोबाइलको अत्यधिक प्रयोगका कारण पढाइप्रति ध्यान घट्दै गएको, बाल विवाहजस्ता समस्या बढिरहेको तथा अभिभावकको कमजोर निगरानीले समस्या झन् जटिल बनेको निष्कर्ष निकालेका छन्। विद्यालयमा कक्षा सञ्चालनकै समयमा शिक्षक तथा विद्यार्थी दुवैले मोबाइल प्रयोग गर्दा सिकाइ प्रक्रिया प्रभावित भएको गुनासो समेत बालबालिकाले गरेका छन्।
भेलाबाट आगामी वर्षका नीति तथा कार्यक्रममा समावेश गर्न विभिन्न योजनासमेत प्रस्ताव गरिएको छ। जसअन्तर्गत विद्यालयमा प्रशासनिक गतिविधि सुदृढ बनाउने, कक्षाकोठामा शिक्षक र विद्यार्थीको मोबाइल प्रयोग नियन्त्रण गर्ने, बालबालिका–अभिभावक–शिक्षकबीच त्रैमासिक अन्तरसंवाद कार्यक्रम सञ्चालन गर्ने, गुनासो सुनुवाइ संयन्त्र स्थापना गर्ने, बाल विवाह तथा मर्यादित महिनावारी व्यवस्थापनसम्बन्धी जनचेतनामूलक सडक नाटक तथा अन्तरक्रिया कार्यक्रम सञ्चालन गर्ने, लागू पदार्थ दुर्व्यसन र अनलाइन सुरक्षाबारे अभिमुखीकरण कार्यक्रम गर्ने लगायतका योजना समावेश छन्।
यसैगरी बालमैत्री व्यवहार लागू गर्ने तथा पालिका स्तरमा बाल उद्यान निर्माणका लागि स्थानीय सरकार र साझेदार निकायसँग सहकार्य तथा माग गर्ने निर्णयसमेत गरिएको छ।
दुई दिने बाल भेलाको सहजीकरण आस्था नेपालका दिल बहादुर शाही र वाक नेपालका दिनेश विकले गर्नुभएको थियो भने कार्यक्रम सञ्चालन नगर बाल सञ्जालका नि बर्तमान अध्यक्ष डिग्रा बजगाईंले गर्नुभएको थियो।
