01/09/2025
चैनपुरमा शिक्षकमाथि धारिलो हतियार प्रहार
📍 स्थान: बझाङ, भदौ १६
बझाङ जिल्लाको मष्टा गा,पा–१ रनाडास्थित माइतिबन निम्न माध्यमिक विद्यालयका अङ्ग्रेजी शिक्षक ध्रुव बहादुर रोकायामाथि आइतबार राति अज्ञात व्यक्तिहरूले धारिलो हतियार प्रहार गरेका छन्।
रोकायाको दायाँ कानको भागमा खुकुरी प्रहार हुँदा गम्भीर चोट लागेको जनाइएको छ। प्रारम्भिक उपचारपछि अवस्था गम्भीर बनेपछि उनलाई थप उपचारका लागि धनगढी रिफर गरिएको परिवार स्रोतले जानकारी दिएको छ। रोकायाको घर खप्तडछान्ना–३ सिप्टिकोटमा पर्छ।
घटनाबारे प्रारम्भिक अनुसन्धानमा प्रहरी नायब उपरीक्षक खगेन्द्र धमलाले अत्यधिक मदिरा सेवनका कारण उनी आफैँ लडेका हुन सक्ने अनुमान व्यक्त गरे पनि, पीडित परिवारले यस्तो गम्भीर चोट सामान्य लडाइँबाट सम्भव नरहेको भन्दै निष्पक्ष छानबिनको माग गरेका छन्।
घाइते रोकायाले बयान दिँदै, दुई–तीन जनाको समूहमा आएका अज्ञात व्यक्तिहरूले दुई हजार रुपैयाँ माग्दा आफूले अस्वीकार गरेपछि धारिलो हतियार प्रहार गरी भागेको बताएका छन्।
स्थानीयवासीहरूले पछिल्लो समय चैनपुर क्षेत्रमा लागुऔषध दुरुपयोग र मदिराजन्य समस्या बढ्दै गएको भन्दै यस घटनामा संगठित समूहको संलग्नता हुन सक्ने आशंका व्यक्त गरेका छन्।
Sudurpachim update / सुदूरपश्चिम अपडेट@topfans
