28/07/2025
श्रम मन्त्रालयको डिजिटलाइजेसनबारे सञ्चारकर्मीसँग साक्षात्कार कार्यक्रम सम्पन्न
Youth Eyes | मिति: २०८२ साउन १२ गते, आइतबार | समय: बिहान ११:५५ बजे | स्थान: सिंहदरबार, काठमाडौं
श्रम, रोजगार तथा सामाजिक सुरक्षा मन्त्रालयद्वारा "श्रम संसार" प्रणालीको प्रयोग र विस्तार तथा मन्त्रालयको समग्र डिजिटलाइजेसन प्रक्रिया सम्बन्धमा सञ्चारकर्मीसँग विशेष साक्षात्कार कार्यक्रम सम्पन्न भएको छ।
उक्त कार्यक्रम २०८२ साल साउन १२ गते (आइतबार), बिहान ११:५५ बजे सिंहदरबारस्थित मन्त्रालयको सभाहलमा आयोजना गरिएको हो। कार्यक्रममा श्रम, रोजगार तथा सामाजिक सुरक्षा मन्त्री माननीय शरत सिंह भण्डारी प्रमुख अतिथिका रूपमा सहभागी हुनु भएको थियो।
राष्ट्रिय योजना आयोगका माननीय सदस्य प्रकाश कुमार श्रेष्ठ, मन्त्रालयका सहसचिव कृष्ण सापकोटा, मन्त्रालयका अन्य कर्मचारी, विभिन्न सञ्चारमाध्यमका पत्रकार तथा सरोकारवालासहित झण्डै ४५–५० जनाको उपस्थिति रहेको थियो।
कार्यक्रमको मूल उद्देश्य "श्रम संसार" प्रणाली मार्फत श्रमिक तथा रोजगारदाताबीचको समन्वय, सरकारी सेवा प्रवाहमा पारदर्शिता तथा दक्षता बढाउने विषयमा सञ्चारकर्मीहरूलाई विस्तृत जानकारी गराउनु थियो।
मन्त्री भण्डारीले आफ्नो मन्तव्यमा भने, “डिजिटल युगमा सरकारी सेवा प्रवाह पारदर्शी, प्रभावकारी र सहज बनाउन प्रविधिको प्रयोग अपरिहार्य छ, र श्रम मन्त्रालय त्यसै दिशामा दृढताका साथ अघि बढिरहेको छ।”
त्यसैगरी आयोगका सदस्य श्रेष्ठले डिजिटल प्रणालीले श्रम व्यवस्थापन प्रणालीमा विश्वसनीयता र पारदर्शिता थप्ने विश्वास व्यक्त गरे।
