21/08/2025
काभ्रेलाई राजधानी बनाउन नसकिएकोमा दुःख व्यक्त : अग्नि सापकोटा
भाद्र ५, बिहीबार, २०८२
काभ्रेपलाञ्चोक । नेकपा माओवादी केन्द्रका उपाध्यक्ष तथा पूर्व सभामुख अग्नि प्रसाद सापकोटाले बागमती प्रदेशको राजधानी काभ्रेलाई बनाउन नसकिएकोमा गहिरो दुःख व्यक्त गर्नुभएको छ ।
आज काभ्रेबाट प्रकाशित सुसन्देश साप्ताहिक पत्रिकाको २३औं वर्ष प्रवेशको अवसरमा आयोजित वार्षिकोत्सव कार्यक्रममा शुभकामना दिँदै उहाँले काभ्रेका पाँच नगरपालिकालाई एकीकृत गरी महानगर बनाउने सम्भावना रहेको उल्लेख गर्नुभयो । उहाँले भन्नुभयो, “काभ्रे उठ्यो भने बागमती प्रदेश उठ्छ । त्यसका लागि दलका नेताहरुले साझा दृष्टिकोण बनाएर अघि बढ्न आवश्यक छ ।”
सापकोटाले समाजलाई उन्नत बनाउन समाजवाद नै अन्तिम व्यवस्था भएको प्रष्ट पार्दै हालको विश्व राजनीति अमेरिक–चीनबीचको व्यापार युद्धतर्फ धकेलिएको बताउनुभयो । उहाँले भन्नुभयो, “अबको शीतयुद्ध व्यापारमा परिणत भएको छ । शक्ति राष्ट्रहरुले अन्तर्राष्ट्रिय मूल्य–मान्यता र सिद्धान्त मिचिरहेका छन् । नेपालका संसदमा समेत यसको असर देखिएको छ ।”
उहाँले हालैको ‘कुलिङ पिरियड काण्ड’ ले कानुनको धज्जी उडाएको र त्यसको उदाङ्गो सरकारकै प्रमुख र सचिव हुँदै राष्ट्रपति सम्मले बुझेको टिप्पणी गर्नुभयो । ठूला दलको गठबन्धन सरकार संविधानविरोधी रहेको आरोप लगाउँदै भूमि विधेयक, शिक्षा विधेयक र कुलिङ पिरियडसम्बन्धी प्रावधानले गम्भीर समस्या सिर्जना गरेको बताउनुभयो । उहाँको भनाइ थियो, “अब जनता हेरेर बस्ने समय छैन । समाजवादको नारा सडकदेखि सदनसम्म उठाउन जरुरी छ, किनभने यो जनताले ल्याएको व्यवस्था हो ।”
पत्रकारिताको भूमिकाबारे बोल्दै उहाँले छापा पत्रपत्रिकाको अस्तित्व अझै महत्त्वपूर्ण रहेको उल्लेख गर्नुभयो । “माक्र्स, लेनिन र स्टालिन समेत पत्रकार हुनुहुन्थ्यो । रसियन क्रान्तिको समयमा ज्ञानको विकास हुँदै गर्दा पुरानो विश्व व्यवस्था ढलेको थियो । आज फेरि नयाँ व्यवस्था बन्ने चरणमा छौँ । अहिलेका शक्ति राष्ट्रहरू गुण्डा शैलीमा चलेका छन्,” उहाँले भन्नुभयो ।
कार्यक्रममा नेकपा माओवादी केन्द्रका सांसद लालध्वज तामाङले निरंकुशताविरुद्ध बन्दुक मात्र नभई सञ्चारमाध्यमले पनि निर्णायक भूमिका खेलेको स्मरण गर्नुभयो । बागमती प्रदेश सांसद लक्ष्मण लम्सालले डिजिटल युगमा सत्य, तथ्य र सन्तुलनसहित पत्रकारिता गर्नुपर्नेमा जोड दिनुभयो ।
त्यसैगरी, पत्रकार दीपक कुमार गौतमले संचार क्षेत्र कहिलेकाहीँ पार्टीगत देखिए पनि काभ्रेका पत्रकारले नियममा रहेर काम गरेकोमा खुशी व्यक्त गर्नुभयो ।
प्रमुख जिल्ला अधिकारी उमेश ढकालले काभ्रेका पत्रकारहरू राष्ट्रिय सन्दर्भमा पनि सकारात्मक रूपमा उभिएको उल्लेख गर्दै प्रशंसा गर्नुभयो ।
कार्यक्रममा विष्णु मणि नेपाल, राजन भूर्तेल, प्रदेश सञ्चार रजिष्ट्रार प्रमुख रेवति प्रसाद सापकोटा लगायत वक्ताहरूले सुसन्देश पत्रिकाले समाजमा सकारात्मक योगदान दिएको बताए ।
सोही अवसरमा राजन अधिकारी, शुभराज अधिकारी, रविन मानन्धर, चित्र घिमिरे, विपशना शाक्य, मनिषा तिमल्सिना, श्याम प्रसाद दाहाल, कृष्ण खत्री, सीता थापा, सुमित्रा सुमि, चूडामणि तिमल्सिना, भोजराज तिमल्सिना, सन्त तुलन गिरी, कुमार अधिकारी, नेकपा माओवादीका काभ्रे इन्चार्ज भोला अर्याल, मोहन दुवाल, महाभारत गाउँपालिका अध्यक्ष कान्छालाल जिम्वा, बेथानचोक उपाध्यक्ष तारा राणा तिमल्सिनालगायतलाई सम्मान गरिएको थियो ।
