06/10/2025
कतै जाँदै हुनुहुन्छ ? सडकको अवस्था बुझेर मात्र निस्कनुहोस् है!
काठमाडौँ उपत्यकाको सवारी आवागमन यतिबेला सामान्य रहेको छ । काठमाडौँ उपत्यका भित्रिने र बाहिरिने विभिन्न नाकाहरूको सवारी आवागमन पनि सामान्य रहेको ट्राफिक कन्ट्रोल रुमले जनाएको छ ।
अविरल वर्षाका कारण अवरुद्ध रहेको मकवानपुर-हेटौडा-सिस्नेरी-काठमाडौँ र हुमाने-फाखेल-काठमाडौँ जोड्ने सडक खण्ड एकतर्फी रूपमा सञ्चालनमा आएका छन् ।
मकवानपुरबाट काठमाडौँतर्फ आउने सवारी साधनले सिस्नेरी-दक्षिणकाली-काठमाडौँको बाटो प्रयोग गर्ने र काठमाडौँबाट मकवानपुरतर्फ जाने सवारी साधनले काठमाडौँ-फाखेल-मकवानपुरको बाटो प्रयोग गर्ने गरी सवारी सञ्चालनमा ल्याइएको छ ।
बाढीपहिरोका कारण अवरुद्ध सडकहरू
१. कान्ति लोकपथमा पर्ने मकवानपुरको भिमफेदी गाउँपालिका ८ बगुवा र भर्याङडाँडा तथा बकैया गाउँपालिका ११ सिमात र घट्टेपाखामा पहिरो खस्दा सवारी आवागमन रोकिएको छ ।
२. वि.पी. राजमार्गमा पर्ने काभ्रेपलाञ्चोकको रोशी गाउँपालिका ११ माम्तीखोला, बुलढुंगा र मंगलटार खोलामा आएको बाढीले सडक कटान गरेकाले आवतजावत अवरुद्ध भएको छ ।
३. कोशी राजमार्गमा पर्ने संखुवासभाको मकालु गाउँपालिका ३ एकुवा र भोटखोला गाउँपालिका ४ बरूणमा खसेको पहिरोका कारण सवारी साधन आज पनि चल्न सकेका छैनन् ।
४. पासाङल्हामु राजमार्गमा पर्ने रसुवाको गोसाइकुण्ड गाउँपालिका २ स्थित घट्टेखोला, बालुवाखानी र तातोपानीमा खसेको पहिरोको कारण सवारी साधन चल्न सकेका छैनन् ।
५. सिद्धिचरण लोकमार्ग अन्तर्गत ओखलढुङ्गाको मानेभन्ज्याङ गाउँपालिका ६ र ७ को सीमाना स्थित भडारे खोलामा लेदो सहितको बाढी आएकाले आवतजावत पूर्ण रूपमा अबरुद्ध भएको छ ।
६. अरनिको राजमार्ग अन्तर्गत पर्ने सिन्धुपाल्चोकको भोटेकोशी गाउँपालिका ४ चारकिलोमा गएको पहिरोका कारण आवतजावत पूर्ण रूपमा अबरुद्ध भएको छ ।
७. रसुवाको गोसाइकुण्ड गाउँपालिका २ रसुवागढी स्थित नेपाल र चीन नाका जोड्ने मितेरी पुलमा गत असार २४ गते आएको बाढीले क्षति पुर्याएकाले सवारी आवागमन अवरुद्ध रहेको छ ।
८. मध्य पहाडी लोकमार्गमा पर्ने सिन्धुलीको फिक्कल गाउँपालिका ६ नागस्थानमा सडकमा खसेको पहिरोले गर्दा सवारी आवागमन प्रभावित भएको छ ।
#स्रोत ट्राफिक प्रहरी (अपडेट समय ११ बजे)