08/08/2026
उच्च शिक्षा सुधारमा पारदर्शिता र प्रविधिमैत्री प्रणालीमा जोड
काठमाडौं, २३ साउन । उच्च शिक्षाको गुणस्तर अभिवृद्धिका लागि विश्वविद्यालयमा संकाय भर्ना, विकास र पदोन्नति प्रणालीलाई पारदर्शी, समावेशी तथा परिणाममुखी बनाउनुपर्ने निष्कर्षसहित दुईदिने नीति कार्यशाला सम्पन्न भएको छ।
शिक्षा तथा खेलकुद मन्त्रालयद्वारा आयोजित कार्यशालामा विश्वविद्यालयका नियुक्ति तथा पदोन्नतिमा समान मापदण्ड, प्रमाण र तथ्यमा आधारित निर्णय प्रणाली तथा अनुसन्धान र नवप्रवर्तनलाई प्रोत्साहन गर्नुपर्नेमा जोड दिइयो।
शिक्षामन्त्री सस्मित पोखरेलले शिक्षक तथा कर्मचारी नियुक्ति प्रक्रिया पारदर्शी र निष्पक्ष हुनुपर्ने बताउँदै विश्वविद्यालयको सञ्चालन तथा व्यवस्थापनलाई प्रविधिमैत्री बनाउनुपर्नेमा जोड दिनुभयो।
कार्यशालामा विश्वविद्यालय, विश्वविद्यालय अनुदान आयोग, राष्ट्रिय योजना आयोग, शिक्षाविद् तथा नीति विज्ञहरूको सहभागिता रहेको थियो।
