28/04/2025
"नेपाल कोरिया मैत्री नगरपालिका अस्पताल उत्कृष्ट : स्वास्थ्य मन्त्रीको प्रशंसा
नयाँ ब्लड बैंक शुभारम्भ"
मध्यपुर थिमि नगरपालिकाले सञ्चालन गरेको नेपाल कोरिया मैत्री नगरपालिका अस्पतालले आफ्नो १७औं स्थापना दिवस विशेष कार्यक्रम भव्य रूपमा सम्पन्न गरेको छ। सो अवसरमा प्रमुख अतिथि नेपाल सरकारका स्वास्थ्य मन्त्री प्रदिप पौडेलले अस्पतालको उल्लेखनीय प्रगतिको प्रशंसा गर्दै देशभरका विशिष्ट अस्पतालहरूमा समेत उपलब्ध नभएका CTscan र डायलाइसिस सेवाजस्ता उच्चस्तरीय सेवा विस्तार गरेकोमा खुशी व्यक्त गर्नुभयो।
उहाँले शहरी क्षेत्रमा नयाँ विशिष्ट अस्पताल निर्माण गर्नु आवश्यक नभई, विद्यमान अस्पतालहरूको पूर्वाधार सुदृढ गर्दै सेवा प्रवाहलाई विस्तार गर्नुपर्ने धारणा राख्नुभयो। साथै, देशभरका ६४४३ वटै स्थानीय तहहरूमा आधारभूत स्वास्थ्य केन्द्र विस्तार गर्दै तिनलाई रिफरल सेन्टरका रूपमा विकास गर्नुपर्ने आवश्यकता औंल्याउनुभयो।
स्वास्थ्य बीमासम्बन्धी समस्यामा मन्त्री पौडेलले विमाकोषको आम्दानी वार्षिक १.५ अर्ब मात्र भए तापनि दाबी १६ अर्बभन्दा बढी भएकाले हाल समस्या उत्पन्न भएको र अब विमाको मोडल परिवर्तन गर्दै आम्दानी बढाउने र नेपाल सरकारले नियमित अनुदान उपलब्ध गराउने नीति लिनुपर्ने बताउनुभयो। तर हालका लागि बीमा दाबी भुक्तानी कसरी गर्ने भन्नेबारे स्पष्ट कार्ययोजना भने प्रस्तुत गर्नुभएन।
कार्यक्रमकै क्रममा अस्पतालका मेडिकल डाइरेक्टर डा. डिके रोशनले चालू आर्थिक वर्षको ९ महिनामा अस्पतालले प्रदान गरेको सेवाको तथ्यांक प्रस्तुत गर्नुभयो। तथ्यांक अनुसार अस्पतालले यस अवधिमा:
१,५०,११७ जना बिरामीलाई OPD सेवा,
३,११८ जना बिरामीलाई भर्ना (IPD) सेवा,
७०,००० प्रयोगशाला परीक्षण,
५७,४१३ एक्सरे,
१५५१ CT स्क्यान,
१०,९५९ ECG परीक्षण,
१७,८८० USG परीक्षण,
७४४ हेमोडायलाइसिस सेवा,
९९० कोलोनोस्कोपी र एन्डोस्कोपी परीक्षण,
१६३१ वटा शल्यक्रिया सेवा प्रदान गरेको जानकारी दिनुभयो।
उक्त अवधिमा अस्पतालले ३९ करोड २९ लाख ३४ हजार रुपैयाँ आम्दानी र ३३ करोड ७७ लाख ८१ हजार रुपैयाँ खर्च गरेको छ। हाल अस्पतालसँग २६ करोड रुपैयाँ बीमा दाबी वापत भुक्तानी हुन बाँकी रहेको पनि जानकारी गराइयो।
कार्यक्रममा नगरप्रमुख सुरेन्द्र श्रेष्ठले नगरपालिकाले स्वास्थ्य क्षेत्रमा गरिरहेको कामको विवरण प्रस्तुत गर्दै, अस्पतालको विकास यात्रामा नगरपालिकाको प्रतिबद्धता दोहोर्याउनुभयो। उहाँले कार्यक्रमकै दौरान प्रमुख अतिथि स्वास्थ्य मन्त्री र आफुले संयुक्तरुपमा अस्पतालको नयाँ ब्लड बैंक सेवा शुभारम्भ गर्नुभयो। उहाँले जानकारी दिनुभयो कि ब्लड बैंक सेवा एक महिनाभित्र पूर्ण रूपमा नियमित सञ्चालनमा आउनेछ, जसले नगरवासी र आसपासका जनतालाई आपतकालीन रक्त सेवा सहज बनाउनेछ।
कार्यक्रममा नेकपा (माओवादी केन्द्र) का केन्द्रीय सदस्य तथा युवा नेता दिलीप कुमार प्रजापतिले अस्पतालको सेवा गुणस्तर राम्रो भएको उल्लेख गर्दै, मध्यपुर थिमि नगरपालिका मात्र नभई मकवानपुर, सिन्धुली, सिन्धुपाल्चोकलगायतका जिल्लाका जनताले समेत यहाँबाट सेवा लिएको चर्चा गर्नुभयो।
स्वागत मन्तव्य नेपाली कांग्रेसका नगर सभापति हरिदास प्रजापतिले दिनुभएको थियो। कार्यक्रम सञ्चालकले उपप्रमुख विजयकृष्ण श्रेष्ठ स्वास्थ्य सम्बन्धी समस्याका कारण कार्यक्रममा उपस्थित हुन नसकेको जानकारी दिनुभएको थियो ।
अस्पतालका मेडिकल डाइरेक्टर डा. डिके रोशनले आर्थिक तथा सेवा प्रवाहको अवस्थाबारे विस्तृत विवरण प्रस्तुत गर्दै अस्पताल अहिले तलब भुक्तानी सहजरुपमा गर्न सक्ने अवस्थामा रहेको र विगतको चुनौतीभन्दा स्थिति धेरै सुधारिएको उल्लेख गर्नुभयो। नगर प्रमुख, उपप्रमुख, प्रमुख प्रशासकीय अधिकृत लगायत सम्पूर्ण टिमको मेहनतले अस्पताल विकासको दिशामा द्रुतगतिमा अघि बढिरहेको धारणा पनि व्यक्त गर्नुभएको थियो।
नेपाल कोरिया मैत्री नगरपालिका अस्पतालले १७ वर्षको यात्रामा जनताको विश्वास जित्दै गुणस्तरीय सेवा विस्तार गरेको छ। सेवा प्रवाह, आर्थिक अनुशासन र पूर्वाधार विकासमा अस्पतालले उदाहरणीय प्रगति गरेको देखिन्छ। हाल कोरिया सरकारको १ अरव भन्दा माथिको आर्थिक सहयोगमा अस्पतालको सुविधासम्पन्न भवन निर्माण द्रुत गतिमा अगाडि वढेको छ । नयाँ ब्लड बैंकको शुभारम्भले सेवा क्षमतामा थप वृद्धि हुनेछ। स्वास्थ्य मन्त्रीको उच्चस्तरीय प्रशंसा र स्थानीय सरकारको दृढ संकल्पले अस्पतालको आगामी भविष्य अझ उज्जवल देखिन्छ।
सो क्रममा रक्तदान कार्यक्रम पनि आयोजना गरिएको थियो ।
