18/05/2022
दाेलखामा भत्कियाे एमाले किल्ला : पार्वत र आनन्दकै गाउँपालिका गुमे
लामाे समय देखिकाे आफ्नो गढ जिल्ला दाेलखाका धेरै स्थानबाट एमाले बढारिएकाे छ ।
२०७४ मा ९ मध्ये ७ स्थानीय तह र ७४ मध्ये ४४ ओटा जितेकाे एमाले या निर्वाचनमा नराम्ररी खुम्चिएकाे छ ।
बुधबार साँझसम्म सकिएकाे मतगणना अनुसार एमालेले दुई ओटा स्थानीय तहमा मात्रै प्रमुख र उपप्रमुख जितेकाे छ । ५८ वडाकाे मतपरिणाम आउँदा एमालेले १५ वडा जितेकाे छ ।
माओवादीले २१ वडा जितेकाे छ । कांग्रेसले २० ओटा वडामा अध्यक्ष विजयी भएका छन् । दुई ओटा वडामा स्वतन्त्रले अध्यक्ष जितेका छन् ।
६ ओटा स्थानीय तहकाे मतगणना सकिदा जिरी नगर र मेलुङ गाउँपालिकामा मात्र एमालेले जितेकाे छ । जिरीका ९ मध्ये एउटा मात्र वडा अध्यक्ष जितेर अल्पमतकाे कार्यपालिकाकाे नेतृत्व गर्ने गरि एमालेका मेयर र उपमेयर विजयी भएका छन् ।
कांग्रेसले कालिञ्चाेक गाउँपालिका र वैत्येश्वर गाउँपालिकामा अध्यक्ष जितेकाे छ । वैत्येश्वरमा कांग्रेसका जिल्ला उपसभापति छवि लामा अध्यक्ष र कांग्रेसकै कल्पना उप्रेतीले उपाध्यक्ष पदमा चुनाव जितेका छन् । छवि यश अघि समेत गाउँपालिका अध्यक्ष थिए । कालिञ्चाेकमा कांग्रेसका अर्का जिल्ला उपसभापति अर्जुन शिवाकोटीले अध्यक्ष र माओवादी केन्द्रका कुलबहादुर बुढाथोकीले उपाध्यक्ष जितेका छन् ।
गाैरीशंकर गाउँपालिकामा नेकपा माओवादी केन्द्रका विश्वास कार्कीले अध्यक्ष र कांग्रेसका श्यामसुन्दर तामाङले उपाध्यक्ष जितेका छन् । याे एमालेका पाेलिटब्युराे सदस्य एवं पूर्व सञ्चारमन्त्री पार्वत गुरुङको गाउँपालिकामा हाे ।
२०७४ काे स्थानीय चुनावमा पालिका अध्यक्ष र उपाध्यक्ष सहित ७ ओटा वडा जितेको एमाले एउटा वडामा खुम्चिएकाे छ । ९ ओटा वडा रहेकाे पालिकाका ५ ओटामा माओवादी केन्द्र र तीन ओटा वडामा नेपाली कांग्रेसले जितेकाे छ । याे गाउँपालिकालाई एमाले नेता गुरुङले आफ्नो किल्लाका रुपमा घाेषणा गर्ने गरेका थिए ।
यस्तै अर्का पाेलिटब्युराे सदस्य एवं पूर्व पर्यटन मन्त्री आनन्द पाेखरेलकाे तामाकाेशी गाउँपालिकामा नेकपा एकीकृत समाजवादीले अध्यक्ष जितेको छ । उपाध्यक्षमा कांग्रेसकी सिर्जना सुवेदी विजयी भएकी छन् ।
विगु र शैलुङ गाउँ पालिका साथै भीमेश्वर नगरपालिकाकाे मतपरिणाम आउन बाकी छ । भीमेश्वरकाे मेयरमा कांग्रेसका ईश्वर मानन्धरले अग्रता लिईरहेका छन् । एमालेका गढ वडाहरुकाे गणना गर्दा समेत उनी नै अगाडि देखिएकाले उनले सहजै जित निकाल्ने आकलन गरिएकाे छ। उपमेयरमा एमालेकी कमला बस्नेत र समाजवादीकि संगीता पाख्रिन बिच प्रतिष्पर्धा छ । बस्नेतकाे वडा सकेर पाख्रिनकाे वडा गणना हुन बाकी रहेकाले कमलालाई समेत उपमेयरमा चुनाैती छ । एमाले गढ मानिने वडा नं १ काे सुष्पाक्षमावतीमा कांग्रेसकाे प्यानलनै विजयी भएकाे छ । याे कांग्रेस केन्द्रीय सदस्य अजयबाबु शिवाकोटीकाे वडा हाे ।
विगु र शैलुङमा माओवादी केन्द्रका अध्यक्षहरुले अग्रता लिईरहेका छन्।
Bolichali.com बाट साभार गरिएको
