24/09/2025
चितवनको पुरानो मेडिकल कलेजका नर्सहरू आन्दोलित, तलब र सेवा सुविधा माग गर्दै धर्ना
चितवन : चितवनस्थित पुरानो मेडिकल कलेजका नर्सहरू तलब नपाएको, सेवा सुविधा कटौती भएको र कामको असहज वातावरणको विरोधमा आन्दोलनमा उत्रिएका छन्। उनीहरूले मंगलबार अस्पताल परिसरमै धर्ना दिएका छन्।
नर्सहरूका अनुसार महिनौँदेखि तलब नपाउनुका साथै अन्य सुविधाहरू पनि व्यवस्थित नभएको गुनासो गर्दै आएका थिए। बारम्बार प्रशासनसँग कुरा गर्दा पनि कुनै सुनुवाइ नभएको भन्दै उनीहरू आक्रोशित भएका छन्।
“हामीहरू रातदिन खटिन्छौँ, तर महिनौँदेखि तलब छैन। समस्या उठाउँदा बेवास्ता गरिन्छ,” आन्दोलनमा सहभागी एक नर्सले भनिन्।
प्रदर्शनका कारण अस्पतालको सेवा प्रवाहमा समेत असर परेको बताइएको छ। अत्यावश्यक सेवाबाहेकका विभागहरूमा काम प्रभावित भएको स्थानीय स्रोतले जनाएका छन्।
नर्सहरूले आफ्ना माग पूरा नभएसम्म आन्दोलन जारी राख्ने चेतावनी दिएका छन्। यता, अस्पताल प्रशासनले भने हालसम्म यसबारे औपचारिक प्रतिक्रिया दिएको छैन।
