14/01/2025
आजदेखि जन अपेडट डटकम तेस्रो वर्षमा
जन अपडेट मिडिया एण्ड एडभर्टाइजमेन्ट प्रा.लि. द्दारा संचालित जन अपेडट डटकम आजदेखि दोस्रो वर्ष पूरा गरी तेस्रो वर्षमा प्रवेश गरेको छ । तेस्रो वार्षिकोत्सवका उपलक्ष्यमा हाम्रो गौरवमय यात्रामा साथ दिनुहुने हाम्रा सम्पूर्ण जिल्ला संवाददाताहरु, पाठकवृन्द, विज्ञापनदातालगायत सबै सहयोगी एवं शुभेच्छुक महानुभावहरुप्रति दोस्रो वार्षिकोत्सवको उपलक्ष्यमा हार्दिक आभार तथा कृतज्ञता व्यक्त गर्न चाहान्छौँ । तीन वर्ष प्रवेशको यो क्षणमा प्राप्त उपलब्धि र आर्जित अनुभवप्रति हामी गौरवान्वित छौँ । हामी आज जहाँ र जुन अवस्थामा छौँ, यो तपाईँहरूको विश्वास र साथबिना सम्भव थिएन र छैन । यो छोटो विगत र अनन्त भविष्यमा तपाईँको साथी र सारथि बनिरहनु नै हाम्रो धर्म हो । तपाईँको यहीँ न्यानो माया एवं प्रगाढ प्यार हिजोभन्दा आज बढी र आजभन्दा भोलि झन् बढी हुँदै जाओस् ।
हाम्रो समाचारले सधैँ सत्यको साथ दिन्छ र समाजलाई उज्ज्वल भविष्यतर्फ लम्कन प्रेरित गर्ने कोसिस गर्छ । हामी कुनै पक्षधरतामा अडिनु भन्दा निष्पक्षता, विश्वसनीयता र तथ्यपरकतामा सतिसाल झैँ अडिग छौँ । तपाईँहरूको यहीँ भरोसाले हामीलाई सदैव आफ्नो प्रतिबद्धताहरूमा खरो उत्रन निरन्तर प्रेरणा दिन्छ । हाम्रा समाचारलाई जिम्मेवार ढङ्गले प्रस्तुत गर्न ऊर्जा थप्छ । यस यात्रामा तपाईँहरूको विश्वास र सहभागिता हाम्रो ठूलो सम्पत्ति हो । हाम्रो उद्देश्य केवल समाचार पुर्याउनु मात्र होइन । हामी सत्यका पहरेदार पनि हौँ । खुला, उदार र प्रतिस्पर्धी समाज एवं त्यहीँ ढाँचाको अर्थव्यवस्था निर्माणमा हाम्रो कलमले सधैँ इमानको रङ भर्दै आएको छ । यहीँ कामका लागि साना - ठूला सबै आवाजलाई समान रूपमा प्रस्तुत गर्ने हाम्रो प्रतिबद्धता अझ बलियो बनाउने प्रण गर्छौँ ।
हामीलाई थाहा छ - कुनै कोरा सूचना मात्र पर्याप्त हुँदैन । सामाजिक सञ्जालले यस युगमा तपाईँसामु सूचनाको वेग अत्यन्त तीव्र छ, तर त्यस सूचनामाथिको विश्लेषण र त्यसको विवेचना अबका दिनमा समाचार संस्थाहरूको प्रस्तुतिको शैली बन्दै छन् । यहीँ सुन्दर छटामा सिङारिने कोसिस रहेकोले गरेका हुन्छन्, त्यहीँ रङ्गमञ्चमा आफ्नो क्षमताले भ्याएसम्म हामी पनि खरो उत्रने कोसिस गरिरहेका छौँ । हामी सदैव आफ्नो भूमिकाप्रति जिम्मेवारीपूर्वक प्रस्तुत छौँ । हामी तपाईँका हरेक सल्लाह र सुझावलाई शिरोधार्य गर्दै, आफ्नो कार्यशैलीलाई सुधार्न सदा तत्पर छौँ । तपाईँहरूको प्रतिक्रिया नै हाम्रा लागि आफूलाई थप परिष्कृत गर्ने र तपाईँसँग अझ निकट भएर उभिने आधार हो ।
हामी केवल समाचार संस्था होइनौँ, यो समाजको एक अभिन्न अंश पनि हौँ । हामी एकै परिवारका सदस्य हौँ । त्यसैले त तपाईँसँगै हामी पनि उद्यमशीलता, पारदर्शिता र दिगोपनका पक्षमा उभिँदै आएका छौँ । भविष्यका चुनौतीहरूसँग जुध्न, समाजलाई अघि बढाउन र जिम्मेवार पत्रकारितालाई निरन्तरता दिन, हामी जहिले पनि कटिबद्ध छौँ । यिनै प्रयासको जगमा खडा भएको यस जन अपडेट डटकम परिवारले आज आफ्ना स्वर्णिम २ वर्ष पुरा गरेको छ ।
अन्तमा, तपाईँहरूको माया, विश्वास र समर्थनले हामीलाई अझ बढी ऊर्जा मिलेको छ र हाम्रा पदहरू अझै सशक्त बनाएको छ । यो उत्साहलाई हामी अनवरत राख्ने वाचा आज तपाईंहरुसामु गर्दछौँ । तपाईँ सबैमा तेस्रो वार्षिकोत्सवको भारी भारी शुभकामना । धन्यवाद ।
