24/09/2026
नेपाली कांग्रेस रत्ननगर नगर सभापतिमा उमेश गिरी विजयी, रत्ननगर नगर समितिको प्यानलै गिरी समूहले जित्यो ।
रत्ननगर, असोज ८ ।
नेपाली कांग्रेस रत्ननगर नगर समितिको नेतृत्व चयनका लागि भएको निर्वाचनबाट उमेश गिरी नगर सभापतिमा निर्वाचित भएका छन्। पार्टीको १५औँ महाधिवेशनअन्तर्गत बुधबार सम्पन्न निर्वाचनको अन्तिम परिणामअनुसार गिरीले २९५ मत प्राप्त गर्दै सभापतिमा विजयी भएका हुन्।
उनका प्रतिस्पर्धी रामहरि न्यौपानेले १९४ मत प्राप्त गरे। गिरीले न्यौपानेलाई १०१ मतको अन्तरले पराजित गरेका हुन्।
नगर समितिका सबेै पदमा गिरी समूहका उम्मेदवारहरू विजयी भएका छन्। उपसभापतिमा हरि लामिछाने ३१९ मतसहित निर्वाचित हुँदा उनका प्रतिस्पर्धी नारायण महतोले १८३ मत प्राप्त गरे।
त्यस्तै महिला उपसभापतिमा सरस्वती चालिसे २६८ मत प्राप्त गर्दै विजयी भइन्। उनकी प्रतिस्पर्धी रिता काप्रीले २२५ मत प्राप्त गरिन्।
सचिव पदमा भने निकै प्रतिस्पर्धात्मक परिणाम आएको छ। सुरेशजङ्ग पाण्डे २५६ मतसहित निर्वाचित हुँदा उनका निकटतम प्रतिस्पर्धी सुवर्ण घिमिरेले २४५ मत प्राप्त गरे। पाण्डेले घिमिरेलाई ११ मतको झिनो अन्तरले पछि पारेका हुन्।
सहसचिवमा मिलनकुमार क्षेत्री २६९ मत प्राप्त गरी निर्वाचित भएका छन्। उनका प्रतिस्पर्धी पुरुषोत्तम लामिछानेले २३० मत प्राप्त गरे।
गिरी समूहका उम्मेदवारहरू विजयी भएसँगै रत्ननगर कांग्रेसको नगर नेतृत्वमा उमेश गिरी नेतृत्वको समूहको प्रभाव देखिएको छ। निर्वाचन परिणाम सार्वजनिक भएपछि नवनिर्वाचित पदाधिकारीहरूलाई कार्यकर्ता तथा समर्थकहरू एवं शुभचिन्तकहरुले बधाई तथा शुभकामना दिएका छन्।
