22/02/2025
उर्लाबारी क्याम्पसको स्ववियु सभापतिमा अर्बिन घिमिरेको चर्चा
१० फागुन / उर्लाबारी
शुक्रबार त्रिभुवन विश्वविद्यालयले स्वतन्त्र विद्यार्थी युनियन(स्ववियु) निर्वाचनको कार्यतालिका सार्वजनिक गरेको छ । चैत ५ गते तय भएको स्ववियु निर्वाचनको लागि विद्यार्थी संगठनहरु चलायमान भैसकेका छन् ।
यसैबिच मोरङको उर्लाबारी-४ स्थित उर्लाबारी बहुमुखी क्याम्पसको स्ववियु सभापतिमा लोकप्रिय विद्यार्थी नेता अर्बिन घिमिरेको नाम चर्चामा आउन थालेको छ । नेपाली कांग्रेस निकट भातृ संगठन नेपाल विद्यार्थी संघ (ने.वि. संघ) को उर्लाबारी नगर समिती सभापति समेत रहेका घिमिरे एक जुझारु, संघर्षशील, विकासप्रेमी र बौद्धिक विद्यार्थी नेताका रूपमा परिचित छन्। उर्लाबारीमा विद्यार्थी हकअधिकारका निम्ति अहोरात्र खटिएका उनी संगठनलाई एकजुट गर्न सफल विद्यार्थी नेता हुन् ।
२६ वर्षीय घिमिरे, जो स्नातक तहका विद्यार्थी हुन् । उनी विद्यार्थी राजनीतिमा वि.सं. २०७४ सालदेखि सक्रिय रहँदै आएका छन्। नेवि संघको उर्लाबारी नगर समितिमा सचिव बनेपछि उनले संगठनलाई चलायमान बनाउने मुख्य भूमिका निर्वाह गरे। यस्तै वि.सं.२०८० सालमा नगर सभापति बनेपछि उनले नेतृत्व क्षमतामा नयाँ उचाइ हासिल गरेका छन्।
विद्यार्थीको मुद्धामा केन्द्रित भई विद्यार्थी अधिकारको निम्ति लड्दै आएका घिमिरे असल व्यक्तित्व भएका उदारवादी नेता हुन् ।
अघिल्लो स्ववियु चुनावमा नेवि संघको विजय सम्भव बनाउने प्रमुख रणनीतिकारका रूपमा रहेका घिमिरे यसपटक प्रत्यक्ष प्रतिस्पर्धामा रहन खोजिएको पाईएको छ । उनको नेतृत्वमा प्यानल बनाई आसन्न स्ववियु निर्वाचनमा नेवि संघ सहभागि हुन चाहेको विद्यार्थी नेता दिपेश चौधरी बताउछन्।
यसैबिच शनिबार क्याम्पसमा नेवि संघले स्ववियु चुनाव लक्षित नेतृत्व छलफल गरेको छ । प्राप्त जानकारीअनुसार सो छलफलमा नेवि संघका विद्यार्थीहरूले एकस्वरमा घिमिरेलाई निर्विरोध उम्मेदवारका रूपमा अघि सार्न खोजिएको छ ।
सो अवसरमा नेवि संघका विद्यार्थीहरुले स्ववियु सभापतिमा नेवि संघको तर्फबाट घिमिरेको विकल्प अन्य उम्मेद्वार नभएको बताएका छन् । यस्तै सभापतिमा घिमिरेलाई लिएर अगाडी बढ्ने विषयमा नेपाली कांग्रेस उर्लाबारी नगर समिती समेत सकरात्मक रहेको पाईएको छ ।
उसो त उनी नेपाली कांग्रेस कोशी प्रदेश समितीका सह महामन्त्री खड्गबहादुर फागो निकटका विद्यार्थी नेता समेत हुन् ।
