25/05/2026
भन्सार पुनःस्थापनाको माग चर्कियो, सिरहामा राजमार्ग अवरुद्ध
सिरहाको बरियारपट्टीस्थित छोटी भन्सार कार्यालय पुनःस्थापनाको माग गर्दै जारी आन्दोलन सोमबार पूर्व–पश्चिम महेन्द्र राजमार्गसम्म पुगेको छ। सरकारको बेवास्ताप्रति आक्रोशित आन्दोलनकारीहरूले धनगढीमाई नगरपालिका–१० जिरोमाइलमा टायर बालेर एक घण्टाभन्दा बढी सडक अवरुद्ध गरेका हुन्।
प्रदर्शनका कारण पूर्व–पश्चिम राजमार्ग केही समय पूर्ण रूपमा ठप्प हुँदा सयौं सवारीसाधन जाममा परेका थिए भने चर्को गर्मीका बीच हजारौं यात्रुले सास्ती खेप्नुपरेको थियो। आन्दोलनअघि नै ठूलो संख्यामा प्रहरी परिचालन गरिएको थियो। प्रदर्शनकारीहरूले सरकार तथा प्रधानमन्त्रीविरुद्ध नाराबाजीसमेत गरेका थिए।
स्थानीयवासी, राजनीतिक दल, युवा समूह तथा व्यवसायीहरूको संयुक्त सहभागितामा भएको प्रदर्शनमा “बरियारपट्टिमा भन्सार कायम गर”, “स्थानीय जनताको अधिकार खोस्न पाइँदैन” र “सीमावर्ती क्षेत्रको अस्तित्व बचाऔँ” जस्ता नाराहरू लगाइएको थियो।
कोणसभालाई सम्बोधन गर्दै बरियारपट्टी गाउँपालिका अध्यक्ष सन्तोष कुमार महतोले भन्सार कार्यालय खारेज गरिनु क्षेत्रकै व्यापार, व्यवसाय र जनजीवनका लागि गम्भीर असर हुने बताए। उनले साना व्यवसायीहरूले दैनिक उपभोग्य सामग्री सस्तो मूल्यमा उपलब्ध गराउँदै आएको उल्लेख गर्दै अब ढुवानी खर्च बढ्दा उपभोक्तामाथि थप भार पर्ने बताए।
उनले समयअनुसार भन्सार कार्यालयको स्तरोन्नति गर्नुपर्नेमा उल्टै बन्द गरिएको भन्दै पुनःस्थापनासहित स्तरोन्नतिको मागमा सबैको साथ आवश्यक रहेको धारणा राखे।
स्थानीय अगुवाहरूका अनुसार बरियारपट्टी छोटी भन्सार कार्यालय स्थानीय व्यापार, राजस्व संकलन तथा सीमावर्ती क्षेत्रको आर्थिक गतिविधिको मुख्य आधार रहँदै आएको थियो। कार्यालय हटाइएपछि व्यापारमा गिरावट आउनुका साथै सयौं युवाको रोजगारी प्रभावित भएको दाबी गरिएको छ।
प्रदर्शनमा संविधानसभा सदस्य तथा नेपाली कांग्रेसका नेता रामचन्द्र यादव, धनगढीमाई नगरपालिकाका पूर्वमेयर तथा नेकपाका नेता हरिनारायण चौधरीसहित विभिन्न दलका नेता–कार्यकर्ता, वडाध्यक्ष तथा स्थानीयवासीहरूको सहभागिता रहेको थियो।
नेपाल सरकारले २०८३ वैशाख २१ गते राजपत्रमा सूचना प्रकाशित गर्दै बरियारपट्टी छोटी भन्सार कार्यालय बन्द गर्ने निर्णय गरेको थियो। त्यसको विरोधमा आन्दोलनकारीहरूले वैशाख २३ गते जिल्ला प्रशासन कार्यालय सिरहामार्फत ज्ञापनपत्र बुझाएका थिए भने वैशाख २४ देखि २८ गतेसम्म चरणबद्ध आन्दोलन गरेका थिए।
