06/07/2025
रतुवामाई नगरपालिकामा दमकल संचालनको तयारी, आगलागी नियन्त्रणमा सहज हुने
रतुवामाई । मोरङको रतुवामाई नगरपालिकाले आगलागी नियन्त्रणका लागि दमकल संचालन गर्ने तयारी गरेको छ । नगरपालिकाले दमकल खरिदका लागि बोलपत्र आह्वान गरेको जनाइएको छ ।
नगर प्रमुख नागेश्वरप्रसाद सिंहले नगर क्षेत्रमा विगतमा भएका आगलागीका घटनाबाट हुने ठूलो क्षति रोक्नका लागि दमकल आवश्यक रहेको बताउनु भएको छ । “अहिलेसम्म दमकल नहुँदा आसपासका पालिकाबाट दमकल झिकाउँदा ढिलो हुने, त्यसले जनधनको क्षति बढाउने गरेको थियो,” उहाँले भन्नुभयो, “अब आफ्नै दमकल भएपछि आगलागी नियन्त्रण सहज र छिटो हुने अपेक्षा गरेका छौं ।”
दमकल खरिदका लागि आवश्यक प्रक्रिया अघि बढाइएको र चाँडै नै नगरवासीलाई यो सेवा उपलब्ध हुने नगरपालिकाले जनाएको छ । हाल नगरपालिकाले प्राविधिक मूल्यांकनसहितको बोलपत्र प्रक्रिया थालिएको जनाएको छ ।
नगर क्षेत्रका विद्यालय, बजार, उद्योग, टोल र घरहरुमा आगलागीको सम्भावना न्यूनिकरण गर्न, विपद् व्यवस्थापनमा दमकल महत्त्वपूर्ण साधन हुने विश्वास गरिएको छ ।
