13/07/2025
राष्ट्रिय सहकारी महासंघकी अध्यक्ष ओमदेवी मल्ल भारतको भ्रमणमा
राष्ट्रिय सहकारी महासंघ नेपालकी अध्यक्ष ओमदेवी मल्ल भारतीय सहकारी संघ संस्थाहरूको निमन्त्रणामा भारतको औपचारिक भ्रमणमा जानुभएको छ । दुई देशबीच सहकारी क्षेत्रमा भइरहेको सहकार्य प्रवद्र्धनलाई बृद्धि गर्ने उद्देश्यले गरिएको यस भ्रमणलाई नेपाल–भारत सहकारी सम्बन्धमा एक महत्वपूर्ण कदमको रूपमा हेरिएको छ ।
अध्यक्ष मल्ललाई आइतबार त्रिभुवन अन्तर्राष्ट्रिय विमानस्थलमा महासंघका वरिष्ठ उपाध्यक्ष रमेश पोखरेलले विदाइ गर्नुभयो । विदाईमा अध्यक्ष मल्लका श्रीमान प्रहरी अतिरिक्त महानिरीक्षक केदार ढकाल, महासंघका वरिष्ठ प्रबन्धक गोपीकृष्ण भण्डारी, कर्मचारी धुव्र रिजालको उपस्थिति थियो । अध्यक्ष मल्लसँगै महासंघका कार्यक्रम अधिकृत अमित अधिकारी समेत भ्रमण टोलीमा सहभागी हुनुहुन्छ ।
भारतको भ्रमणका क्रममा अध्यक्ष मल्लले भारतको राष्ट्रिय सहकारी संघ (NCUI), राष्ट्रिय सहकारी विकास निगम (NCDC), इफ्को (IFFCO), क्रिप्को (KRIBHCO), र अन्तर्राष्ट्रिय सहकारी महासंघको एसिया–प्रशान्त क्षेत्रीय कार्यालय (ICA-AP) का पदाधिकारीहरूसँग उच्चस्तरीय भेटवार्ता र छलफल गर्नुहुने कार्यक्रम रहेको छ ।
यी भेटघाटहरूमा दुई देशबीच सहकारी क्षेत्रमा सम्भावित पाइलट परियोजनाहरू सञ्चालन, सहकारी शिक्षा तथा तालिमका आदानप्रदान कार्यक्रमहरू, कृषि प्रविधिमा सहकार्य, डिजिटलाइजेसन प्रवद्र्धन र सदस्यहरूको क्षमता अभिवृद्धि लगायतका विषयहरूमा गहिरो छलफल हुने बताइएको छ ।
सहकारीका माध्यमबाट ग्रामिण विकास, कृषि उत्पादनमा प्रविधिको प्रयोग, सहकारी मार्फत मूल्य श्रृङ्खला विकास र युवा तथा महिलालाई लक्षित उद्यमशिलताको प्रवद्र्धन जस्ता क्षेत्रमा नेपाल–भारत सहकार्यलाई अझ मजबुत बनाउन यस भ्रमणले टेवा पु¥याउने अपेक्षा गरिएको छ । साथै, नेपाली सहकारीहरूको दक्षता अभिवृद्धिका लागि भारतीय सहकारीहरूको अनुभवबाट लाभ उठाउने सम्भावना पनि रहेको अध्यक्ष मल्लले बताउनुभयो ।अध्यक्ष मल्लको भ्रमणले दुई देशका सहकारीबीच दीर्घकालीन साझेदारीको ढोका खोल्ने विश्वास गरिएको छ । यस भ्रमणले सहकारी आन्दोलनलाई अन्तर्राष्ट्रिय तहमा थप प्रभावकारी रूपमा अघि बढाउन सहयोग पु¥याउने अपेक्षा गरिएको छ ।
