24/12/2025
राष्ट्रिय प्रजातन्त्र पार्टी (राप्रपा) ले पर्सा जिल्लाबाट आगामी निर्वाचनका लागि उम्मेदवार सिफारिस गरेको छ। पार्टीले पर्सा जिल्ला क्षेत्र नं. ३ बाट प्रतिनिधिसभा सदस्यका लागि दिपेश साहको नाम सिफारिस गरेको हो।
पार्टीको जिल्ला तथा क्षेत्रीय कमिटीको बैठकले साहलाई क्षेत्र नं. ३ का लागि उपयुक्त उम्मेदवारका रूपमा चयन गर्दै केन्द्रीय नेतृत्वसमक्ष नाम पठाउने निर्णय गरेको जनाएको छ। स्थानीय स्तरमा सक्रिय भूमिका र संगठन निर्माणमा योगदान पुर्याएको आधारमा साहको नाम सिफारिस गरिएको पार्टी स्रोतले जनाएको छ।
यसैगरी, राष्ट्रिय प्रजातन्त्र पार्टी पर्सा क्षेत्र नं. ३ ले समानुपातिक तर्फ मधेसी महिला कोटामा प्रियन्का यादवको नाम पनि सिफारिस गरेको छ। पार्टीले समावेशी प्रतिनिधित्व र मधेसी समुदायको सहभागिता सुनिश्चित गर्ने उद्देश्यले यादवको नाम अघि सारेको बताइएको छ।
पार्टीका स्थानीय नेताहरूका अनुसार आगामी निर्वाचनलाई लक्षित गर्दै संगठनलाई अझ मजबुत बनाउने, जनआधार विस्तार गर्ने र योग्य तथा लोकप्रिय उम्मेदवारलाई अघि बढाउने रणनीतिअनुसार सिफारिस प्रक्रिया अगाडि बढाइएको हो। सिफारिस गरिएका दुवै नाम अन्तिम निर्णयका लागि पार्टीको केन्द्रीय समितिमा पठाइएको छ।
केन्द्रीय नेतृत्वबाट औपचारिक निर्णय भएपछि उम्मेदवारको अन्तिम टुंगो लाग्ने र त्यसपछि चुनावी गतिविधि थप सक्रिय बनाइने पार्टीले जनाएको छ।